Naagzilla Fraud: 82 కోట్ల బడ్జెట్, 4 కోట్ల ఫ్రాడ్- నకిలీ బిల్లులు, దొంగ లెక్కలు- ఆ ముగ్గురికి ముందస్తు బెయిల్ నిరాకరణ

Naagzilla Fraud Case Anticipatory Bail Denies: బాలీవుడ్ హీరో కార్తీక్ ఆర్యన్ హీరోగా నిర్మాత కరణ్ జోహార్ నిర్మిస్తున్న నాగ్‌జిల్లా నిర్మాణంలో సుమారు రూ. 4 కోట్ల నిధుల మళ్లింపు జరిగింది. ఈ కేసులో ఆరోపణలు ఎదుర్కొంటున్న ముగ్గురు నిందితులకు ముందస్తు బెయిల్ పిటిషన్‌ను ముంబై సెషన్స్ కోర్టు కొట్టివేసింది.

Naagzilla Fraud Case Anticipatory Bail Denies: బాలీవుడ్ చిత్రపరిశ్రమలో రూ. 4 కోట్ల భారీ ఆర్థిక మోసం వెలుగులోకి వచ్చింది. ప్రముఖ నిర్మాత కరణ్ జోహార్ నిర్మిస్తున్న భారీ చిత్రం 'నాగ్‌జిల్లా' షూటింగ్ ప్రాసెస్‌లో నిధుల కేటాయింపులకు సంబంధించి అక్రమాలు జరిగాయనే ఆరోపణలపై ముంబైలోని దిండోషి సెషన్స్ కోర్టు కీలక తీర్పునిచ్చింది.

82 కోట్ల బడ్జెట్, 4 కోట్ల ఫ్రాడ్- నకిలీ బిల్లులు, దొంగ లెక్కలు- ఆ ముగ్గురికి ముందస్తు బెయిల్ నిరాకరణ

ప్రధాన నిందితులుగా ముగ్గురు

ఈ నాగ్‌జిల్లా ఫ్రాడ్ కేసులో ప్రధాన నిందితులుగా ఉన్న ముగ్గురు ప్రొడక్షన్ ఎగ్జిక్యూటివ్‌ల ముందస్తు బెయిల్ పిటిషన్‌ను న్యాయస్థానం తిరస్కరించింది. సినిమా నిర్మాణంలో టెక్నీషియన్ల సరఫరా, వాహనాల ఏర్పాటు, జూనియర్ ఆర్టిస్టుల చెల్లింపుల్లోనూ భారీగా అవకతవకలు జరిగాయని దర్యాప్తు సంస్థలు గుర్తించాయి.

"ఈ వ్యవహారంలో సమగ్ర విచారణ జరగాలంటే నిందితులను కస్టడీలోకి తీసుకుని విచారించాల్సిన అవసరం ఉంది" అని అడిషనల్ సెషన్స్ జడ్జి ఎం. మొహియుద్దీన్ వ్యాఖ్యానించారు. నిందితులపై ప్రాథమిక ఆధారాలు ఉన్నందున వారికి ముందస్తు బెయిల్ ఇవ్వలేమని స్పష్టం చేశారు.

రూ. 82.50 కోట్ల బడ్జెట్.. రూ. 3.92 కోట్ల గోల్‌మాల్

కరణ్ జోహార్‌కు చెందిన 'ధర్మ ప్రొడక్షన్స్', మహావీర్ జైన్ నేతృత్వంలోని 'మహావీర్ జైన్ ఫిల్మ్స్' సంయుక్తంగా రూ. 82.50 కోట్ల అంచనా వ్యయంతో 'నాగ్‌జిల్లా' చిత్రాన్ని నిర్మించడానికి ఒప్పందం కుదుర్చుకున్నాయి. ఈ నిర్మాణ పనుల బాధ్యతను కన్సల్టెంట్ కుల్దీప్ సింగ్ చంపావత్ (47)కు అప్పగించారు.

