స్టైలిష్​ బైక్​తో అడ్వెంచర్​ టూరర్​ సెగ్మెంట్​లోకి టీవీఎస్​- Apache RTX 300 ధర ఎంతంటే..

టీవీఎస్ అపాచీ ఆర్​టీఎక్స్​ 300 విడుదలైంది. ఈ బైక్​తో అడ్వెంచర్ టూరర్ సెగ్మెంట్‌లోకి టీవీఎస్​ ఎంట్రీ ఇచ్చింది. కేటీఎం, రాయల్ ఎన్‌ఫీల్డ్ బైక్‌లకు గట్టి పోటీ ఇవ్వనున్న సరికొత్త టీవీఎస్ బైక్​కి సంబంధించిన వివరాలను ఇక్కడ చూసేయండి..

మచ్​ అవైటెడ్​ అపాచీ ఆర్​టీఎక్స్​ 300 అడ్వెంచర్​ టూరర్​ని భారత మార్కెట్​లో తాజాగా విడుదల చేసింది టీవీఎస్ మోటార్ కంపెనీ. దీని ప్రారంభ ధర రూ. 1.99 లక్షలు (ఎక్స్-షోరూమ్). ఈ లాంచ్‌తో టీవీఎస్ అధికారికంగా అడ్వెంచర్ టూరర్ సెగ్మెంట్‌లోకి అడుగుపెట్టింది!

టీవీఎస్​ అపాచీ ఆర్​టీఎక్స్​ 300

టీవీఎస్ కొత్త ప్లాట్‌ఫామ్‌పై రూపొందించిన ఈ అపాచీ ఆర్​టీఎక్స్​ 300.. మార్కెట్​లో ఉన్న కేటీఎం 250 అడ్వెంచర్, యెజ్డీ అడ్వెంచర్, రాయల్ ఎన్‌ఫీల్డ్ స్క్రామ్ 440 వంటి ప్రముఖ మోడళ్లకు గట్టి పోటీ ఇవ్వనుంది. ఈ నేపథ్యంలో ఈ బైక్​కి సంబంధించిన పూర్తి వివరాలను ఇక్కడ తెలుసుకోండి..

టీవీఎస్ అపాచీ ఆర్​టీఎక్స్​ 300: ఇంజిన్ వివరాలు..

టీవీఎస్ అపాచీ ఆర్​టీఎక్స్​ 300 అడ్వెంచర్ టూరర్ బైక్‌లో కొత్తగా డెవలప్​ చేసిన 299సీసీ, లిక్విడ్-ఆయిల్ కూల్డ్, సింగిల్-సిలిండర్ ఆర్​టీ-ఎక్స్​డీ4 ఇంజిన్ ఉంది. ఈ ఇంజిన్ 9,000 ఆర్‌పీఎం వద్ద 35.5 హెచ్‌పీ గరిష్ట పవర్​ని, 7,000 ఆర్‌పీఎం వద్ద 28.5 ఎన్ఎమ్ టార్క్ అవుట్‌పుట్‌ను ఉత్పత్తి చేయగలదు. ఈ పవర్ మిల్లుకు బై-డైరెక్షనల్ క్విక్‌షిఫ్టర్‌తో కూడిన ఆరు-స్పీడ్ గేర్‌బాక్స్‌ను జత చేశారు. ఇందులో స్మూత్ ట్రాన్స్‌మిషన్ కోసం అసిస్ట్ అండ్​ స్లిప్పర్ క్లచ్ ఫీచర్ కూడా ఉంది.

టీవీఎస్ అపాచీ ఆర్​టీఎక్స్​ 300: డిజైన్ అండ్​ లుక్..

డిజైన్ విషయానికి వస్తే ఈ టీవీఎస్ అపాచీ ఆర్​టీఎక్స్​ 300 స్టీల్ ట్రెల్లిస్ ఫ్రేమ్, అల్యూమినియం డైకాస్ట్ స్వింగ్‌ఆర్మ్‌పై ఆధారపడి ఉంటుంది. ఈ మోటార్‌సైకిల్ మస్కులర్ ఫ్యూయల్ ట్యాంక్ (బలమైన ఇంధన ట్యాంక్), మస్కులర్ సైడ్ ఫెండర్‌లు, పారదర్శకమైన విండ్‌స్క్రీన్‌తో చాలా భారీగా కనిపిస్తుంది.

ముందు భాగంలో ‘కన్ను ఆకారం’ గల ఎల్‌ఈడీ హెడ్‌ల్యాంప్‌లు, ఎల్‌ఈడీ టర్న్ ఇండికేటర్‌లు, కొమ్ములాంటి ప్రొజెక్షన్‌తో అపాచీ ఆర్​టీఎక్స్​ 300 కాస్త అగ్రెసివ్​గా కనిపిస్తుంది. టీవీఎస్ తొలి అడ్వెంచర్ టూరర్‌లో స్ప్లిట్ రియర్ సీట్లు, అదనపు లగేజీ కోసం ప్రత్యేక లగేజీ ర్యాక్ ఉండడం వల్ల.. ఇది వెనుక కూర్చునే వారికి (పిలియన్-ఫ్రెండ్లీ) కూడా అనుకూలంగా కనిపిస్తుంది.

ఈ బైక్ వైపర్ గ్రీన్, టార్న్ బ్రాంజ్, మెటాలిక్ బ్లూ, లైటనింగ్ బ్లాక్, పెర్ల్ వైట్ అనే ఐదు రంగుల్లో అందుబాటులో ఉంది.

టీవీఎస్ అపాచీ ఆర్​టీఎక్స్​ 300: కీలక ఫీచర్లు..

టీవీఎస్ అపాచీ ఆర్​టీఎక్స్​ 300లో ఫుల్-కలర్ టీఎఫ్‌టీ డిస్‌ప్లే ఉంది. ఇది వేగం, కాల్ అండ్​ ఎస్ఎంఎస్ అలర్ట్‌లు, సెగ్మెంట్‌లోనే మొట్టమొదటి మ్యాప్ మిర్రరింగ్, గోప్రో కంట్రోల్ వంటి వివరాలను అందిస్తుంది. ఇందులో నాలుగు వేర్వేరు రైడ్ మోడ్‌లు ఉన్నాయి- అవి టూర్, ర్యాలీ, అర్బన్, రెయిన్ (వర్షం) మోడ్‌లు.

భద్రత పరంగా చూస్తే, ఇందులో ఏబీఎస్ (యాంటీ-లాక్ బ్రేకింగ్ సిస్టమ్) మోడ్‌లు (ర్యాలీ, అర్బన్, రెయిన్), ట్రాక్షన్ కంట్రోల్ (రెండు మోడ్‌లు), క్రూయిజ్ కంట్రోల్, టీపీఎంఎస్ (టైర్ ప్రెజర్ మానిటరింగ్ సిస్టమ్) వంటి ఫీచర్లు ఉన్నాయి.

ఇంకా, టూ-వే థర్మోస్టాట్, ఇంటెలిజెంట్ ఎయిర్-ఫ్లో టెక్నాలజీ, పేటెంట్ పొందిన డక్ట్, డిఫ్లెక్టర్ సిస్టమ్‌ల ద్వారా టీవీఎస్ అపాచీ ఇంజిన్ ఉష్ణోగ్రతను నియంత్రించి, అవాంతరాలు లేని కంబషన్​ని నిర్ధారిస్తుంది. ఇది రైడ్‌ను మరింత సులభతరం చేస్తుంది.