చేతిలోన చేయి వేసి.. పారిస్‌లో రొమాంటిక్‌గా మాజీ ప్ర‌ధాని, పాప్ స్టార్‌.. రిలేష‌న్‌షిప్ అఫీషియ‌ల్‌!

పాప్ స్టార్ కేటీ పెర్రీ, కెనడా మాజీ ప్రధాని జస్టిన్ ట్రూడో తమ బంధంపై క్లారిటీ ఇచ్చేసినట్లే అనిపిస్తోంది. కేటీ పుట్టినరోజు వేడుకల సందర్భంగా పారిస్‌లో ఇద్దరూ చేతులు పట్టుకుని రొమాంటిక్ గా కనిపించారు.

పాప్ స్టార్ కేటీ పెర్రీ, కెనడా మాజీ ప్రధాని జస్టిన్ ట్రూడో తమ డేటింగ్ ను కన్ఫామ్ చేశారు. ఈ వీకెండ్ లో పారిస్ వీధుల్లో ఇద్దరూ చేతిలో చేయి వేసుకుని నడుస్తూ కనిపించారు. ఒక జంటగా వారు బహిరంగంగా కనిపించడం ఇదే మొదటిసారి. టీఎంజెడ్ నివేదిక ప్రకారం కేటీ పెర్రీ 41వ పుట్టినరోజు వేడుకల కోసం పెర్రీ, ట్రూడో శనివారం రాత్రి ఫ్రెంచ్ రాజధానిలో బయటకు వచ్చారు. ఈ జంట ప్రసిద్ధ క్రేజీ హార్స్ పారిస్‌లో జరిగిన క్యాబరే షోకు హాజరయ్యారు. అక్కడ వారిని ఫొటోలు తీయడానికి ఫొటోగ్రాఫర్లు వేచి ఉన్నారు.

కేటీ పెర్రీ, జస్టిన్ ట్రూడో (X/@likeathornrose)

వీడియో వైరల్

అభిమానులు కేరింతలు కొడుతుండగా కేటీ పెర్రీ, జస్టిన్ ట్రూడో వేదిక నుండి చేతిలో చేయి వేసుకుని బయటకు వస్తున్న దృశ్యాలు వీడియోలో రికార్డ్ అయ్యాయి. ఈ జంట తమ కారు వద్దకు నడుస్తుండగా ఒక అభిమాని కేటీకి గులాబీ పువ్వు అందించి పుట్టినరోజు శుభాకాంక్షలు తెలిపారు. ఫొటోగ్రాఫర్లు క్లిక్ మనిపిస్తుండగా వారు నవ్వుతూ కనిపించారు. దీంతో డేటింగ్ కన్ఫామ్ అయిందనే కామెంట్లు వినిపిస్తున్నాయి.

లిప్ కిస్

కాలిఫోర్నియా తీరంలో పడవపై పెర్రీ, ట్రూడో ముద్దు పెట్టుకుంటున్న చిత్రాలు వెలువడిన కొన్ని వారాల తర్వాత ఈ పారిస్ పర్యటన జరిగింది. వారి మధ్య కెమిస్ట్రీ జూలైలో మొదటిసారిగా పుకార్లకు దారితీసింది. అప్పుడు వారిద్దరూ మాంట్రియల్‌లో కలిసి భోజనం చేస్తూ, ఆ తర్వాత మౌంట్ రాయల్ పార్క్‌లో షికారు చేస్తూ కనిపించారు. పెర్రీ తన లైఫ్‌టైమ్స్ టూర్‌లో భాగంగా మాంట్రియల్‌లో ఇచ్చిన ప్రదర్శనలో ఒకదానికి ట్రూడో కూడా హాజరైనట్లు సమాచారం.

అక్టోబర్ నాటికి కాలిఫోర్నియా తీరంలో కేటీ పడవపై ఈ జంట ఏకాంతంగా గడుపుతున్న ఫొటోలు బయటకు రావడంతో పుకార్లకు మరింత బలం చేకూరింది. ఈ క్లిప్ ఆన్‌లైన్‌లో వేగంగా వైరల్ అయింది. ట్రూడోతో సంబంధానికి ముందు కేటీ పెర్రీ నటుడు ఓర్లాండో బ్లూమ్‌తో విడిపోవడాన్ని జూలైలో ధృవీకరించింది.

ఓర్లాండ్ తో

2016లో గోల్డెన్ గ్లోబ్స్ ఆఫ్టర్‌పార్టీలో మొదటిసారి కలుసుకున్న ఓర్లాండో, పెర్రీ 2019 వాలెంటైన్స్ డే రోజున నిశ్చితార్థం చేసుకున్నారు. 2020లో వారికి కుమార్తె డైసీ డోవ్ జన్మించింది. మరోవైపు జస్టిన్ ట్రూడో మాజీ టెలివిజన్ హోస్ట్ సోఫీ గ్రెగోయిర్ ట్రూడోతో 18 సంవత్సరాల వివాహ బంధంలో ఉన్నారు. ఆగస్టు 2023లో ఈ జంట విడిపోవడాన్ని ప్రకటించారు. వారు తమ ముగ్గురు పిల్లలు జేవియర్, ఎల్లా-గ్రేస్, హ్యాడ్రియన్‌లను కలిసి పెంచుతున్నారు.