bathukamma uyyala songs lyrics : తంగేడు చెట్టు నవ్వి పూచెనయా.. ఉయ్యాల.. బతుకమ్మ పాట లిరిక్స్

bathukamma uyyala songs lyrics : తెలంగాణలో బతుకమ్మ సందడి మెుదలవుతోంది. బతుకమ్మ ఆడే సందర్బంగా ఉయ్యాల పాటలకు ఉండే ప్రత్యేకత వేరు. మీకో HT Telugu ఒక ఉయ్యాల పాట లిరిక్స్ సేకరించింది.

సింగార పల్లెల్లో సంతోషమాయెనే... ఉయ్యాల ||

బతుకమ్మ పాట

తొలకరి వానలు పారిన వేళనా... ఉయ్యాల

చెరువుల లోపల నీళ్లు నిండేనయా... ఉయ్యాల

పచ్చని చేలల్ల పైర్లు ఊగంగా... ఉయ్యాల

తంగేడు చెట్టు నవ్వి పూచెనయా... ఉయ్యాల ||

అక్కా చెల్లెళ్లు అందరూ రారండి... ఉయ్యాల

అల్లిబిల్లిగ పూలు ఏరుకొద్దాము... ఉయ్యాల

పచ్చని గునుగు పూలు దోసిళ్ల పడగా... ఉయ్యాల

గుమ్మడి పూలలోన గౌరమ్మ నిలవగా... ఉయ్యాల ||

తామర పూలన్నీ తారలై నిలవగా... ఉయ్యాల

కాటుక పూలల్ల కాంతి చిందేనయా... ఉయ్యాల

రుద్రాక్ష పూలన్నీ హారాలాయెనయా... ఉయ్యాల

దంతెన పూలతో దారింత సువాసన... ఉయ్యాల ||

రంగు రంగుల పూలు రాశిగా పోసి... ఉయ్యాల

ఇత్తడి తాంబాలం ఎంతో సింగారించి... ఉయ్యాల

అరిటాకు పరచి మనం పేర్చుదామమ్మా... ఉయ్యాల

ఎత్తైన బతుకమ్మను పేరుద్దామమ్మా... ఉయ్యాల ||

నెత్తిపైన గౌరమ్మను నిలుపుదామమ్మా... ఉయ్యాల

పసిడి ముద్దై గౌరి మెరిసిపోయేనయా... ఉయ్యాల

పట్టుకోకలు గట్టి పడతులు చేరగా... ఉయ్యాల

ముత్యాల గాజులు మురిసి మోగెనయా... ఉయ్యాల ||

ఊరంత ఒక్కటై వాడలకొచ్చెనా... ఉయ్యాల

రచ్చబండ కాడ రమణీయం ఆయెనా... ఉయ్యాల

వలయాకారముగా మనమంతా తిరుగుదాం... ఉయ్యాల

చప్పట్లు కొడుతూ చందమామ అందాం... ఉయ్యాల ||

అత్తమామల దీవెనలు పొందుదామమ్మా... ఉయ్యాల

ఆడపడుచులకు అండగా ఉందాము... ఉయ్యాల

సత్తుపిండి ప్రసాదం చవిచూద్దామమ్మా... ఉయ్యాల

మలీద ముద్దలు మక్కువగా తిందాము... ఉయ్యాల ||

ఒక్కరికొక్కరం వాయనాలు ఇద్దాం... ఉయ్యాల

చెరువు గట్టుపైన చిరునవ్వులు పూయగా... ఉయ్యాల

గంగమ్మ ఒడికి బతుకమ్మను పంపుదామమ్మా... ఉయ్యాల ||

పోయోచ్చి రావమ్మ మల్లొచ్చే ఏటికి... ఉయ్యాల

మా ఇండ్ల సిరులిచ్చి మమ్మల్ని దీవించు... ఉయ్యాల

పల్లె పల్లెన నీ పాట నిలవాలి... ఉయ్యాల

తెలంగాణ నేలకు దిష్టి తీయవమ్మా... ఉయ్యాల ||