హెచ్-1బీ వీసాల్లో కోతలు అమెరికాకే ప్రమాదం: ఇండియాస్పోరా సంచలన నివేదిక

అమెరికాలో హెచ్-1బీ వీసాలు, ఉద్యోగ అనుమతులపై ఆంక్షలు విధించేందుకు జరుగుతున్న యత్నాలపై భారత సంతతి సంస్థ 'ఇండియాస్పోరా' తీవ్ర ఆందోళన వ్యక్తం చేసింది. ఈ నిర్ణయాల వల్ల ఐటీ, ఆరోగ్యం, విద్యారంగాలు తీవ్రంగా దెబ్బతిని అమెరికా ఆర్థిక వ్యవస్థకే నష్టం వాటిల్లుతుందని హెచ్చరించింది.

అమెరికాలో ఎన్నికల వేడి పెరుగుతున్న వేళ విదేశీ నిపుణులు, ముఖ్యంగా భారతీయులను లక్ష్యంగా చేసుకుని సాగుతున్న రాజకీయ ప్రకటనలు, వీసా నిబంధనల కఠినతపై భారతీయ డయాస్పోరా సంస్థ ‘ఇండియాస్పోరా’ (Indiaspora) తీవ్ర నిరసన వ్యక్తం చేసింది. హెచ్-1బీ వీసాదారులు, విదేశీ ప్రొఫెషనళ్లపై ఆంక్షలు విధిస్తే అమెరికా ఆర్థిక వ్యవస్థే కోలుకోలేని దెబ్బతింటుందని హెచ్చరించింది. అక్టోబర్ 30న విడుదల చేసిన ఒక ప్రకటనలో హెచ్-1బీ, ఇతర వీసా కేటగిరీల్లో మార్పులు తెచ్చేందుకు ప్రతిపాదించిన విధానాలు అమెరికాలోని కీలక రంగాలను దెబ్బతీస్తాయని స్పష్టం చేసింది.

హెచ్-1బీ వీసాల్లో కోతలు అమెరికాకే ప్రమాదం: ఇండియాస్పోరా సంచలన నివేదిక

అమెరికాలోని హెల్త్‌కేర్, టెక్నాలజీ, విద్యా రంగాల్లో భారత సంతతి నిపుణులు అత్యంత కీలక పాత్ర పోషిస్తున్నారని సంస్థ గుర్తుచేసింది. నైపుణ్యం కలిగిన మానవవనరుల కొరతను తీర్చడంలో భారతీయ ఉద్యోగుల సహకారాన్ని గుర్తించాలని, రాజకీయ ప్రయోజనాల కోసం వారిని లక్ష్యంగా చేసుకోవద్దని డెమొక్రాట్లు, రిపబ్లికన్లతో సహా అన్ని రాజకీయ పార్టీల నేతలకు విజ్ఞప్తి చేసింది.

ఆర్థిక వ్యవస్థకు బిలియన్ డాలర్ల లబ్ధి

"అమెరికాను ప్రపంచంలోనే అత్యున్నత ఆవిష్కరణల రథసారథిగా తీర్చిదిద్దడంలో భారత్‌కు చెందిన హెచ్-1బీ ఉద్యోగులు ఎంతో తోడ్పడ్డారు. అమెరికా ఆర్థిక వ్యవస్థకు బిలియన్ల కొద్దీ డాలర్ల ఆదాయాన్ని తెచ్చిపెట్టారు. అలాంటి వారిని దూరం చేసుకుంటే మెట్రోపాలిటన్ నగరాల నుంచి చిన్న పట్టణాల వరకు అమెరికాలోని అనేక వర్గాలపై తీవ్ర ప్రతికూల ప్రభావం పడుతుంది" అని ఇండియాస్పోరా ఎగ్జిక్యూటివ్ డైరెక్టర్ సంజీవ్ జోషీపురా పేర్కొన్నారు.

భారం కానున్న ప్రతిపాదనలు ఇవే..

విదేశీ నిపుణులు అమెరికాలో పనిచేయకుండా నిరోధించేలా, యజమానులపై అదనపు ఆర్థిక భారం మోపేలా ప్రస్తుతం పలు విధానపరమైన మార్పులను ప్రతిపాదించారు.

హైటెక్, హెల్త్‌కేర్ రంగాల్లో విదేశీ ఉద్యోగులను నియమించుకునే కంపెనీలకు దాఖలు రుసుమును (Petition Fee) ఏకంగా 1,00,000 డాలర్ల కంటే ఎక్కువగా పెంచేందుకు యోచిస్తున్నారు. ఇప్పటివరకు ఉన్న లాటరీ విధానం స్థానంలో వేతనాల ప్రాతిపదికన (Wage-weighted selection) హెచ్-1బీ ఎంపిక ప్రక్రియను తీసుకురావాలని భావిస్తున్నారు. దీనివల్ల తమ కెరీర్ ప్రారంభంలో ఉన్న కొత్త గ్రాడ్యుయేట్లకు తీవ్ర అన్యాయం జరుగుతుందని ఇండియాస్పోరా ఆందోళన వ్యక్తం చేసింది.

దీంతోపాటు ఉద్యోగం కోల్పోయిన విదేశీ ఉద్యోగులకు ఇచ్చే 60 రోజుల గ్రేస్ పీరియడ్‌ను రద్దు చేయడం, హెచ్-1బీ వీసాదారుల భాగస్వాములకు (H-4 వీసాదారులు) ఇచ్చే ఉపాధి అనుమతి పత్రాలను (EAD) నిలిపివేయడం వంటి నిబంధనలు వారి జీవితాలను అంధకారంలోకి నెడతాయని తెలిపింది. అంతేకాకుండా అంతర్జాతీయ విద్యార్థులు చదువు పూర్తయ్యాక పనిచేసే ఆప్షనల్ ప్రాక్టికల్ ట్రైనింగ్ (OPT), స్టెమ్ (STEM) ఓపీటీ పొడిగింపుపై 70,000 డాలర్ల వరకు భారీ రుసుము విధించే ప్రతిపాదనలపై నిరసన తెలిపింది.

గ్రామీణ ప్రాంతాల్లో సేవలపై దెబ్బ

ఈ ఆంక్షల ప్రభావం కేవలం బహుళజాతి ఐటీ కంపెనీలకే పరిమితం కాదని, గ్రామీణ ప్రాంతాల్లో అత్యవసర సేవలు అందించే వర్గాలపై కూడా తీవ్రంగా ఉంటుందని ఇండియాస్పోరా వివరించింది. అమెరికా స్థానిక నిపుణులు ముందుకు రాని మిస్సిస్సిప్పి డెల్టా వంటి వెనుకబడిన ప్రాంతాల్లో విదేశీ వైద్యులు, ఉపాధ్యాయులే సేవలు అందిస్తున్నారని గుర్తుచేసింది.

అంతర్జాతీయ నైపుణ్యాన్ని నిరోధిస్తే ఇప్పటికే కొరతగా ఉన్న ఆయా రంగాల్లో సిబ్బంది లేమి మరింత పెరుగుతుందని హెచ్చరించింది. స్వదేశీ ఆర్థిక సమస్యలకు విదేశీ ఉద్యోగులను బలిపశువులను చేయడం తగదని, రాజకీయ ప్రయోజనాల కోసం భారత సంతతి నిపుణులను లక్ష్యంగా చేసుకోవడం వల్ల భారత్-అమెరికా ద్వైపాక్షిక సంబంధాలు దెబ్బతినే ప్రమాదం ఉందని పేర్కొంది.