అల్లు అర్జున్-అట్లీ సినిమాపై హైప్ పెంచేసిన రణ్‌వీర్ సింగ్..ఇండియన్ సినిమాలో మునుపెన్నడూ చూడని అద్భుతమంటూ సంచలన కామెంట్లు

అట్లీ దర్శకత్వంలో రాబోతున్న AA22 x A6 సినిమా గురించి రణ్‌వీర్ సింగ్ మాట్లాడాడు. షూటింగ్ సమయంలో తాను సెట్‌కు వెళ్లినప్పటి అనుభవాన్ని పంచుకున్నాడు. ఇండియన్ సినిమాలో మునుపెన్నడూ చూడని అద్భుతాన్ని అట్లీ సృష్టిస్తున్నాడని పేర్కొన్నాడు.

జవాన్ లాంటి భారీ విజయం తర్వాత దర్శకుడు అట్లీ తన తదుపరి చిత్రం AA22 x A6 తో మరోసారి ప్రేక్షకులను అలరించడానికి సిద్ధమయ్యాడు. ఈ సినిమాలో అల్లు అర్జున్, దీపికా పదుకొణె జంటగా నటిస్తున్నారు. ఈ ప్రాజెక్ట్ పై ఇప్పటికే భారీ అంచనాలున్నాయి. ఇప్పుడు దీపికా పదుకొణె భర్త, నటుడు రణ్‌వీర్ సింగ్ ఆ హైప్ ను మరింత పెంచేశాడు.

అల్లు అర్జున్, అట్లీ సినిమాపై రణ్‌వీర్ సింగ్ కామెంట్లు

యాడ్ లాంచ్ ఈవెంట్

చింగ్స్ యాడ్ లాంచ్ ఈవెంట్‌లో రణ్‌వీర్.. అట్లీని పొగడ్తలతో ముంచెత్తాడు. “జవాన్‌తో దేశవ్యాప్తంగా పేరు తెచ్చుకుని, భారతదేశంలోనే అతిపెద్ద దర్శకుడిగా మారకముందే మెర్సల్ విడుదల తర్వాత ఆయనకు నేను మెసేజ్ చేశా. ‘సర్, మీ సినిమా నాకు చాలా ఇష్టం. మీరు ముంబైకి రావాలి, మనం కలిసి కొన్ని సినిమాలు చేద్దాం’ అని చెప్పా. అట్లీతో కలిసి పనిచేయాలని నేను ఎప్పటినుంచో అనుకుంటున్నా. ఇన్నేళ్లుగా ఆయన నాకు మంచి స్నేహితుడిగా ఉన్నాడు” అని రణ్‌వీర్ సింగ్ అన్నాడు.

అదో అద్భుతం

అట్లీ రాబోయే చిత్రం AA22 x A6 గురించి కూడా రణ్‌వీర్ మాట్లాడుతూ.. “ఆయనతో, ఆయన సూపర్-డూపర్ అద్భుతమైన టీమ్‌తో కలిసి పనిచేయడం ఎప్పుడూ గొప్పగా ఉంటుంది. మిస్టర్ జి.కె. విష్ణు కెమెరా ముందు నిలబడటం గౌరవంగా, ఆనందంగా ఉంది. నా భార్య ఆయనతో షూటింగ్‌లో ఉన్నందున, నేను ఆయన ప్రస్తుత సినిమా సెట్‌కు వెళ్లాను. మీరు ఈ విషయం ఇంతకుముందే విని ఉండవచ్చు, కానీ నా మాటగా వినండి. ఇండియన్ సినిమాలో మీరు మునుపెన్నడూ చూడని, అనుభవించని ఒక అద్భుతాన్ని ఆయన సృష్టిస్తున్నారు” అని రణ్‌వీర్ పేర్కొన్నాడు.

హాలీవుడ్ టెక్నీషియన్లు

గతంలో ఇండియా టుడే డిజిటల్‌కు ఇచ్చిన ఇంటర్వ్యూలో అట్లీ స్వయంగా ఈ సినిమా గురించి మాట్లాడుతూ.. “చాలా కొత్తగా, ఆసక్తికరంగా, చూసేవారిని కట్టిపడేసేలా” ఒక సినిమాను తీస్తున్నట్లు వెల్లడించాడు. ఈ ప్రాజెక్ట్ కోసం హాలీవుడ్ టెక్నీషియన్లతో కూడా ఈ దర్శకుడు పనిచేస్తున్నాడు. “హాలీవుడ్ టెక్నీషియన్లు కూడా ఈ సినిమాకు పనిచేస్తున్నారు, ఇది చాలా సవాలుతో కూడిన ప్రాజెక్ట్ అని వారు కూడా అంటున్నారు. దాన్నిబట్టి మేం నిజంగా ఏదో పెద్దది సృష్టిస్తున్నామని నమ్ముతున్నా” అని అట్లీ వివరించాడు.

150 కోట్లతో

ఫుడ్ బ్రాండ్ చింగ్స్ లేటెస్ట్ యాడ్ కు అట్లీ డైరెక్టర్. ఈ యాడ్ లో రణ్‌వీర్, శ్రీలీల, బాబీ డియోల్ నటించారు. ఈ యాడ్ కోసం ఏకంగా రూ.150 కోట్లు ఖర్చు పెట్టారని తెలిసింది. కాంతార చాప్టర్ 1, ఛావా, సైయారా లాంటి బ్లాక్ బస్టర్ సినిమాలకంటే ఈ యాడ్ కు పెట్టిన బడ్జెట్ ఎక్కువ కావడం గమనార్హం.