ఆ దేశంలోనే సినిమాను బ్యాన్ చేయలేదు.. అందరూ చూడొచ్చని సెన్సార్ చెప్పింది.. ఏ మతానికి వ్యతిరేకం కాదు: యామీ గౌతమ్ కామెంట్స్

ఓజీ విలన్ ఇమ్రాన్ హష్మి, యామీ గౌతమ్ నటించిన హక్ మూవీ వచ్చే వారం రిలీజ్ కానుంది. ఈ నేపథ్యంలో ఈ సినిమాను యూఏఈలాంటి దేశం కూడా నిషేధించలేదని, ఇది ఏ మతానికి వ్యతిరేకం కాదని ఆమె స్పష్టం చేసింది.

ఓజీ మూవీ విలన్ ఇమ్రాన్ హష్మి లీడ్ రోల్లో నటించిన మూవీ 'హక్' (Haq). ఈ సినిమా నవంబర్ 7న థియేటర్లలో రిలీజ్ కానుంది. అయితే ఇస్లాంలో విడాకుల పద్ధతిని ప్రశ్నిస్తూ సాగే ఈ సినిమాపై ఓ వర్గం నుంచి విమర్శలు వస్తున్నాయి. ఈ నేపథ్యంలో మూవీలో ఫిమేల్ లీడ్ గా నటించిన యామీ గౌతమ్ స్పందించింది.

ఆ దేశంలోనే సినిమాను బ్యాన్ చేయలేదు.. అందరూ చూడొచ్చని సెన్సార్ చెప్పింది.. ఏ మతానికి వ్యతిరేకం కాదు: యామీ గౌతమ్ కామెంట్స్

యూఏఈలో గ్రీన్ సిగ్నల్

హక్ మూవీ సెన్సార్ గురించి నటి యామీ గౌతమ్ టైమ్స్ నౌతో ప్రత్యేకంగా మాట్లాడింది. ఈ సందర్భంగా ఆమె యూఏఈ సెన్సార్ గురించి మొట్టమొదటిసారిగా ఒక ఆసక్తికర విషయాన్ని వెల్లడించింది.

"ఈ సినిమాకి యూఏఈలో సెన్సార్‌పరంగా ఎటువంటి కట్స్ లేకుండా, '15 ప్లస్' సర్టిఫికేట్ లభించింది. అంటే ఇది అందరూ చూడదగిన సినిమా. అక్కడ ఎలాంటి సమస్య లేదంటే ఈ సినిమా ఏ మతాన్నీ విమర్శించడానికి తీయలేదని అర్థం" అని ఆమె నొక్కి చెప్పింది.

"సినిమా విడుదల కాకుండా దీనికి మించి సాక్ష్యం ఇవ్వడం కష్టమే. మేము ఒక్క వర్గానికి మాత్రమే సంబంధించి సినిమా తీయడం లేదు" అని యామీ గౌతమ్ స్పష్టం చేసింది. సుపర్ణ్ వర్మ దర్శకత్వం వహించిన ఈ కోర్టు డ్రామాను 1985 నాటి చారిత్రక షా బానో బేగం కేసు స్ఫూర్తితో రూపొందించారు.

'హక్' మూవీ స్టోరీ ఇలా..

ఇది జిగ్నా వోరా రాసిన 'బానో: భారత్ కీ బేటీ' అనే పుస్తకంలోని అంశాల ఆధారంగా తెరకెక్కింది. మొహమ్మద్ అహ్మద్ ఖాన్ వర్సెస్ షా బానో బేగం అనే చారిత్రక కేసుకు సంబంధించిన సంఘటనలను ఈ సినిమా నాటకీయంగా చూపించనుంది.

ఈ న్యాయ పోరాటం 1978లో ప్రారంభమైంది. అప్పుడు షా బానోను ఆమె లాయర్ భర్త విడాకులు ఇచ్చారు. ఈ కేసు 1985లో సుప్రీంకోర్టుకు చేరింది. అత్యున్నత న్యాయస్థానం ఐదుగురు న్యాయమూర్తుల రాజ్యాంగ ధర్మాసనం ఈ కేసులో కీలక తీర్పు ఇచ్చింది. ముస్లిం మహిళలకు కూడా చట్టం ప్రకారం భరణం పొందే హక్కు ఉంది అని ధర్మాసనం తీర్పు చెప్పింది. ఈ తీర్పు అప్పట్లో దేశవ్యాప్తంగా పెద్ద చర్చకు దారితీసింది.

ఇప్పుడా కేసు ఆధారంగానే ఈ హక్ మూవీ వస్తోంది. ఈ 'హక్' సినిమాలో యామీ గౌతమ్‌తో పాటు ఇమ్రాన్ హష్మి, షీబా చద్దా, వర్తికా సింగ్ ముఖ్య పాత్రలు పోషించారు. షాజియా బానో పాత్రో యామీ, ఆమె భర్త అబ్బాస్ ఖాన్ పాత్రలో ఇమ్రాన్ హష్మి నటించారు. ఓ ముస్లిం అయిన ఇమ్రాన్ కూడా ఈ సినిమా ఇస్లాం మతానికి వ్యతిరేకంగా తీసింది కదాని స్పష్టం చేశాడు.

ఈ సినిమా నవంబర్ 7న థియేటర్లలో విడుదల కానుంది. జంగ్లీ పిక్చర్స్, ఇన్‌సోమ్నియా ఫిల్మ్స్, బావేజా స్టూడియోస్ సంయుక్తంగా ఈ చిత్రాన్ని నిర్మించాయి.