E-Paper
SS Rajamouli: వారణాసిలో ఏఐ వాడటం లేదు.. 1500 మంది వాయిస్ ఆర్టిస్టులు.. 50 భాషల్లో రిలీజ్: రాజమౌళి కామెంట్స్
SS Rajamouli: వారణాసి మూవీ విషయంలో ఏఐ వాడకంపై రాజమౌళి చేసిన కామెంట్స్ వైరల్ అవుతున్నాయి. అసలు ఈ మూవీలో ఏఐని వాడటం లేదని, 50 భాషల్లో రిలీజ్ కోసం ఏకంగా 1500 మంది వాయిస్ ఆర్టిస్టులను ఆడిషన్ చేస్తున్నట్లు వెల్లడించారు.
Prefer HTon Google
SS Rajamouli: సూపర్స్టార్ మహేష్ బాబు, ఎస్ఎస్ రాజమౌళి కాంబినేషన్లో వస్తున్న మైథలాజికల్ గ్లోబ్ ట్రాటింగ్ అడ్వెంచర్ 'వారణాసి' (Varanasi) సినిమాపై ప్రపంచవ్యాప్తంగా అంచనాలు పీక్స్లో ఉన్నాయి. అయితే ఈ మూవీ ప్రొడక్షన్లో ఆర్టిఫిషియల్ ఇంటెలిజెన్స్ (AI) వాడకంపై వస్తున్న పుకార్లకు దర్శకధీరుడు రాజమౌళి ఫుల్ స్టాప్ పెట్టారు. జార్జియా యూనివర్సిటీ విద్యార్థులతో మాట్లాడుతూ జనరేటివ్ ఏఐ పట్ల తనకు ఉన్న సందేహాలను ఓపెన్గా పంచుకున్నారు.
ఫిల్మ్ మేకింగ్లో సాంకేతికత వాడకం పెరిగినప్పటికీ, మనుషుల ఎమోషన్స్, క్రియేటివిటీని ఏఐ ఎప్పటికీ రీప్లేస్ చేయలేదని జక్కన్న స్పష్టం చేశారు.
రీసెర్చ్కి ఏఐ ఓకే.. క్రియేటివిటీకి మాత్రం డౌటే
ఆర్టిఫిషియల్ ఇంటెలిజెన్స్ భవిష్యత్తు ఎటు వెళ్తుందో ఊహించడం చాలా కష్టమని రాజమౌళి అన్నారు. ప్రొడక్షన్ రీసెర్చ్, ఆర్ అండ్ డి (R&D), ప్రాథమిక పనులకు ఏఐ ఒక గొప్ప అసిస్టెంట్గా ఉపయోగపడుతుందని కొనియాడారు. గతంలో వారాలు, నెలలు పట్టే పనులు ఇప్పుడు కొద్ది గంటల్లోనే పూర్తవుతున్నాయని అంగీకరించారు.
అయితే జనరేటివ్ ఏఐ విషయంలో మాత్రం తాను స్క్రిప్టికల్గా (సందేహాస్పదంగా) ఉన్నట్లు రాజమౌళి వ్యాఖ్యానించారు. సినిమా క్రియేటివ్ ప్రాసెస్ లేదా డిజిటల్ ఫిల్మ్ మేకింగ్ కోసం తాము ఏఐ పై ఆధారపడట్లేదని, కేవలం ఒక సపోర్టింగ్ టూల్గా మాత్రమే వాడుతున్నామని తెలిపారు.
1500 మంది డబ్బింగ్ ఆర్టిస్టుల వేట.. ఏఐ వాయిస్లకు రాజమౌళి నో
'వారణాసి' సినిమాను ప్రపంచవ్యాప్తంగా 120కి పైగా దేశాల్లో ఏకంగా 50 భాషల్లో విడుదల చేసేందుకు మేకర్స్ గ్రాండ్ ప్లాన్ చేస్తున్నారు. ఇందులో భాగంగా కృత్రిమ ఏఐ వాయిస్లను వాడటానికి రాజమౌళి పూర్తిగా నిరాకరించారు. మనుషుల గొంతులోనే నిజమైన ఎమోషన్, డెప్త్ ఉంటాయని ఆయన నమ్ముతున్నారు.
ఇందుకోసం ఏకంగా 1,500 మంది రియల్ వాయిస్ ఆర్టిస్టులను ఆడిషన్ చేసి నమూనాలు సేకరిస్తున్నట్లు వెల్లడించారు. నటీనటులు పండించిన భావోద్వేగాలు వేరే భాషల్లోనూ అంతే ఇంటెన్స్గా పండాలంటే మనుషుల డబ్బింగ్ వాయిస్ మాత్రమే సెట్ అవుతుందని తేల్చి చెప్పారు.
2027 ఉగాదికి బాక్సాఫీస్ సునామీ.. బిగ్గెస్ట్ గ్లోబల్ ప్రాజెక్ట్
'ఆర్ఆర్ఆర్' సృష్టించిన గ్లోబల్ సెన్సేషన్ తర్వాత రాజమౌళి తెరకెక్కిస్తున్న ఈ ప్రాజెక్ట్లో మహేష్ బాబు రుద్ర పాత్రలో కనిపించనున్నారు. బాలీవుడ్ కమ్ హాలీవుడ్ స్టార్ ప్రియాంక చోప్రా కథానాయికగా నటిస్తుండగా, మలయాళ వర్సటైల్ యాక్టర్ పృథ్వీరాజ్ సుకుమారన్ విలన్గా అలరించబోతున్నారు.
శ్రీ దుర్గా ఆర్ట్స్ బ్యానర్పై విజయేంద్ర ప్రసాద్ కథతో రూపుదిద్దుకుంటున్న ఈ భారీ బడ్జెట్ యాక్షన్ విజువల్ వండర్ 2027 ఏప్రిల్ 7న ఉగాది కానుకగా ప్రపంచవ్యాప్తంగా థియేటర్లలోకి రానుంది. పాన్ వరల్డ్ స్థాయిలో సరికొత్త రికార్డులు సృష్టించడానికి ఈ టీమ్ సిద్ధమవుతోంది.
