E-Paper
EPFO కొత్త పోర్టల్ అప్డేట్స్: ఇకపై ఆన్లైన్లోనే ఈ కీలక పీఎఫ్ సేవలు
ఉద్యోగుల భవిష్య నిధి సంస్థ (EPFO) తమ ఆన్లైన్ పోర్టల్ను సరికొత్త ఫీచర్లతో అప్డేట్ చేసింది. పీఎఫ్ విత్డ్రాయల్స్, కేవైసీ వివరాల సవరణ, యూఏఎన్ (UAN) యాక్టివేషన్ వంటి అనేక కీలక సేవలను ఆఫీసుల చుట్టూ తిరగకుండా, కంపెనీల సహాయం లేకుండా నేరుగా ఆన్లైన్లోనే పూర్తి చేసుకోవచ్చు.
Prefer HTon Google
ఉద్యోగుల భవిష్య నిధి సంస్థ (EPFO) పిఎఫ్ ఖాతాదారుల సౌకర్యార్థం తమ డిజిటల్ సేవల విధానంలో పటిష్ట మార్పులు తీసుకొచ్చింది. చందాదారులు తమ పీఎఫ్ ఖాతాలను వేగంగా, సులభంగా నిర్వహించుకునేలా ఆన్లైన్ పోర్టల్ను ఆధునీకరించింది.
ఆన్లైన్లో అందుబాటులోకి వచ్చిన ప్రధాన సేవలు
గత కొద్ది నెలలుగా పోర్టల్ పనితీరును మెరుగుపరిచే క్రమంలో సాంకేతిక నవీకరణలు చేపట్టిన ఈపీఎఫ్ఓ, ఉద్యోగులకు అవసరమైన సేవలను ఒకే వేదికపైకి తెచ్చింది.
యూఏఎన్ (UAN) యాక్టివేషన్, వ్యక్తిగత వివరాల తనిఖీ, సమాచార సవరణలతో పాటు పీఎఫ్ విత్డ్రాయల్ క్లెయిమ్ల దాఖలును చందాదారులు స్వయంగా పూర్తి చేయవచ్చు. ఈ మార్పుల వల్ల ఉద్యోగులు పీఎఫ్ కార్యాలయ సందర్శనలు తగ్గడమే కాకుండా, పాత యాజమాన్యాల (Employers) ఆమోదం కోసం వేచి చూసే ఇబ్బందులు తొలగిపోయాయి. వీటితో పాటు సమస్యల పరిష్కార వ్యవస్థను (Grievance Redressal) వేగవంతం చేశారు. పీఎఫ్ పాస్బుక్ పరిశీలన, ఖాతా ట్రాన్స్ఫర్, ఈ-నామినేషన్ (e-Nomination) దాఖలు సేవలను మరింత సులభతరం చేశారు.
కేవైసీ (KYC) అప్డేట్ ఎందుకు తప్పనిసరి?
పోర్టల్ సేవలను అంతరాయం లేకుండా పొందడానికి సభ్యుల ఖాతా వివరాలు సక్రమంగా ఉండాలి. UAN యాక్టివేట్ చేసుకోవడంతో పాటు ఆధార్, బ్యాంక్ ఖాతా వివరాలు, ఇతర కేవైసీ (KYC) సమాచారాన్ని పీఎఫ్ రికార్డులకు అనుసంధానించాలి.
ఆన్లైన్ సేవలకు సంబంధించి ఓటీపీ (OTP) ఆధారిత ధ్రువీకరణ జరుగుతుంది. కాబట్టి ఆధార్తో లింక్ అయిన పనిచేస్తున్న మొబైల్ నంబర్ ఉండటం అత్యంత అవసరం.
పీఎఫ్ క్లెయిమ్లు వేగంగా పూర్తి కావడానికి జాగ్రత్తలు
పీఎఫ్ తుది సెటిల్మెంట్ లేదా క్లెయిమ్ సమర్పించేటప్పుడు ఎలాంటి ఆలస్యం కాకుండా ఉండేందుకు కొన్ని ముందస్తు నిబంధనలు పాటించాలని ఈపీఎఫ్ఓ సూచిస్తోంది. ఉద్యోగంలో చేరిన తేదీ (Date of Joining), ఉద్యోగం వదిలేసిన తేదీ (Date of Exit) వివరాలు ఈపీఎఫ్ఓ డేటాబేస్లో సరిగ్గా నమోదయ్యాయో లేదో సరిచూసుకోవాలి. ఉద్యోగం మారినప్పుడు నిబంధనల ప్రకారం వర్తించే వెయిటింగ్ పీరియడ్ను గమనించాలి.
క్లెయిమ్ సబ్మిట్ చేసే ముందు వివరాలన్నీ సరిగ్గా ఉన్నాయో లేదో తనిఖీ చేయడం శ్రేయస్కరం. ఈ-నామినేషన్ అప్డేట్గా ఉంచడం వల్ల భవిష్యత్తులో లేదా అత్యవసర సమయాల్లో కుటుంబ సభ్యులు క్లెయిమ్స్ పొందడం సులువవుతుంది. సమస్యలు ఎదురైతే ఈపీఎఫ్ఓ అధికారిక మార్గాల ద్వారా సంప్రదించి పరిష్కరించుకోవచ్చు. సభ్యులు నేరుగా epfo.gov.in వెబ్సైట్ను సందర్శించి అప్డేట్ చేసిన పోర్టల్ సేవలను వినియోగించుకోవచ్చు.
తరచుగా అడిగే ప్రశ్నలు (FAQs)
ప్రశ్న 1: ఈపీఎఫ్ఓ అప్డేటెడ్ పోర్టల్లో లభించే ప్రధాన సేవలు ఏవి?
జవాబు: యూఏఎన్ (UAN) యాక్టివేషన్, పీఎఫ్ విత్డ్రాయల్ క్లెయిమ్లు, పాస్బుక్ తనిఖీ, ఖాతా ట్రాన్స్ఫర్, కేవైసీ వివరాల అప్డేట్, ఈ-నామినేషన్ సేవలు లభిస్తాయి.
ప్రశ్న 2: ఆన్లైన్ పిఎఫ్ క్లెయిమ్కు ఆధార్-మొబైల్ లింకింగ్ ఎందుకు అవసరం?
జవాబు: ఆన్లైన్ లావాదేవీల భద్రత, ఓటీపీ (OTP) ఆధారిత ప్రామాగీకరణ కోసం ఆధార్కు లింక్ అయిన మొబైల్ నంబర్ తప్పనిసరి.
ప్రశ్న 3: పీఎఫ్ సెటిల్మెంట్ క్లెయిమ్ చేసే ముందు ఏ వివరాలు తనిఖీ చేయాలి?
జవాబు: UAN యాక్టివేషన్, ఆధార్, బ్యాంక్ కేవైసీ, ఉద్యోగంలో చేరిన తేదీ (Date of Joining), వదిలేసిన తేదీ (Date of Exit), నామినేషన్ వివరాలు సరిగ్గా ఉన్నాయో లేదో చూసుకోవాలి.
