Hyundai Venue : కొత్త హ్యుందాయ్​ వెన్యూకి పాత వర్షెన్​కి తేడా ఏంటి?

న్యూ హ్యుందాయ్ వెన్యూను సంస్థ తాజాగా ప్రదర్శించింది. డిజైన్, ఇంటీరియర్స్‌లో భారీ మార్పులు కనిపిస్తున్నాయి. ఈ నేపథ్యంలో కొత్త వర్షెన్​కి పాత వర్షెన్​కి మధ్య ఉన్న తేడాలను ఇక్కడ తెలుసుకోండి..

సెకడ్ జనరేషన్ హ్యుందాయ్ వెన్యూ కాంపాక్ట్ ఎస్‌యూవీ మోడల్‌ను దిగ్గజ ఆటోమొబైల్​ సంస్థ భారత్‌లో తాజాగా ఆవిష్కరించింది. నవంబర్ 4న దీని ధరలను ప్రకటించనున్నారు. ఈ కొత్త వెన్యూ ఇప్పుడు మరింత బోల్డ్‌గా, గ్లోబల్ లుక్‌తో కనిపిస్తోంది. దీని ఇంటీరియర్‌ను పూర్తిగా మార్చేశారు! అయితే, ఇందులో ఇంజిన్ ఆప్షన్లు మాత్రం పాత మోడల్‌లో ఉన్నవే కొనసాగుతున్నాయి. ఈ నేపథ్యంలో పాత మోడల్‌తో పోలిస్తే కొత్త వెన్యూ ఎలా ఉందో ఇక్కడ తెలుసుకోండి..

కొత్త హ్యుందాయ్​ వెన్యూకి పాతదానికి తేడా ఏంటి?

హ్యుందాయ్​ వెన్యూ- డిజైన్‌లో కొత్తదనం ఏంటి?

కొత్త హ్యుందాయ్ వెన్యూ తన పాత మోడల్ సిల్హౌట్‌ను నిలుపుకున్నప్పటికీ, దాని మృదువైన ఎడ్జెస్​ని తొలగించి, కంపెనీ లేటెస్ట్ గ్లోబల్ ఎస్‌యూవీల స్ఫూర్తితో మరింత నిటారుగా, మస్క్యులర్​గా ఉండే డిజైన్‌ను తీసుకువచ్చింది.

ముందు భాగం: ఇప్పుడు ఫుల్-విడ్త్ ఎల్​ఈడీ లైట్ బార్ ఒకటి బోనెట్ లైన్ గుండా వెళుతూ, రెండు వైపులా అంచుల్లో ఉన్న కొత్తగా డిజైన్ చేసిన క్వాడ్ ఎల్​ఈడీ హెడ్‌ల్యాంప్‌లను కలుపుతుంది. ఫ్రంట్ గ్రిల్ పరిమాణం పెరిగింది, మరింత గట్టి ప్యాటర్న్‌తో పాటు సిల్వర్-యాక్సెంట్ బంపర్‌ను కలిగి ఉంది.

పక్క భాగం: పక్క నుంచి చూస్తే, ఈ ఎస్‌యూవీ మరింత రగ్గెడ్‌గా కనిపిస్తుంది. దీనికి కారణం స్క్వేర్-ఆఫ్ వీల్ ఆర్చెస్, కొత్త 16-ఇంచ్​ అల్లాయ్ వీల్స్, మందపాటి క్లాడింగ్.

వెనుక భాగం: వెనుకవైపు, హ్యుందాయ్ లోగో ఇప్పుడు బ్లాక్-ప్యాటర్న్ టెయిల్‌ల్యాంప్‌లను కలిపే కనెక్టెడ్ ఎల్​ఈడీ లైట్ స్ట్రిప్ పైన ఉంది. స్పోర్టి డీటైలింగ్‌తో రీషేప్ చేసిన బంపర్ వెన్యూ రీడిజైన్డ్ రూపాన్ని పూర్తి చేస్తుంది.

కొత్త వెన్యూ పరిమాణం ఎంత పెరిగింది?

న్యూ జెన్​ వెన్యూ మునుపటి కంటే గణనీయంగా పెద్దగా ఉంది. ఇది మెరుగైన నిష్పత్తులతో పాటు ఎక్కువ క్యాబిన్ స్థలాన్ని అందిస్తుంది. కొత్త వెన్యూ కొలతలు ఇలా ఉన్నాయి:

డైమెన్షన్స్​	పాత వెన్యూ (ఎంఎం)	కొత్త వెన్యూ (ఎంఎం)	వ్యత్యాసం (ఎంఎం)
ఎత్తు	1,617	1,665	+48
వెడల్పు	1,770	1,800	+30
వీల్​బేస్​	2,500	2,520	+20

ఈ వెన్యూ ఎస్​యూవీలో కొత్తగా వెనుక క్వార్టర్ గ్లాస్ సెక్షన్, ఎక్కువ ఎత్తు ఉండటం వల్ల దీని రోడ్ ప్రెజెన్స్ మరింత ఆత్మవిశ్వాసంతో కూడినదిగా కనిపిస్తుంది.

