మూడో బిడ్డకూ ఏడాది మాతృత్వ సెలవు: సీఎం విజయ్ సర్కార్ సంచలన నిర్ణయం

తమిళనాడు ప్రభుత్వం మహిళా ఉద్యోగులకు భారీ ఊరట నిచ్చింది. మూడో సంతానానికి ఇచ్చే ప్రసూతి సెలవులను 12 వారాల నుంచి ఏకంగా 365 రోజులకు పెంచుతున్నట్లు శాసనసభ వేదికగా మానవ వనరుల శాఖ మంత్రి డి. శరత్‌కుమార్ ప్రకటించారు.

తమిళనాడులోని సీఎం విజయ్ నేతృత్వంలోని ప్రభుత్వం మహిళా ఉద్యోగులకు ఊరటనిచ్చే కీలక నిర్ణయం తీసుకుంది. ప్రభుత్వ ఉద్యోగాల్లో ఉన్న మహిళలు మూడో బిడ్డకు జన్మనిచ్చినా సరే, ఏకంగా 365 రోజుల (ఒక సంవత్సరం) పాటు వేతనంతో కూడిన ప్రసూతి సెలవులను వర్తింపజేయాలని నిర్ణయించింది. మహిళా సాధికారత, సామాజిక సంక్షేమానికి తమ ప్రభుత్వం ఇస్తున్న ప్రాధాన్యతలో భాగంగానే ఈ నిర్ణయాన్ని ప్రకటించింది.

మూడో బిడ్డకూ ఏడాది మాతృత్వ సెలవు: సీఎం విజయ్ సర్కార్ సంచలన నిర్ణయం

శాసనసభ వేదికగా మంత్రి ప్రకటన

రాష్ట్ర శాసనసభలో తన శాఖ పద్దులపై చర్చ సందర్భంగా మానవ వనరుల నిర్వహణ శాఖ మంత్రి డి. శరత్‌కుమార్ ఈ సంచలన ప్రకటన చేశారు. "మాది సామాజిక సంక్షేమం, మహిళా సాధికారతకు అత్యున్నత పీఠం వేసే ప్రజా సంక్షేమ ప్రభుత్వం. ఈ నేపథ్యంలోనే మహిళా ఉద్యోగుల మూడో సంతానానికి ప్రస్తుతం ఇస్తున్న 12 వారాల ప్రసూతి సెలవును 365 రోజులకు పొడిగిస్తున్నాం" అని మంత్రి సభ దృష్టికి తెచ్చారు. దీనిపై త్వరలోనే పూర్తిస్థాయి ఉత్తర్వులు (జీవో) విడుదల చేస్తామని ఉన్నతాధికారులు తెలిపారు.

నిబంధనల్లో మార్పులు.. ప్రసూతి సెలవుల చరిత్ర

సుప్రీంకోర్టు మార్గదర్శకాలు, రాష్ట్ర సవరణల ప్రకారం ఇద్దరు అంతకంటే ఎక్కువ మంది పిల్లలు ఉన్న మహిళా ఉద్యోగులకు ఇప్పటివరకు 12 వారాల (84 రోజులు) ప్రసూతి సెలవు లభించేది. సర్వీసులో ఉండి ఇద్దరి కంటే తక్కువ మంది పిల్లలు ఉన్నవారికి ఇప్పటికే ఏడాది పాటు సెలవు ఇచ్చే నిబంధన అమల్లో ఉంది. ఇప్పుడు ఆ 365 రోజుల సదుపాయాన్ని మూడో బిడ్డకు కూడా విస్తరించారు.

రాష్ట్రంలో ప్రసూతి సెలవుల ప్రయాణాన్ని పరిశీలిస్తే... 2011లో అప్పటి ప్రభుత్వం ప్రసూతి సెలవులను 90 రోజుల నుంచి 6 నెలలకు పెంచింది. ఆ తర్వాత 2016లో దీనిని 9 నెలలకు, జూలై 2021లో అప్పటి డీఎంకే, ఏఐఏడీఎంకే ప్రభుత్వాల హయాంలో ఇద్దరు పిల్లల వరకు ఏడాదికి పెంచారు. ఇప్పుడు టీవీకే సర్కార్ మూడో బిడ్డకు కూడా దీనిని అమలు చేయనుంది.

అసెంబ్లీలో పసిపాప.. టీవీకే ఎమ్మెల్యే వార్తల్లో నిలిచిన వేళ

ఈ నిర్ణయం వెనుక ఓ ఆసక్తికర నేపథ్యం కూడా ఉంది. ఇటీవల జరిగిన అసెంబ్లీ ఎన్నికల్లో చెన్నైలోని తిరు-వి-క నగర్ నియోజకవర్గం నుంచి గెలిచిన టీవీకే ఎమ్మెల్యే ఆర్. పల్లవి తన పసిపాపను అసెంబ్లీకి తీసుకురావడం చర్చకు దారితీసింది. సభ ఆవరణలోని ఒక గదిలో సంరక్షకురాలి వద్ద పాపను ఉంచి, ఆమె అసెంబ్లీ సమావేశాల్లో పాల్గొంటున్నారు.

ఇటీవల పల్లవి తన బిడ్డను సీఎం సి. జోసెఫ్ విజయ్ వద్దకు తీసుకువెళ్లగా ఆయన పాపను ఆశీర్వదించారు. అయితే పసిపాపను ప్రతిచోటికీ తీసుకురావడంపై సోషల్ మీడియాలో కొందరు విమర్శలు గుప్పించారు. దీనిపై పల్లవి స్పందిస్తూ, "చిన్న బిడ్డను ఇంట్లో ఎలా ఒంటరిగా వదిలేసి రాగలను? ఇతరుల బాధలు అర్థం కాకపోయినా పర్వాలేదు కానీ, ఇలాంటి విషయాల్లో ట్రోల్ చేయడం సరికాదు" అని వ్యాఖ్యానించారు. ఈ వివాదం సాగుతున్న తరుణంలోనే ప్రభుత్వం ప్రసూతి సెలవులపై ఈ కీలక ప్రకటన చేయడం విశేషం.