E-Paper
ఓలా సీఈఓ భవిష్ అగర్వాల్పై కేసు: ఉద్యోగి సూసైడ్ నోట్లో సంచలన ఆరోపణలు
ఓలా ఎలక్ట్రిక్ సీఈఓ భవిష్ అగర్వాల్, సుబ్రత కుమార్ దాస్పై ఉద్యోగి ఆత్మహత్య కేసులో ఎఫ్ఐఆర్ నమోదైంది. మృతుడి 28 పేజీల సూసైడ్ నోట్లో తీవ్ర మానసిక వేధింపుల ఆరోపణలు ఉన్నాయి. ఓలా ఈ ఆరోపణలను ఖండిస్తూ, హైకోర్టును ఆశ్రయించింది. కేసు దర్యాప్తు కొనసాగుతోంది.
ఓలా ఎలక్ట్రిక్ సంస్థలో పని చేసే ఒక సీనియర్ ఉద్యోగి ఆత్మహత్య కేసు ఇప్పుడు దేశవ్యాప్తంగా కలకలం రేపుతోంది. కంపెనీ ఉన్నతాధికారులైన సీఈఓ భవిష్ అగర్వాల్, మరో సీనియర్ అధికారి సుబ్రత కుమార్ దాస్లపై బెంగళూరు పోలీసులు కేసు నమోదు చేశారు. సెప్టెంబర్ 28న అకస్మాత్తుగా మరణించిన 38 ఏళ్ల ఉద్యోగి ఆత్మహత్యకు వీరే కారణమని కుటుంబ సభ్యులు ఆరోపిస్తున్నారు.
సూసైడ్ నోట్తో కేసులో కీలక మలుపు
బెంగళూరులోని సుబ్రహ్మణ్యపుర పోలీస్ స్టేషన్లో అక్టోబర్ 6న ఈ మేరకు ఎఫ్ఐఆర్ నమోదైంది. మృతుడి కుటుంబ సభ్యులు ఇచ్చిన ఫిర్యాదు ఆధారంగా పోలీసులు కేసు పెట్టారు. ఆ ఫిర్యాదులో, చనిపోయిన ఉద్యోగి ఇంట్లో 28 పేజీల సూసైడ్ నోట్ లభించిందని కుటుంబ సభ్యులు పేర్కొన్నారు.
ఈ లేఖలో... ఉద్యోగిని మానసికంగా వేధించారని, పని ఒత్తిడికి గురిచేశారని, తన ఆత్మహత్యకు భవిష్ అగర్వాల్, సుబ్రత కుమార్ దాస్లే కారణమని స్పష్టంగా పేర్కొన్నారని తెలుస్తోంది.
మృతుడు ఓలా ఎలక్ట్రిక్లోని హోమోలోగేషన్ ఇంజనీరింగ్ విభాగంలో ఇంజనీర్గా పనిచేశాడు. మొదట్లో, పోలీసులు దీనిని సహజ మరణంగానే (Unnatural Death Report - UDR) నమోదు చేశారు. అయితే, ఆ తర్వాత కుటుంబ సభ్యులు లేఖను సమర్పించడంతో కేసు దర్యాప్తు పూర్తిగా మారిపోయింది.
కుటుంబానికి అందిన భారీ మొత్తం.. అనుమానాలు!
ఉద్యోగి మరణించిన రెండు రోజుల తర్వాత, అతని బ్యాంక్ ఖాతాలో కంపెనీ నుంచి ₹17.46 లక్షల రూపాయలు జమ అయ్యాయి. ఈ ఊహించని నగదు బదిలీపై కుటుంబ సభ్యులకు అనుమానం కలిగింది. వారు హెచ్ఆర్ విభాగంతో సహా కంపెనీ అధికారులను సంప్రదించగా, వారికి సంతృప్తికరమైన సమాధానాలు దొరకలేదు. దీంతో వారి అనుమానాలు మరింత బలపడ్డాయి. ఆ తర్వాతే వారు మృతుడి వస్తువులను మళ్ళీ తనిఖీ చేయగా, అందులో ఈ సంచలనాత్మక 28 పేజీల సూసైడ్ నోట్ దొరికింది.
