అర్జున్ సెంచరీ వృథా.. అండర్-19 ఆసియా కప్‌లో భారత్‌పై పాకిస్థాన్ విజయం

యు-19 ఆసియా కప్‌లో పాకిస్థాన్ చేతిలో భారత్‌కు పరాభవం ఎదురైంది. అర్జున్ రాజ్‌పుత్ (107) వీరోచిత శతకంతో రాణించినా.. హంజా జహూర్ (100 నాటౌట్) అద్భుత సెంచరీతో పాక్‌కు 3 వికెట్ల తేడాతో విజయాన్ని అందించాడు.

యువ క్రికెట్ సమరంలో పాకిస్థాన్ దే పైచేయి అయింది. అండర్-19 ఆసియా కప్‌లో ఆఖరి వరకు ఉత్కంఠభరితంగా సాగిన పోరులో భారత్‌పై పాకిస్థాన్ 3 వికెట్ల తేడాతో విజయం సాధించింది. అర్జున్ రాజ్‌పుత్ వీరోచిత శతకంతో భారత్ పోరాడే స్కోరు సాధించినప్పటికీ, హంజా జహూర్ బాధ్యతాయుతమైన సెంచరీతో పాక్‌ను విజయతీరాలకు చేర్చాడు. ఈ విజయంతో టోర్నీలో పాక్ వరుసగా రెండో గెలుపును నమోదు చేయగా, భారత్ తన తదుపరి మ్యాచ్‌లో యూఏఈతో తలపడనుంది.

సెంచరీ చేసిన అర్జున్ రాజ్‌పుత్ (BCCI)

కష్టాల్లో టాప్ ఆర్డర్.. మెరిసిన రాజ్‌పుత్

టాస్ గెలిచి బ్యాటింగ్ ఎంచుకున్న భారత జట్టుకు ఆరంభంలోనే గట్టి షాక్ తగిలింది. పాకిస్థాన్ సీమర్లు రిజ్వాన్ ఉల్లా, అలీ రెజా అద్భుతమైన స్వింగ్, బౌన్స్‌తో భారత టాప్ ఆర్డర్‌ను దెబ్బతీశారు. పరుగులు తీసేందుకు భారత బ్యాటర్లు తీవ్రంగా శ్రమించారు. ఫలితంగా 12వ ఓవర్ పూర్తయ్యేసరికి భారత్ 22 పరుగులకే 3 వికెట్లు కోల్పోయి తీవ్ర కష్టాల్లో పడింది.

ఈ సమయంలో ఆర్యవీర్ సెహ్వాగ్ కాసేపు వికెట్ల పతనాన్ని అడ్డుకునే ప్రయత్నం చేశాడు. అయితే ఎడమచేతి వాటం స్పిన్నర్ నిఖాబ్ షఫీక్ బౌలింగ్‌లో స్వీప్ షాట్ ఆడబోయి మిడ్ వికెట్‌లో మహమ్మద్ సయ్యమ్‌కు క్యాచ్ ఇచ్చి నిష్క్రమించాడు. ఆర్యవీర్ 40 బంతుల్లో 22 పరుగులు చేశాడు. మరోవైపు అన్వయ్ ద్రావిడ్ (10) కూడా ఎక్కువ సేపు నిలవకపోవడంతో భారత్ 86 పరుగులకే 5 వికెట్లు కోల్పోయి అగాధంలో పడింది.

శతకంతో చెలరేగిన అర్జున్

ఒకవైపు వికెట్లు పడుతున్నా అర్జున్ రాజ్‌పుత్ మొక్కవోని ధైర్యంతో పోరాడాడు. పిచ్‌పై షాట్లు ఆడడం కష్టంగా మారిన వేళ, 18వ ఓవర్‌లో బౌలర్ తల మీదుగా కొట్టిన బౌండరీతో అర్జున్ ఆట తీరు మారింది. అక్కడి నుంచి సాధికారికంగా బ్యాటింగ్ చేస్తూ పాక్ బౌలర్లపై విరుచుకుపడ్డాడు. మణాల్ చౌహాన్‌తో కలిసి ఇన్నింగ్స్‌ను నిలబెట్టాడు. మణాల్ వికెట్ కాపాడుకుంటూ సహకారం అందించగా, అర్జున్ ఫోర్లతో హోరెత్తించాడు.

