సీబీఎస్‌ఈ నూతన ఛైర్మన్‌గా మన్‌దీప్ భండారీ నియామకం.. 4 నెలల్లోమూడో సారథి

డిజిటల్ మూల్యాంకన వివాదం నేపథ్యంలో సీబీఎస్‌ఈ నూతన ఛైర్మన్‌గా సీనియర్ ఐఏఎస్ అధికారి మన్‌దీప్ కే భండారీని కేంద్ర ప్రభుత్వం నియమించింది. గత నాలుగు నెలల్లో ఈ పదవిలో ముగ్గురు అధికారులు మారడం గమనార్హం.

సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్‌ఈ) కొత్త ఛైర్మన్‌గా సీనియర్ ఐఏఎస్ అధికారి మన్‌దీప్ కే భండారీని కేంద్ర ప్రభుత్వం నియమించింది. డిజిటల్ మూల్యాంకన ప్రక్రియలో (ఆన్-స్క్రీన్ మార్కింగ్ - OSM) అక్రమాలు జరిగాయన్న ఆరోపణలతో వివాదం తలెత్తిన నాటి నుంచి, గత నాలుగు నెలల వ్యవధిలోనే సీబీఎస్‌ఈకి మూడో ఛైర్మన్‌ను నియమించడం ప్రాధాన్యం సంతరించుకుంది. ఇప్పటివరకు అదనపు బాధ్యతలు నిర్వహించిన లోఖండే ప్రశాంత్ సీతారామ్ స్థానంలో భండారీ పూర్తిస్థాయి బాధ్యతలు స్వీకరించనున్నారు.

సీబీఎస్‌ఈ నూతన ఛైర్మన్‌గా మన్‌దీప్ భండారీ నియామకం.. 4 నెలల్లోమూడో సారథి

కేంద్ర సిబ్బంది, శిక్షణ శాఖ (డీఓపీటీ) పరిధిలోని క్యాబినెట్ నియామకాల కమిటీ (ఏసీసీ) సెప్టెంబర్ 25న ఈ మేరకు ఉత్తర్వులు జారీ చేసింది. కేంద్ర విద్యా మంత్రిత్వ శాఖ పరిధిలోని సీబీఎస్‌ఈ ఛైర్మన్ పోస్టును తాత్కాలికంగా అదనపు కార్యదర్శి హోదాకు అప్‌గ్రేడ్ చేస్తూ, ఏజీఎమ్‌యూటీ (AGMUT) క్యాడర్‌కు చెందిన 2001 బ్యాచ్ ఐఏఎస్ అధికారి మన్‌దీప్ కే భండారీని నియమిస్తున్నట్లు ఉత్తర్వుల్లో స్పష్టం చేసింది.

వైద్యుడి నుంచి ఐఏఎస్ అధికారిగా..

పంజాబ్‌కు చెందిన మన్‌దీప్ భండారీ వృత్తిరీత్యా వైద్యుడు (ఎంబీబీఎస్). సీబీఎస్‌ఈ ఛైర్మన్‌గా ఎంపిక కాకముందు ఆయన జమ్మూకశ్మీర్ లెఫ్టినెంట్ గవర్నర్‌కు ప్రిన్సిపల్ సెక్రటరీగా, అలాగే శ్రీ అమర్‌నాథ్‌జీ ష్రైన్ బోర్డు సీఈఓగా అదనపు బాధ్యతలు నిర్వర్తించారు. 2023 మార్చి 6న ఆయన జమ్మూకశ్మీర్ ఎల్జీ ప్రిన్సిపల్ సెక్రటరీగా నియమితులయ్యారు.

గతంలో 2009 నుంచి 2018 వరకు సుదీర్ఘకాలం పాటు దేశంలోనే అతిపెద్ద ధార్మిక సంస్థల్లో ఒకటైన శ్రీమాతా వైష్ణోదేవి ష్రైన్ బోర్డు అదనపు సీఈఓగా సేవలు అందించారు. అనంతరం 2018 జనవరిలో కేంద్ర ప్రభుత్వంలోకి ప్రవేశించి, కేంద్ర ఉన్నత విద్యా శాఖ మంత్రి వద్ద ప్రైవేట్ సెక్రటరీగా పనిచేసారు. ఆ తర్వాత 2018 సెప్టెంబర్ నుంచి 2023 జనవరి వరకు నాలుగేళ్లకు పైగా కేంద్ర ఆరోగ్య, కుటుంబ సంక్షేమ శాఖలో జాయింట్ సెక్రటరీగా కీలక విధాన నిర్ణయాల్లో పాలుపంచుకున్నారు.

నాలుగు నెలల్లో ముగ్గురు ఛైర్మన్లు

2026 బోర్డు పరీక్షల జవాబు పత్రాల డిజిటల్ మూల్యాంకనం (ఆన్-స్క్రీన్ మార్కింగ్ - OSM) ప్రక్రియలో తీవ్ర అక్రమాలు, సాంకేతిక లోపాలు చోటుచేసుకున్నాయంటూ మూల్యాంకనదారులు, అధికారుల నుంచి ఫిర్యాదులు వెల్లువెత్తాయి. పేపర్లు స్కాన్ సరిగా కాకపోవడం వల్ల 12వ తరగతి విద్యార్థుల మార్కుల్లో వ్యత్యాసాలు రావడం, సాఫ్ట్‌వేర్ కొనుగోలులో నిబంధనలు ఉల్లంఘించారన్న ఆరోపణలు రావడంతో ప్రభుత్వం తీవ్రంగా పరిగణించింది.

ఈ వివాదంపై సమగ్ర విచారణ కోసం మాజీ కేంద్ర కార్యదర్శి ఎస్.రాధా చౌహాన్‌తో ఏకసభ్య విచారణ కమిటీని కూడా వేసింది. బోర్డు ప్రతిష్ట దెబ్బతినకుండా ఉండేందుకు సీబీఎస్‌ఈ అగ్ర నాయకత్వాన్ని ప్రభుత్వం వరుసగా ప్రక్షాళన చేస్తూ వస్తోంది.