Sanju Samson: సెల్ఫీ అడిగిన అభిమానికి రూ.40 వేల విలువైన ఫోన్ గిఫ్ట్‌గా సంజూ శాంసన్.. నువ్వు గొప్పోడివి బాసూ..

Sanju Samson: సంజూ శాంసన్ గొప్ప క్రికెటరే కాదు.. అంతకన్నా గొప్ప మనసున్న మనిషి అని మరోసారి నిరూపించుకున్నాడు. తనను సెల్ఫీ అడిగిన ఓ అభిమానికి ఏకంగా రూ.40 వేల విలువైన మొబైల్ ఫోన్ గిఫ్ట్ గా ఇచ్చాడు. ఇంతకీ అతడు అలా ఎందుకు చేశాడో తెలుసా?

Sanju Samson: క్రికెట్ మైదానంలో తన క్లాస్ ఇన్నింగ్స్‌లతో అలరించే టీమిండియా స్టార్ వికెట్ కీపర్ బ్యాటర్ సంజూ శాంసన్.. తాజాగా తన ఉదారతతో అందరి మనసు గెలుచుకున్నాడు. సెల్ఫీ అడిగేందుకు వచ్చిన ఓ సామాన్య అభిమాని ఫోన్ డిస్‌ప్లే పగిలిపోయి ఉండటాన్ని గమనించిన సంజూ.. తనే స్వయంగా ఒక ఖరీదైన స్మార్ట్‌ఫోన్‌ను బహుమతిగా ఇచ్చి అందరినీ ఆశ్చర్యపరిచాడు. కేరళలోని పాలక్కాడ్ సమీపంలో ఇది జరిగింది. ఇది సోషల్ మీడియాలో వైరల్ కావడంతో నువ్వు గొప్పోడివి బాసూ అంటూ ఫ్యాన్స్ అతన్ని పొగడ్తల్లో ముంచెత్తుతున్నారు.

Sanju Samson: సెల్ఫీ అడిగిన అభిమానికి రూ.40 వేల విలువైన ఫోన్ గిఫ్ట్‌గా సంజూ శాంసన్.. నువ్వు గొప్పోడివి బాసూ..

అసలేం జరిగిందంటే?

పాలక్కాడ్ జిల్లాలోని కడంపజిపురంకు చెందిన శబరీష్ అనే యువకుడు ఒక కేబుల్ టెక్నీషియన్.. అంతేకాదు స్థానిక క్రికెట్ క్లబ్‌లో వికెట్ కీపర్. మంగళవారం (ఏప్రిల్ 7) సాయంత్రం అతను తన స్నేహితుడు మణికంఠన్‌తో కలిసి క్రికెట్ ఆడేందుకు మైదానానికి వెళ్తుండగా.. ముందూరు-తూత రోడ్డులోని పుంజాపాడం బస్ స్టాప్ వద్ద ఒక బ్లాక్ రేంజ్ రోవర్ కారు ఆగి ఉండటాన్ని గమనించారు. ఆ కారులో ఉన్నది తన అభిమాన క్రికెటర్ సంజూ అని గుర్తించిన శబరీష్, ఒక్కసారిగా ఉబ్బితబ్బిబ్బయ్యాడు.

అప్పుడు సంజూ వీడియో కాల్‌లో ఉండటంతో, కాసేపు వేచి ఉండాలని సైగ చేశాడు. కాల్ ముగిసిన తర్వాత సంజూ స్వయంగా కారు దిగి వచ్చి వారితో మాట్లాడాడు. ఆ ఆనందంలో శబరీష్ తన మొబైల్ తీసి సెల్ఫీ అడిగాడు. అయితే శబరీష్ వాడుతున్న ఫోన్ డిస్‌ప్లే పగిలిపోయి ఉండటంతో ఫోటో సరిగ్గా రావడం లేదని సంజూ గమనించాడు.

కారు డిక్కీ తీసి.. సరికొత్త ఫోన్ ఇచ్చి..

"నీ ఫోన్ డిస్‌ప్లే పాడైంది కదా.." అని అడిగిన సంజూ.. వెంటనే తన కారు డిక్కీ తెరిచి లోపల ఉన్న ఒక సరికొత్త స్మార్ట్‌ఫోన్ బాక్స్‌ను తీశారు. ఏమాత్రం సంకోచించకుండా దాన్ని శబరీష్‌కు అందిస్తూ.. "ఇది నీ దగ్గరే ఉంచుకో.. నీ ఫోన్ పాడైపోయింది కదా" అని చెప్పాడు.

సుమారు రూ. 40,000 విలువ చేసే ఆ ఫోన్‌ను చూసి శబరీష్ మొదట సంశయించినా, సంజూ పట్టుబట్టడంతో ఆనందంతో స్వీకరించాడు. వెళ్తూ వెళ్తూ "క్రికెట్ బాగా ఆడు" అని ఆ కుర్రాడికి ధైర్యం చెప్పి సంజూ తన ప్రయాణాన్ని కొనసాగించాడు.

మైదానంలో కష్టాలు.. బయట మాత్రం ‘రాజా’

ప్రస్తుతం సంజూ శాంసన్ ఐపీఎల్ 2026లో చెన్నై సూపర్ కింగ్స్ (CSK) తరపున ఆడుతున్నాడు. సీజన్ ఆరంభంలో వరుసగా మూడు ఓటములతో చెన్నై జట్టు ఇబ్బందుల్లో ఉండగా.. సంజూ కూడా బ్యాటింగ్‌లో ఆశించిన మేర రాణించలేకపోతున్నాడు.

అయినప్పటికీ మైదానం వెలుపల తన మంచి మనసుతో సంజూ కురిపిస్తున్న ఈ ‘ప్రేమ’ చూసి నెటిజన్లు ఫిదా అవుతున్నారు. "స్క్రీన్‌ మీద కంటే రియల్ లైఫ్ లో సంజూ పెద్ద హీరో" అంటూ సోషల్ మీడియాలో ప్రశంసల జల్లు కురుస్తోంది.

తరచుగా అడిగే ప్రశ్నలు (FAQs)

1. సంజూ శాంసన్ ఫోన్ గిఫ్ట్ ఇచ్చిన అభిమాని ఎవరు?

పాలక్కాడ్ జిల్లా కడంపజిపురంకు చెందిన శబరీష్ అనే యువకుడు. అతను ఒక కేబుల్ టెక్నీషియన్, స్థానిక క్రికెటర్.

2. సంజూ శాంసన్ బహుమతిగా ఇచ్చిన ఫోన్ విలువ ఎంత?

అంతర్జాతీయ వార్తా సంస్థల సమాచారం ప్రకారం.. సంజూ గిఫ్ట్ ఇచ్చిన స్మార్ట్‌ఫోన్ విలువ సుమారు రూ. 40,000.

3. ఐపీఎల్ 2026లో సంజూ శాంసన్ ఏ జట్టుకు ఆడుతున్నారు?

సంజూ శాంసన్ ప్రస్తుతం చెన్నై సూపర్ కింగ్స్ (CSK) జట్టు తరపున ఆడుతున్నారు.