నెట్‌ఫ్లిక్స్‌లోకి మరో హారర్ థ్రిల్లర్ మూవీ.. ట్రైలర్ రిలీజ్.. స్ట్రీమింగ్ తేదీ ఇదే

నెట్‌ఫ్లిక్స్ లోకి మరో హారర్ థ్రిల్లర్ మూవీ స్ట్రీమింగ్ కు వస్తోంది. గురువారం (అక్టోబర్ 30) ఈ సినిమా ట్రైలర్ ను ఆ ఓటీటీ రిలీజ్ చేసింది. కశ్మీర్ లోని బారాముల్లా టౌనులో జరిగే కథగా దీనిని తెరకెక్కించారు.

హారర్ థ్రిల్లర్ మూవీ ప్రేక్షకుల కోసం మరో సినిమా నేరుగా ఓటీటీలోకి వస్తోంది. ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ ఈ మూవీని వచ్చే వారం స్ట్రీమింగ్ చేయనుంది. కొన్నాళ్ల కిందట ఈ సినిమా గురించి వెల్లడించిన ఆ ఓటీటీ.. తాజాగా గురువారం (అక్టోబర్ 30) ట్రైలర్ రిలీజ్ చేసింది. ఇది ఆసక్తికరంగా సాగింది.

నెట్‌ఫ్లిక్స్‌లోకి మరో హారర్ థ్రిల్లర్ మూవీ.. ట్రైలర్ రిలీజ్.. స్ట్రీమింగ్ తేదీ ఇదే

బారాముల్లా మూవీ ట్రైలర్

ప్రముఖ నటుడు మానవ్ కౌల్ ప్రధాన పాత్ర పోషించిన 'బారాముల్లా' మూవీ ట్రైలర్ ని నెట్‌ఫ్లిక్స్ విడుదల చేసింది. ఇందులో కశ్మీర్ లోయల లోతుల్లో దాగి ఉన్న ఒక రహస్యం చుట్టూ కథ తిరగనుంది. బారాముల్లా అనే పట్టణంలో అకస్మాత్తుగా పిల్లలు అదృశ్యం కావడంతో ఈ ట్రైలర్ మొదలైంది. ఆ మిస్సింగ్ కేసులను పరిష్కరించడానికి ఓ పోలీస్ అధికారి రంగంలోకి దిగుతాడు. ఆ పాత్రనే మానవ్ కౌల్ పోషించాడు. ఈ ట్రైలర్ మిస్టరీతో కూడి ఉండటం ప్రేక్షకులను ఆకట్టుకుంది.

'బారాముల్లా' ట్రైలర్ అకస్మాత్తుగా పిల్లలు అదృశ్యం కావడంతో మొదలవుతుంది. ఆ పిల్లలు ఎలా మాయమవుతున్నారు అనేది తేల్చడానికి దర్యాప్తు ప్రారంభమవుతుంది. అందరిలో భయం కూడా మొదలవుతుంది. మిస్టరీతోపాటు బ్యాక్‌గ్రౌండ్ మ్యూజిక్ ఓ రకమైన భయాన్ని ప్రేక్షకుల్లో కలిగిస్తుంది. సాధారణంగా హారర్ సినిమాలు సౌండ్ తో భయపెడతాయి.. కానీ ఈ బారాముల్లా నిశ్శబ్దంతోనే భయపెడుతుందని ఇందులో లీడ్ రోల్ పోషించిన మానవ్ కౌల్ అన్నాడు.

'బారాముల్లా' రియల్ స్టోరీయా?

ఈ బారాముల్లా సినిమాలో డీఎస్పీ రిద్వాన్ సయ్యిద్ పాత్ర పోషించాడు మానవ్ కౌల్. కశ్మీరు లోయల అందాలే కాదు.. వాటి వెనుక ఎన్నో రహస్యాలు కూడా దాగి ఉన్నట్లు ఈ సినిమా చూస్తే తెలుస్తుందని మానవ్ అన్నాడు. దీంతో ఈ మూవీ వాస్తవ ఘటనల ఆధారంగా తెరకెక్కిందా అన్న సందేహం కలుగుతోంది.

"నేను బారాముల్లా నుండి వచ్చిన కశ్మీరీని కావడం వల్ల ఈ స్క్రిప్ట్ నాకు ఒక సంకేతంలా అనిపించింది. ఈ లోయ కథలను నిజాయితీతో, నిబద్ధతతో, మా ప్రేమతో చెప్పడానికి ఇది మంచి అవకాశం" అని మానవ్ కౌల్ చెప్పాడు. ఆదిత్య సుహాస్ జంభాలే దర్శకత్వం వహించిన 'బారాముల్లా' నేరుగా ఓటీటీలోకి వస్తున్న సినిమా. దీనిని నవంబర్ 7 నుంచి నెట్‌ఫ్లిక్స్ లో చూడొచ్చు.

గతంలో ఆర్టికల్ 370 అనే సినిమా తీసిన ఆదిత్య జంభాలే మంచి హిట్ కొట్టాడు. కశ్మీర్ లో ఆర్టికల్ 370ని ఎత్తేయడానికి దారి తీసిన పరిస్థితుల చుట్టూ ఆ సినిమా తిరుగుతుంది. అలాంటి డైరెక్టర్ తీసిన మూవీ కావడంతో ఈ బారాముల్లాపైనా ఆసక్తి నెలకొంది.