నిద్ర పట్టడం లేదా? 33 ఏళ్ల అనుభవం ఉన్న న్యూరోసర్జన్ పంచుకున్న 4 చిట్కాలు

ఎంత అలసిపోయినా నిద్ర పట్టకపోవడానికి గల కారణాలను న్యూరోసర్జన్ డాక్టర్ ప్రశాంత్ కటకోల్ విశ్లేషించారు. పగటి పూట అలవాట్లే రాత్రి నిద్రను పాడు చేస్తాయని తెలిపారు. ఆయన తన అనుభవంతో 4 కీలక చిట్కాలను సూచించారు.

అలసిపోయి ఉన్నా కూడా రాత్రిపూట మీకు నిద్ర పట్టడం లేదా? పడకపై అటూ ఇటూ దొర్లుతూ, ఉదయపు అలారం మోగడానికి ఎంత సమయం ఉందో లెక్కపెడుతున్నారా? బాగా అలసిపోయి, ఆవలిస్తూ ఉన్నా కూడా, మనసు మాత్రం ఎంతో చురుకుగా ఉండి, నిద్ర రావడం లేదని ఇబ్బంది పడుతుంటే, మీకొక ముఖ్యమైన విషయం తెలియాలి. అలసట ఎంత ఎక్కువగా ఉంటే, అంత త్వరగా నిద్ర వస్తుందనే సిద్ధాంతం ఎల్లప్పుడూ పని చేయకపోవచ్చు.

If you are unable to sleep despite being exhausted, your daytime habits are to blame. (Picture credit: Shutterstock)

నిద్ర పట్టడం కోసం శరీరాన్ని అలసట పాలు చేయడం సరైన మార్గం కాదు. ఈ సమస్యను పరిష్కరించడానికి మరింత సమగ్రమైన వ్యూహం అవసరం.

33 ఏళ్లకు పైగా అనుభవం ఉన్న న్యూరోసర్జన్ డాక్టర్ ప్రశాంత్ కటకోల్ ఇటీవల (అక్టోబర్ 22న) ఒక ఇన్‌స్టాగ్రామ్ వీడియోలో ఈ సాధారణ నిద్ర సమస్య గురించి మాట్లాడారు. నిద్ర పట్టకపోవడానికి గల అసలు కారణాన్ని ఆయన ఆసక్తికరంగా వివరించారు.

“ఎంత అలిసిపోయినా, నిద్ర ఎందుకు పట్టడం లేదు? మీ పగటి పూట అలవాట్లే రాత్రి నిద్రను ఎలా పాడు చేస్తున్నాయో ఒక న్యూరోసర్జన్‌గా నేను మీకు చెబుతాను” అని ఆయన స్పష్టం చేశారు. దీని అర్థం, మీరు పగటిపూట తీసుకునే నిర్ణయాలే రాత్రి ఎంత బాగా నిద్రపోతారో నిర్ణయిస్తాయని. రాత్రి మంచి నిద్ర పట్టేందుకు, పగటి పూట చేయాల్సిన నాలుగు కీలక మార్పులను డాక్టర్ కటకోల్ సూచించారు.

1. ఎక్కువ నడవండి

నిద్రకు భంగం కలిగించే వాటిలో ఒకటి... ఎక్కువసేపు కదలకుండా ఉండటం. చాలామంది ఉద్యోగ రోజుల్లో ఆఫీసులోనో, వారాంతాల్లో సోఫాలోనో టీవీ చూస్తూ ఎక్కువ గంటలు కూర్చుంటున్నారు. ఇది ఏమాత్రం మంచిది కాదని డాక్టర్ కటకోల్ తెలిపారు. “పగటి పూట మీరు కూర్చునే సమయం కంటే, నడిచే సమయం ఎక్కువగా ఉండాలి” అని ఆయన సూచించారు.