ఆయన సిఫార్సుతో తన బంధువైన మహీపాల్ కరణ్ రాథోడ్ (42)ను ఎగ్జిక్యూటివ్ ప్రొడ్యూసర్‌గా, శివకుమార్ తివారి (45)ని లైన్ ప్రొడ్యూసర్‌గా నియమించారు. మహావీర్ జైన్ ఫిల్మ్స్ అకౌంటెంట్ తుకారాం మహదేవ్ సావంత్ ఇచ్చిన ఫిర్యాదుతో ఈ దగా బయటపడింది.

ప్రొడక్షన్ ఖర్చుల కోసం రూపొందించిన ప్రామాణిక నిబంధనలను (SOP) పక్కనపెట్టి, నిందితులు ముగ్గురూ కలిసి రూ. 3,92,76,308 లెక్కింపులోకి రాని ఖర్చులు చేశారని ప్రాసిక్యూషన్ కోర్టుకు తెలిపింది. ఎలాంటి బిల్లులు, వోచర్లు చూపకుండానే ఈ సొమ్మును విత్‌డ్రా చేశారు.

నకిలీ బిల్లులు.. కమిషన్ల రూపంలో లంచాలు

నిధుల మళ్లింపు మాత్రమే కాకుండా, అనేక రకాలుగా ఈ ముగ్గురూ అక్రమాలకు పాల్పడ్డారు. రూ. 85,000 ఉన్న ఒక వెండర్ బిల్లును ఏకంగా రూ. 1.30 లక్షలకు పెంచి వ్యయాన్ని చూపించారు. సినిమా నిర్మాణానికి ఎలాంటి సేవలు అందించని 'ఏఎన్‌ఎమ్ గ్లోబల్' అనే సంస్థకు రూ. 45,000 చెల్లించినట్లు రికార్డుల్లో రాశారు.

ఒక ప్రొడక్షన్ అసిస్టెంట్‌తో కలిసి రూ. 1.50 లక్షలకు పైగా నకిలీ బిల్లులను సృష్టించి సొమ్మును సొంత ఖాతాల్లోకి మళ్లించినట్లు దర్యాప్తు అధికారి కోర్టు దృష్టికి తీసుకెళ్లారు. వెండర్లకు కాంట్రాక్టులు కట్టబెట్టేందుకు, వారి బిల్లులు క్లియర్ చేసేందుకు నిందితులు ముగ్గురూ భారీగా కమిషన్లు తీసుకోవడమే కాకుండా, ఖరీదైన మొబైల్ ఫోన్లను లంచంగా స్వీకరించారని పోలీసులు తేల్చారు.

ఇచ్ఛాధారి నాగుగా కార్తీక్ ఆర్యన్

ఇదిలా ఉంటే, బాలీవుడ్ యంగ్ స్టార్ కార్తీక్ ఆర్యన్ ఇందులో 'ఇచ్ఛాధారి నాగ్' (రూపం మార్చే పాము) పాత్రలో నటిస్తున్నారు. మృగ్‌దీప్ సింగ్ లాంబ దర్శకత్వం వహిస్తున్న ఈ చిత్రానికి గౌతమ్ మెహ్రా కథ అందించారు.

ధర్మ ప్రొడక్షన్స్, మహావీర్ జైన్ ఫిల్మ్స్‌లతో పాటు ఆదార్ పూనావాలా, అపూర్వ మెహతా, నీతూ ఎమ్ జైన్ కూడా ఈ సినిమాకు భాగస్వాములుగా ఉన్నారు. వచ్చే ఏడాది ప్రేక్షకుల ముందుకు రానున్న ఈ భారీ బడ్జెట్ సినిమా నిర్మాణంలోనే ఇన్ని అక్రమాలు వెలుగులోకి రావడం చిత్రసీమలో కలకలం రేపింది.