మెగాస్టార్ మీద బాలయ్య కామెంట్స్.. రెస్పాండ్ అయిన వైఎస్ జగన్!

ఏపీలో గూగుల్ డేటా సెంటర్ కు బీజం వేసిందని వైసీపీ ప్రభత్వమేనని ఆ పార్టీ అధినేత వైఎస్ జగన్ అన్నారు. చిరంజీవి మీద నందమూరి బాలకృష్ణ చేసిన వ్యాఖ్యలపై కూడా తాజాగా స్పందించారు.

చంద్రబాబుపై వైసీపీ అధినేత వైఎస్ జగన్ విమర్శలు గుప్పించారు. పార్టీ కేంద్ర కార్యాలయంలో మీడియాతో మాట్లాడారు జగన్. ఈ సందర్భంగా గూగుల్ డేటా సెంటర్ గురించి చెప్పారు. వైసీపీ ప్రభుత్వం హయాంలోనే డేటా సెంటర్ కు బీజం పడిందన్నారు. 2023 మే 3న డేటా సెంటర్ శంకుస్థాపన కూడా చేశామని తెలిపారు. సింగపూర్ నుంచి సబ్ సీ కేబుల్ తీసుకొచ్చే ప్రయత్నం జరిగిందన్నారు. దీనికి కొనసాగింపుగా గూగుల్ డేటా సెంటర్ వచ్చిందన్నారు. వైసీపీ వేసిన బీజానికి కొనసాగింపే విశాఖ గూగుల్ డేటా సెంటర్ అన్నారు. వేరే వాళ్లకు క్రెడిట్ ఇవ్వడం చంద్రబాబుకి ఇష్టం ఉండదని, అందుకే కొన్ని విషయాలు దాస్తున్నారని పేర్కొన్నారు.

వైఎస్ జగన్

‘హైదరాబాద్ అభివృద్ధికి చంద్రబాబుకు సంబంధం లేదు. కానీ చంద్రబాబు మాత్రం తానే కట్టినట్టుగా బిల్డప్ ఇస్తారు ఆరు ఎకరాల్లో హైటెక్ సిటీకి పునాది వేసింది నేదురుమల్లి జనార్దన్. కానీ చంద్రబాబు తానే ముత్తం అభివృద్ధి చేసినట్టుగా చెబుతారు.’ అని జగన్ విమర్శించారు.

మద్యం అమ్మేటప్పుడు బాటిళ్లపై క్యూఆర్ కోడ్ స్కాన్ చేయాలని చంద్రబాబు చెప్పిన విషయంపై జగన్ మాట్లాడారు. దుకాణాలు ఎవరి చేతుల్లో ఉన్నాయని ప్రశ్నించారు. దొంగ చేతికి తాళం ఇచ్చినట్టుగా ఉందని వ్యాఖ్యానించారు. స్కాన్ చేసేది ఎవరు అంటూ ప్రశ్నించారు.

ఉద్యోగులకు జీపీఎస్ లేదని, ఓపీఎస్ లేదని జగన్ అన్నారు. ఉద్యోగులకు అరచేతిలో వైకుంఠం చూపిస్తున్నారని మండిపడ్డారు. ఉద్యోగులను మోసం చేసిన చంద్రబాబు వికృత ఆనందం పొందుతున్నారని పేర్కొన్నారు. ఉద్యోగులనే కాదు.. రాష్ట్ర ప్రజలను చంద్రబాబు మోసం చేస్తున్నారని ఆరోపించారు.

ఇటీవల అసెంబ్లీలో సినీ నటుడు, హిందూపురం ఎమ్మెల్యే నందమూరి బాలకృష్ణ.. చిరంజీవి మీద కామెంట్స్ చేసిన విషయం తెలిసిందే. దీనిపై తాజాగా వైఎస్ జగన్ స్పందించారు. ‘బాలకృష్ణ తాగి అసెంబ్లీకి వచ్చి అసందర్భంగా మాట్లాడారు. బాలకృష్ణ మానసిక స్థితి ఎలా ఉందో ఆయనే ఆలోచించుకోవాలి. తాగిన వాళ్లను ఎలా అసెంబ్లీలోకి అనుమతిస్తారు, ఎలా మాట్లాడనిస్తారు.’ అని జగన్ ప్రశ్నించారు.