2. లైట్ల వెలుతురు తగ్గించండి

“సూర్యుడు అస్తమించగానే, చుట్టుపక్కల లైట్ల వెలుతురు తగ్గించండి” అని న్యూరోసర్జన్ సలహా ఇచ్చారు. పడుకోవడానికి ముందు లైట్లను మసకబారేలా (Dim) చేయడం చాలా ముఖ్యం. అంటే, ప్రకాశవంతమైన ఓవర్‌హెడ్ లైట్ల నుంచి మసకబారిన బెడ్‌సైడ్ దీపాలకు మారడం మంచిది.

3. పడుకోవడానికి ముందు స్క్రీన్స్ వద్దు

మన జీవితాలు ఉదయం లేచినప్పటి నుంచి రాత్రి పడుకునే వరకు చాలా బిజీగా మారిపోయాయి. ఆఫీస్‌లో డెడ్‌లైన్స్ కోసం పరుగులు, మీటింగులు... ఈ పరుగు ఆపడం లేదు. అందుకే చాలామంది సాయంత్రం వేళను తమ రిలాక్సేషన్ సమయంగా భావిస్తారు. టీవీ షోలు చూడటం, లేదా సోషల్ మీడియాలో అనవసర విషయాలు చూస్తూ (Doom scrolling) సమయం గడుపుతారు. ఈ అలవాటు పడుకునే సమయం వరకు లేదా ఆ తర్వాత కూడా కొనసాగుతుంది.

ఈ అలవాటును పూర్తిగా తప్పు పట్టిన న్యూరోసర్జన్, “మీరు నిద్రపోయే సమయానికి కనీసం 3 గంటల ముందే మీ స్క్రీన్‌లను పక్కన పెట్టండి” అని నొక్కి చెప్పారు.

4. త్వరగా భోజనం చేయండి

డాక్టర్ కటకోల్ చెప్పిన ఆఖరి చిట్కా ఏంటంటే.. రాత్రి భోజనాన్ని త్వరగా పూర్తి చేయడం. “మీ రాత్రి భోజనాన్ని త్వరగా ముగించండి. వీలైతే సూర్యాస్తమయానికి ముందే తినేసి, ఆ తర్వాత 20 నిమిషాలు నడవండి” అని ఆయన సలహా ఇచ్చారు.

భోజనం ఆలస్యంగా, పడుకోవడానికి చాలా దగ్గరగా తీసుకుంటే, జీర్ణక్రియకు అంతరాయం కలుగుతుంది. దీనివల్ల పొట్ట ఉబ్బరంగా అనిపించి, పడకపై అటూ ఇటూ దొర్లుతుంటారు. జీర్ణక్రియ మెరుగుపడాలంటే, డాక్టర్ కటకోల్ చెప్పినట్లుగా, భోజనం తర్వాత కొద్దిసేపు నడవడం తప్పనిసరి. దీనివల్ల కడుపు భారంగా లేకుండా హాయిగా నిద్ర పడుతుంది.

ఈ ఫలితాలను చూడాలంటే, ఈ అలవాట్లను 'నిజాయితీగా' కొనసాగించాలని న్యూరోసర్జన్ డాక్టర్ కటకోల్ సలహా ఇచ్చారు. అంటే, మంచి నిద్ర కోసం ఈ ఆరోగ్యకరమైన మార్పులను క్రమం తప్పకుండా పాటించాలి.

(పాఠకులకు సూచన: ఈ నివేదిక సోషల్ మీడియాలో పోస్ట్ చేసిన సమాచారం ఆధారంగా రూపొందించబడింది. ఇందులో పేర్కొన్న అంశాలను హిందుస్తాన్ టైమ్స్ స్వతంత్రంగా ధృవీకరించలేదు. ఇది కేవలం సమాచారం అందించడానికి మాత్రమే ఉద్దేశించింది. వృత్తిపరమైన వైద్య సలహాకు ఇది ప్రత్యామ్నాయం కాదు.)