ఆస్ట్రేలియా వీసా నిబంధనలు కఠినతరం: భారతీయ విద్యార్థులకు ఇబ్బందులే

ఆస్ట్రేలియా ప్రభుత్వం విదేశీ విద్యార్థుల వీసా నిబంధనలను కఠినతరం చేసింది. ఇకపై కోర్సులు చదివే విద్యార్థులు తమ భాగస్వాములను, పిల్లలను వెంట తీసుకెళ్లడం సాధ్యం కాదు. ఈ కొత్త నిర్ణయం భారతీయ విద్యార్థులపై ఎలాంటి ప్రభావం చూపుతుందో వివరంగా చూద్దాం.

ఆస్ట్రేలియాలో ఉన్నత విద్యను అభ్యసించాలని భావిస్తున్న భారతీయ విద్యార్థులకు ఆ దేశ ప్రభుత్వం బిగ్ షాక్ ఇచ్చింది. ఇమ్మిగ్రేషన్ వ్యవస్థను క్రమబద్ధీకరించే క్రమంలో వీసా నిబంధనలను విపరీతంగా కఠినతరం చేసింది. నూతన నిబంధనల ప్రకారం, ఆస్ట్రేలియాకు వచ్చే చాలామంది విదేశీ విద్యార్థులు తమ భాగస్వాములను (Spouse), పిల్లలను వెంట తీసుకురావడానికి అనుమతి నిరాకరించనున్నారు.

ఆస్ట్రేలియా వీసా నిబంధనలు కఠినతరం

కఠినమైన నిబంధనలు తెచ్చిన ఆస్ట్రేలియా ప్రభుత్వం

ఆస్ట్రేలియా హోం వ్యవహారాల మంత్రి టోనీ బర్క్ ఈ కీలక నిర్ణయాలను వెల్లడించారు. వీసా గడువు ముగిసినా దేశంలోనే ఉంటున్న వారిపై ఉక్కుపాదం మోపుతామని, వర్కింగ్ హాలిడే వీసాదారులకూ కఠిన నిబంధనలు అమలు చేస్తామని ఆయన స్పష్టం చేశారు.

ఆస్ట్రేలియాలో ప్రస్తుతం జనాభా పెరుగుదల, జీవన వ్యయం పెరగడం ప్రధాన రాజకీయ అంశాలుగా మారాయి. ఈ నేపథ్యంలో తాత్కాలిక వలసలను తగ్గించాలని ఒత్తిడి పెరుగుతోంది. 2028 నాటికి వార్షిక నికర వలసల సంఖ్యను 2,25,000 కు తగ్గించాలని ఆస్ట్రేలియా లక్ష్యంగా పెట్టుకుంది. ప్రస్తుతం ఈ సంఖ్య దాదాపు 3,00,000గా ఉంది.

వీసా గడువు ముగిస్తే కఠిన చర్యలు

వీసా గడువు తీరిన తర్వాత కూడా చట్టవిరుద్ధంగా దేశంలో ఉంటున్న వారిని గుర్తించేందుకు ఆస్ట్రేలియా ప్రభుత్వం 100 మంది అదనపు తనిఖీ అధికారులను (Compliance Officers) నియమిస్తోంది. గతంలో కోవిడ్ మహమ్మారి సమయంలో మెల్‌బోర్న్‌లో వాడిన క్వారంటైన్ కేంద్రాన్ని, వీసా నిబంధనలు ఉల్లంఘించిన వారిని ఉంచే డిటెన్షన్ సెంటర్‌గా మార్చాలని యోచిస్తోంది.

టూరిస్ట్ వీసాలపై వచ్చే వారికి 'నో ఫర్దర్ స్టే' నిబంధనను వర్తింపజేస్తున్నారు. అంటే వారు ఆస్ట్రేలియాలో ఉంటూ మరో రకం వీసాకు (పార్ట్‌నర్ వీసా వంటివి) దరఖాస్తు చేసుకోవడం కుదరదు. అలాగే వర్కింగ్ హాలిడే వీసాలను పొడిగించుకోవడానికి బ్యాలెట్ విధానాన్ని తీసుకువస్తున్నారు.

విద్యార్థుల వీసాలపై ఆంక్షల ప్రభావం

స్టూడెంట్ వీసాలను పునరుద్ధరించుకోవాలనుకునే (Renew) విద్యార్థులు, తమ ప్రస్తుత అర్హత కంటే ఉన్నత స్థాయి కోర్సుల్లో చేరితేనే అనుమతి ఇస్తారు. అత్యధిక కోర్సుల్లో చేరే విద్యార్థులు తమ కుటుంబ సభ్యులను వెంట తెచ్చుకునే సదుపాయాన్ని రద్దు చేశారు.

అయితే పసిఫిక్ దీవులు, ఆగ్నేయాసియా దేశాల విద్యార్థులకు, అలాగే పీహెచ్‌డీ (PhD) చేసే విద్యార్థులకు ఈ నిబంధన నుంచి మినహాయింపు ఇచ్చారు.

భారతీయ విద్యార్థులపై పడే ప్రభావం

ఆస్ట్రేలియాలో ఉన్నత విద్యను అభ్యసించాలని ఆశిస్తున్న భారతీయ విద్యార్థులపై ఈ కొత్త నిబంధనల ప్రభావం పడనుంది. వివాహమైన విద్యార్థులు, పిల్లలు ఉన్నవారు కుటుంబంతో కలిసి వెళ్లడం ఇకపై సులభం కాదు.

అయితే ఇప్పటికే ఆస్ట్రేలియాలో ఉంటున్న భారతీయ విద్యార్థుల కుటుంబాలకు తక్షణమే ఎలాంటి ముప్పు ఉండదని ప్రభుత్వం స్పష్టం చేసింది. ఈ నూతన మార్గదర్శకాలు భవిష్యత్తులో వచ్చే వీసాలకే ప్రధానంగా వర్తిస్తాయి.

ఆస్ట్రేలియా ఆర్థిక వ్యవస్థలో అంతర్జాతీయ విద్య అత్యంత కీలకమైనది. జూన్ 2025 నాటికి ఈ రంగం ఆ దేశ ఆర్థిక వ్యవస్థకు 53.6 బిలియన్ ఆస్ట్రేలియన్ డాలర్ల (దాదాపు 38 బిలియన్ డాలర్లు) ఆదాయాన్ని తెచ్చిపెట్టింది. ఆస్ట్రేలియా అత్యధికంగా ఎగుమతి చేసే రంగాల్లో ఇది నాలుగో స్థానంలో ఉంది. అయినప్పటికీ, దేశంలో పెరిగిన వలసలను నియంత్రించేందుకు లేబర్ ప్రభుత్వం ఈ కఠిన నిర్ణయాలు తీసుకుంటోంది.