కేవలం 80 బంతుల్లోనే అర్జున్ రాజ్‌పుత్ సెంచరీ పూర్తి చేసుకున్నాడు. వీరిద్దరి మధ్య 64 పరుగుల భాగస్వామ్యం నెలకొంది. చివరకు అర్జున్ 85 బంతుల్లో 107 పరుగులు చేసి రిజ్వాన్ ఉల్లా బౌలింగ్‌లో ఔటయ్యాడు. ఆఖరిలో పటేల్ (23) విలువైన పరుగులు జోడించడంతో భారత్ 47 ఓవర్లలో 208 పరుగులకు ఆలౌటైంది. పాక్ బౌలర్లలో అలీ రెజా, రిజ్వాన్ ఉల్లా, నిఖాబ్ షఫీక్ చెరో 3 వికెట్లు తీశారు.

ప్రారంభంలోనే పాక్ కుదుపు

209 పరుగుల లక్ష్యంతో బరిలోకి దిగిన పాకిస్థాన్‌ను భారత బౌలర్లు ప్రారంభంలోనే ఒత్తిడిలోకి నెట్టారు. కచ్చితమైన లైన్ అండ్ లెంగ్త్‌తో బౌలింగ్ చేసినప్పటికీ, ఫీల్డింగ్‌లో కొన్ని పొరపాట్లు చోటుచేసుకున్నాయి. అయినా పట్టువదలని భారత బౌలర్లు జహంగీర్ బిలాల్, ఉస్మాన్ ఖాన్‌లను త్వరితగతిన పెవిలియన్‌కు పంపారు. దీంతో పాక్ 5.4 ఓవర్లలో 33/2తో నిలిచింది.

ఆ తర్వాత అబ్దుల్ ఖాదిర్, అహ్మద్ హుస్సేన్ జోడీ 22 పరుగులు జోడించి ఇన్నింగ్స్ నిలబెట్టే ప్రయత్నం చేసింది. అయితే మణాల్ చౌహాన్ అద్భుతమైన బంతితో ఖాదిర్‌ను ఔట్ చేయడంతో పాక్ ఇన్నింగ్స్ ఒక్కసారిగా దెబ్బతింది. కేవలం 6 పరుగుల వ్యవధిలోనే పాక్ 3 వికెట్లు కోల్పోయి 61/5తో తీవ్ర ప్రతికూల పరిస్థితుల్లో పడింది.

హంజా జహూర్ పోరాటం.. పాక్ విజయం

ఈ దశలో హస్నైన్ అబ్బాస్, హంజా జహూర్ పాక్‌ను ఆదుకున్నారు. అబ్బాస్ నిలకడగా ఆడుతూ సహకారం అందించగా, జహూర్ దూకుడుగా పరుగులు సాధించాడు. వీరిద్దరూ ఆరో వికెట్‌కు 107 పరుగుల అమూల్యమైన భాగస్వామ్యం నెలకొల్పి పాక్‌ను విజయానికి చేరువ చేశారు.

గెలుపు ఖాయమనుకున్న సమయంలో అబ్బాస్ (38)ను ఔట్ చేసి మణాల్ భారత్‌కు ఆశలు కల్పించాడు. ఆ తర్వాత మోహిత్ ఉల్వా.. సయ్యమ్‌ను ఔట్ చేయడంతో మ్యాచ్ మరింత ఆసక్తికరంగా మారింది. అయితే హంజా జహూర్ తీవ్ర ఒత్తిడిలోనూ నిలకడ కోల్పోలేదు. విజయానికి అవసరమైన ఆఖరి బౌండరీతో తన శతకాన్ని పూర్తి చేయడమే కాకుండా, పాకిస్థాన్‌కు 3 వికెట్ల తేడాతో గెలుపును అందించాడు. జహూర్ 100 పరుగులతో నాటౌట్‌గా నిలిచాడు.