భారత్ ఎన్‌సిఎపి క్రాష్ టెస్ట్‌లో టాటా పంచ్ ఈవీ ఫేస్‌లిఫ్ట్‌కు 5-స్టార్ రేటింగ్

టాటా మోటార్స్‌కు చెందిన కాంపాక్ట్ ఎలక్ట్రిక్ ఎస్‌యూవీ 'టాటా పంచ్ ఈవీ' (Tata Punch.ev) భారత్ NCAP నిర్వహించిన క్రాష్ టెస్ట్‌లలో 5-స్టార్ సేఫ్టీ రేటింగ్ సాధించింది. తన విభాగంలో అత్యంత సురక్షితమైన వాహనాల్లో ఒకటిగా నిలిచింది.

భారత ఆటోమొబైల్ రంగానికి సంబంధించి భద్రతా ప్రమాణాలలో టాటా మోటార్స్ మరోసారి తన ఆధిపత్యాన్ని చాటుకుంది. భారత్ ఎన్‍సిఎపి (Bharat NCAP) నిర్వహించిన భద్రతా పరీక్షల్లో టాటా పంచ్ ఈవీ ఫేస్‌లిఫ్ట్ మోడల్ అత్యుత్తమ ఫలితాలను సాధించి, ఐదు నక్షత్రాల (5-Star Rating) భద్రతా రేటింగ్‌ను దక్కించుకుంది.

భారత్ ఎన్‌సిఎపి క్రాష్ టెస్ట్‌లో టాటా పంచ్ ఈవీ ఫేస్‌లిఫ్ట్‌కు 5-స్టార్ రేటింగ్

టెస్టింగ్ కోసం ఉపయోగించిన టాటా పంచ్ ఈవీ 'అడ్వెంచర్ 40' (Adventure 40), 'ఎంపవర్డ్+ ఎస్ 40' (Empowered+ S 40) వేరియంట్‌లు డ్రైవర్, ప్రయాణికుల భద్రతలో విశేషమైన పనితీరును కనబరిచాయి.

పెద్దల భద్రత

పెద్దల రక్షణ విభాగంలో పంచ్ ఈవీ 32 పాయింట్లకు గాను 31.09 పాయింట్లు సాధించింది.

• ఫ్రంటల్ ఆఫ్‌సెట్ క్రాష్ టెస్ట్: 16 పాయింట్లకు గాను 15.28 పాయింట్లు లభించాయి.
• సైడ్ మూవబుల్ క్రాష్ టెస్ట్: 16 పాయింట్లకు గాను 15.80 పాయింట్లు వచ్చాయి.
• సైడ్ పోల్ ఇంపాక్ట్ టెస్ట్: ఈ విభాగంలో వాహనం 'OK' రేటింగ్‌ సాధించింది.

క్రాష్ అసెస్‌మెంట్ నివేదికల ప్రకారం, ప్రమాదం జరిగిన సమయంలో ప్రయాణికుల శరీర భాగాలకు 'గుడ్' (అత్యుత్తమ), 'అడిక్వేట్' (తగినంత) రక్షణ లభిస్తున్నట్లు అధికారులు ధృవీకరించారు.

పిల్లల భద్రత

చిన్నారుల రక్షణ విభాగంలో పంచ్ ఈవీ 49 పాయింట్లకు గాను 45.00 పాయింట్లు సాధించి అదరగొట్టింది.

• డైనమిక్ స్కోర్: 24 కి 24 పాయింట్లు.
• సిఆర్‌ఎస్ (CRS) ఇన్‌స్టాలేషన్: 12 కి 12 పూర్తి పాయింట్లు.

18 నెలల చిన్నారి, 3 సంవత్సరాల చిన్నారి బొమ్మలపై (Child Dummies) చేసిన పరీక్షల్లో ఫ్రంటల్ క్రాష్‌లో 8/8 పాయింట్లు, సైడ్ ఇంపాక్ట్‌లో 4/4 పాయింట్లు సాధించాయి. వెనుక సీట్లలో ప్రయాణించే చిన్నారులకు ఇది గరిష్ఠ రక్షణను ఇస్తుంది.

లభించే భద్రతా ఫీచర్లు

ఈ ఎలక్ట్రిక్ కారులో పలు అధునాతన ప్రమాణాల సేఫ్టీ ఫీచర్లను స్టాండర్డ్‌గా అందించారు:

• ఫ్రంట్ డ్రైవర్, ప్యాసింజర్ ఎయిర్‌బ్యాగ్‌లు
• సైడ్ కర్టెన్, సైడ్ చెస్ట్ ఎయిర్‌బ్యాగ్‌లు
• ఎలక్ట్రానిక్ స్టెబిలిటీ కంట్రోల్ (ESC)
• పెడెస్ట్రియన్ ప్రొటెక్షన్ (పాదచారుల రక్షణ వ్యవస్థ)
• సీట్ బెల్ట్ రిమైండర్‌లు & ISOFIX చైల్డ్ సీట్ మౌంట్‌లు

మే 2026లో జరిపిన పరీక్షల ప్రకారం.. స్మార్ట్+ 40, అడ్వెంచర్ 40, ఎంపవర్డ్ 40, ఎంపవర్డ్+ ఎస్ 40, స్మార్ట్ 30, స్మార్ట్+ 30 వేరియంట్లన్నింటికీ ఈ 5-స్టార్ రేటింగ్ వర్తిస్తుంది.