“మృతుడి కుటుంబం నుంచి సూసైడ్ నోట్ కాపీ అందిన తర్వాత, మేము అక్టోబర్ 6న ఎఫ్ఐఆర్ నమోదు చేశాం” అని సుబ్రమణ్యపుర పోలీస్ ఇన్స్పెక్టర్ ఎం. రాజు ఒక ప్రముఖ మీడియాకు తెలిపారు. “నిందితులు ఇందులో ఎలాంటి నిజం లేదంటూ ఎఫ్ఐఆర్ను కొట్టివేయాలని హైకోర్టును ఆశ్రయించారు. అక్టోబర్ 18న నిందితులపై ఎలాంటి బలవంతపు చర్యలు తీసుకోవద్దని కోర్టు మాకు ఆదేశాలు ఇచ్చింది. మేము నిందితులకు ఇప్పటికే నోటీసులు జారీ చేశాం, కోర్టు ఆదేశాల మేరకు తగిన చర్యలు తీసుకుంటాం” అని ఆయన వివరించారు.
సూసైడ్ నోట్లో వేధింపుల పర్వం
ఆ అరవింద్ రాసిన లేఖలో, తాను తీవ్రమైన పని ఒత్తిడికి గురవుతున్నట్లు, సీనియర్ అధికారులు తన జీతం, ఇతర ప్రయోజనాలు నిలిపివేశారని, తరచుగా అవమానాలకు గురిచేశారని పేర్కొన్నారు. ఉన్నతాధికారుల వేధింపులను, ఒత్తిడిని భరించలేకనే తన జీవితాన్ని ముగిస్తున్నట్లు ఆ లేఖలో స్పష్టంగా రాశారు. ఈ కేసులో పోలీసులు ఆత్మహత్యకు ప్రేరేపించడం, మానసిక వేధింపులకు సంబంధించిన బీఎన్ఎస్ 108 సెక్షన్ల కింద కేసు నమోదు చేశారు. త్వరలో కంపెనీ సీనియర్ అధికారులను ప్రశ్నించే అవకాశం ఉంది.
ఆరోపణలను ఖండించిన ఓలా ఎలక్ట్రిక్
మరోవైపు, ఓలా ఎలక్ట్రిక్ సంస్థ తమ ఉద్యోగి మృతి పట్ల సంతాపం వ్యక్తం చేస్తూ, ఈ ఆరోపణలను ఖండించింది. “మా సహోద్యోగి దురదృష్టకర మరణం పట్ల మేము తీవ్రంగా చింతిస్తున్నాం. ఈ కష్ట సమయంలో మా ఆలోచనలు వారి కుటుంబ సభ్యులకు తోడుగా ఉంటాయి. ఆయన మూడున్నర సంవత్సరాలుగా ఓలా ఎలక్ట్రిక్లో పనిచేస్తున్నారు. తన ఉద్యోగ కాలంలో, ఆయన ఎప్పుడూ ఫిర్యాదు కానీ, వేధింపులకు గురైనట్లు గానీ మా దృష్టికి తీసుకురాలేదు. అంతేకాక, ఆయన పాత్రలో కంపెనీ ప్రమోటర్తో సహా ఉన్నత స్థాయి యాజమాన్యంతో ప్రత్యక్షంగా సంభాషించే అవకాశం లేదు” అని కంపెనీ ఒక ప్రకటనలో పేర్కొంది.
తమ వ్యవస్థాపకుడు, ఇతర అధికారులపై నమోదు చేసిన ఎఫ్ఐఆర్ను సవాలు చేస్తూ కర్ణాటక హైకోర్టును ఆశ్రయించినట్లు ఓలా తెలిపింది. ఓలా ఎలక్ట్రిక్, దాని అధికారులకు అనుకూలంగా రక్షణ ఉత్తర్వులు జారీ అయినట్లు కూడా ఆ ప్రకటనలో వివరించింది.
“కుటుంబానికి తక్షణ మద్దతుగా, కంపెనీ పూర్తి ఫుల్ అండ్ ఫైనల్ సెటిల్మెంట్ (Full and Final Settlement)ను వారి ఖాతాలో జమ చేసింది. కొనసాగుతున్న దర్యాప్తులో ఓలా ఎలక్ట్రిక్ అధికారులకు పూర్తిగా సహకరిస్తుంది. ఉద్యోగులందరికీ సురక్షితమైన, గౌరవప్రదమైన కార్యాలయాన్ని అందించడానికి కట్టుబడి ఉంది” అని కంపెనీ ప్రతినిధి తెలిపారు.