హ్యుందాయ్​ వెన్యూ- ఇంటీరియర్ ఎలా మారింది?

లోపల, వెన్యూలో జరిగిన మార్పులు మరింత ఆకర్షణీయంగా ఉన్నాయి! కొత్త క్యాబిన్ డిజైన్ మరింత ఫ్లాట్‌గా, టెక్-కేంద్రీకృతమై ఉంది. రెండు 12.3-ఇంచ్​ డిస్‌ప్లేలను అనుసంధానించే ఒకే వంపు తిరిగిన గ్లాస్ ప్యానెల్‌తో డాష్‌బోర్డ్ ఆకట్టుకుంటుంది. ఒకటి ఇన్ఫోటైన్‌మెంట్ సిస్టమ్ కోసం, మరొకటి డిజిటల్ ఇన్‌స్ట్రుమెంట్ క్లస్టర్ కోసం పని చేస్తుంది.

డాష్‌బోర్డ్: పాత గుండ్రటి ఎయిర్ వెంట్‌ల స్థానంలో స్లిమ్, వెంట్‌లతో పాటు డాష్‌బోర్డ్‌ను పునఃరూపకల్పన చేశారు.

స్టీరింగ్ వీల్: హ్యుందాయ్ తన ఎలక్ట్రిక్ వాహనాల స్ఫూర్తితో బ్యాక్‌లిట్ ఎలిమెంట్స్‌తో కూడిన కొత్త త్రీ-స్పోక్ ఫ్లాట్-బాటమ్ స్టీరింగ్ వీల్‌ను కూడా జోడించింది.

క్లైమేట్ కంట్రోల్: క్లైమేట్ కంట్రోల్ సిస్టమ్ ఇప్పుడు టచ్-ఆధారిత ఇంటర్‌ఫేస్‌ను కలిగి ఉంది, ఇది రోటరీ నాబ్‌ల స్థానంలో వచ్చి, ఆధునిక రూపాన్ని పెంచింది.

హ్యుందాయ్​ వెన్యూ- కొత్త ఫీచర్లు ఏమున్నాయి?

హ్యుందాయ్ ఈ రెండొవ తరం వెన్యూలో అనేక కొత్త సౌకర్యాలు, టెక్నాలజీలను చేర్చింది:

సౌకర్యం: వెనుక సీట్లలో ప్రయాణికుల కోసం ఇప్పుడు రెండు-దశల రిక్లైన్ ఫంక్షన్​తో పాటు కిటికీలకు సన్‌షేడ్లు లభిస్తున్నాయి. వీల్‌బేస్ కొంచెం పెరగడంతో లెగ్‌రూమ్ కూడా కొద్దిగా మెరుగుపడింది. వెనుక డోర్లు వెడల్పుగా ఉండటం వల్ల లోపలికి ఎక్కడం, దిగడం సులభంగా ఉంటుంది.

టెక్నాలజీ: సెంటర్ కన్సోల్‌ను కూడా రీడిజైన్ చేశారు. ఇందులో వెంటిలేటెడ్ సీట్లు, డ్రైవ్, ట్రాక్షన్ మోడ్‌లు, ఎలక్ట్రానిక్ పార్కింగ్ బ్రేక్ కోసం కొత్త నియంత్రణలు ఉన్నాయి. ఇవన్నీ వెన్యూలో మొదటిసారిగా వస్తున్నాయి.

అదనపు ఫీచర్లు: ఈ మోడల్‌కు ఫ్రంట్ పార్కింగ్ సెన్సార్లు, డాష్‌బోర్డ్, కన్సోల్ చుట్టూ యాంబియంట్ లైటింగ్ కూడా లభించాయి.

హ్యుందాయ్​ వెన్యూ- ఇంజిన్ ఆప్షన్లలో మార్పులు ఉన్నాయా?

• లేదు! హ్యుందాయ్ పాత మోడల్‌లో ఉన్న పవర్‌ట్రైన్ లైనప్‌నే కొత్త వెన్యూలోనూ కొనసాగించింది. 2026 వెన్యూలోనూ ఈ మూడు ఇంజిన్ ఆప్షన్లు లభిస్తాయి:
• 1.2-లీటర్ పెట్రోల్ (మాన్యువల్ గేర్‌బాక్స్‌తో)
• 1.0-లీటర్ టర్బో-పెట్రోల్ (ఐఎంటీ లేదా డీసీటీ ఆప్షన్లతో)
• 1.5-లీటర్ డీజిల్ (మాన్యువల్, ఆటోమేటిక్ గేర్‌బాక్స్‌తో)

పనితీరు గణాంకాలు ఇవే అయినప్పటికీ, హ్యుందాయ్ ఇంజిన్‌లో చిన్నపాటి మార్పులు చేసి ఉండవచ్చని అంచనా.

సరికొత్త హ్యుందాయ్​ వెన్యూ బుకింగ్‌లు ప్రారంభమయ్యాయి. నవంబర్ 4న ధరలు వెల్లడవుతాయి. ఆ తర్వాత ఈ సంవత్సరం చివరిలో డెలివరీలు ప్రారంభం కానున్నాయి.