దుబాయ్ ఐఫోన్ 18 ప్రో సీజ్: కొచ్చి ఎయిర్‌పోర్ట్‌లో ప్యాసింజర్ నిరసన

దుబాయ్ నుంచి తెచ్చిన ఐఫోన్ 18 ప్రోను కస్టమ్స్ అధికారులు సీజ్ చేయడంతో కొచ్చి విమానాశ్రయంలో ఓ వ్యక్తి నిరసనకు దిగాడు. వ్యక్తిగత వినియోగానికి తెచ్చుకున్న ఫోన్‌కు సుంకం చెల్లించేది లేదంటూ బైఠాయించడంతో పోలీసులు కేసు నమోదు చేశారు.

దుబాయ్‌లో కొనుగోలు చేసిన కొత్త ఐఫోన్ 18 ప్రో (iPhone 18 Pro) మొబైల్‌కు కస్టమ్స్ డ్యూటీ చెల్లించేందుకు నిరాకరించిన ఓ ప్రవాస భారతీయుడు కొచ్చిలోని నెడుంబస్సేరి విమానాశ్రయంలో వినూత్న నిరసనకు దిగాడు. అధికారులు తన వద్ద ఉన్న ఐఫోన్‌ను జప్తు చేయడంతో విమానాశ్రయంలోనే బైఠాయించి ఆందోళన చేపట్టాడు.

దుబాయ్ ఐఫోన్ 18 ప్రో సీజ్: కొచ్చి ఎయిర్‌పోర్ట్‌లో ప్యాసింజర్ నిరసన (ప్రతీకాత్మక చిత్రం)

ఎడ్యుపోర్ట్ (Eduport) లెర్నింగ్ ప్లాట్‌ఫామ్ వ్యవస్థాపకుడు అజాస్ మహమ్మద్ ఇటీవల దుబాయ్ నుంచి కొచ్చి విమానాశ్రయానికి చేరుకున్నారు. ఈ క్రమంలో ఆయన వెంట తెచ్చుకున్న కొత్త ఐఫోన్ 18 ప్రోను కస్టమ్స్ అధికారులు తనిఖీ చేశారు. ఫోన్‌పై కస్టమ్స్ సుంకం చెల్లించాలని సూచించగా.. అది తన సొంత వినియోగం కోసమే తెచ్చుకున్నానని, డ్యూటీ కట్టేది లేదని అజాస్ తేల్చి చెప్పారు.

అన్యాయంగా ఒక్క రూపాయి కూడా చెల్లించను

కస్టమ్స్ నిబంధనలపై అజాస్ తీవ్ర అసంతృప్తి వ్యక్తం చేశారు. "అన్యాయంగా ఒక్క రూపాయి కూడా కస్టమ్స్ సుంకం చెల్లించను" అని ఆయన స్పష్టం చేశారు. మిగిలిన ప్రయాణికులు ఐఫోన్ ప్రో మోడళ్లపై రూ. 20,000 నుంచి రూ. 30,000 వరకు సుంకం చెల్లిస్తున్నారని, కానీ తాను మాత్రం నిబంధనలకు విరుద్ధంగా డబ్బులు కట్టనని భీష్మించుకూర్చున్నారు. ఫోన్ తిరిగి ఇచ్చేంతవరకు ప్రశాంతంగా నిరసన తెలుపుతానని ప్రకటించారు.

సమాచారం అందుకున్న సెంట్రల్ ఇండస్ట్రియల్ సెక్యూరిటీ ఫోర్స్ (సిఐఎస్‌ఎఫ్) బలగాలు ఆయనను అక్కడి నుంచి బలవంతంగా ఖాళీ చేయించాయి. అధికారుల విధులకు ఆటంకం కలిగించారనే ఆరోపణలపై నెడుంబస్సేరి పోలీసులు అజాస్‌పై కేసు నమోదు చేశారు.

కస్టమ్స్ వర్గాల వాదన ఏమిటంటే?

అజాస్ వాదనను కస్టమ్స్ అధికారులు తోసిపుచ్చారు. ఆయన వద్ద ఇప్పటికే మరొక ఐఫోన్ ఉందని, కొత్తగా తెచ్చిన ఫోన్ రిజిస్టర్ కూడా కాలేదని అధికారులు తెలిపారు. ప్రయాణికులు ఇప్పటికే కొంతకాలంగా ఉపయోగిస్తున్న పాత ఫోన్లకు మాత్రమే మినహాయింపులు వర్తిస్తాయని స్పష్టం చేశారు.

రూ. 75,000 దాటితే సుంకం వర్తిస్తుందని కస్టమ్స్ సిబ్బంది చెప్పగా.. అంతకంటే ఎక్కువ విలువైన ఐఫోన్లను విదేశాల నుంచి భారత్‌కు ఎలా తీసుకురావాలని అజాస్ ప్రశ్నించారు.

నిబంధనలు ఏం చెబుతున్నాయి?

బ్యాగేజ్ రూల్స్ 2026 నిబంధనల ప్రకారం అర్హులైన ప్రయాణికులు రూ. 75,000 విలువైన వస్తువులను పన్ను లేకుండా భారత్‌కు తీసుకురావచ్చు. అయితే ఇందుకు కొన్ని షరతులు వర్తిస్తాయి. ప్రయాణికుడి వ్యక్తిగత అవసరాల కోసం ఉపయోగించే రోజువారీ వస్తువులకు (వాడినవి) మాత్రమే పరిమితి లేని ఉచిత సుంకం మినహాయింపు ఉంటుంది. కొత్తగా కొనుగోలు చేసిన ఖరీదైన ఎలక్ట్రానిక్ పరికరాలకు పరిమితికి మించి విలువ ఉంటే కస్టమ్స్ సుంకం చెల్లించాల్సిందేనని అధికారులు పునరుద్ఘాటించారు.