ఉద్యోగ ఆఫర్లను నిలిపివేసిన వాల్‌మార్ట్: ఈ నిర్ణయం ఎవరిపై ప్రభావం చూపుతుంది?

వాల్‌మార్ట్ సంస్థ H-1B వీసా అవసరం ఉన్న అభ్యర్థులకు ఆఫర్లను నిలిపివేసిందని బ్లూమ్‌బర్గ్ రిపోర్ట్ చేసింది. గత నెలలో డొనాల్డ్ ట్రంప్ పరిపాలన కొత్త H-1B దరఖాస్తుల కోసం ప్రోగ్రామ్‌ను పునఃపరిశీలించడానికి, వాడుకను నియంత్రించడానికి $100,000 ఫీజు విధించిన తర్వాత ఈ నిర్ణయం వెలువడింది.

వాల్‌మార్ట్ H-1B వీసా అవసరం ఉన్న అభ్యర్థులకు ఉద్యోగ ఆఫర్‌లను నిలిపివేయడం వల్ల కొత్తగా H-1B వీసా స్పాన్సర్‌షిప్ కోసం చూస్తున్న వారిపై తీవ్ర ప్రభావం ఉంటుంది. ఈ చర్య ముఖ్యంగా కింది వర్గాలపై పడుతుంది

ఉద్యోగ ఆఫర్లను నిలిపివేసిన వాల్‌మార్ట్: ఈ నిర్ణయం ఎవరిపై ప్రభావం చూపుతుంది? (REUTERS)

కార్పొరేట్ ఉద్యోగార్థులు: ఈ మార్గదర్శకం ప్రధానంగా వాల్‌మార్ట్ యొక్క కార్పొరేట్ ఉద్యోగుల (Corporate Employees) నియామకాలపై ప్రభావం చూపుతుందని బ్లూమ్‌బెర్గ్ నివేదించింది. H-1B వీసాలు ప్రధానంగా ఐటీ, ఇంజనీరింగ్, సైన్స్, ఫైనాన్స్ వంటి ప్రత్యేక వృత్తుల (Specialty Occupations) కోసం ఇస్తారు. కాబట్టి ఈ రంగాల్లోని కొత్త అభ్యర్థులకు నిరాశ తప్పదు.

కొత్తగా హెచ్-1బీ కోసం దరఖాస్తు చేసుకునేవారు: వాల్‌మార్ట్‌లో చేరాలనుకుంటున్న విదేశీ నిపుణుల్లో, తమకు మొట్టమొదటిసారిగా H-1B వీసా కావాల్సిన వారికి ఇది అడ్డంకి. ఫీజు పెంపు కొత్త H-1B పిటిషన్‌లకు మాత్రమే వర్తిస్తుంది.

అమెరికా వెలుపల ఉన్న అభ్యర్థులు: USCIS స్పష్టం చేసిన ప్రకారం, అమెరికాలో ఉండకుండా, విదేశాల నుంచి నేరుగా కొత్త H-1B వీసా కోసం దరఖాస్తు చేసుకునే వారికి $100,000 ఫీజు వర్తిస్తుంది. అందువల్ల, వాల్‌మార్ట్ ఈ అధిక ఖర్చును భరించడం ఇష్టం లేక అటువంటి నియామకాలను నిలిపివేసింది.

ఎవరిపై ప్రభావం ఉండదు?

వాల్‌మార్ట్ తీసుకున్న ఈ నిర్ణయం కింది వారికి వర్తించదు లేదా తక్కువ ప్రభావం చూపుతుంది.

ఇప్పటికే H-1B వీసా ఉన్న ఉద్యోగులు: ఇప్పటికే వాల్‌మార్ట్‌లో పనిచేస్తున్న H-1B వీసా హోల్డర్లపై ఈ నియామక నిలిపివేత ప్రభావం చూపదు. అంతేకాకుండా, వీసా పునరుద్ధరణ (Renewal) లేదా పొడిగింపు (Extension of Stay) కోసం దరఖాస్తు చేసుకునే వారికి ఈ కొత్త $100,000 ఫీజు వర్తించదు.

ఇప్పటికే అమెరికాలో ఉన్న కొంతమంది: అమెరికాలో ఉంటూ F-1 (విద్యార్థి వీసా), L-1 వీసా వంటి ఇతర వీసా స్టేటస్‌లో ఉండి, తమ స్టేటస్‌ను H-1Bకి మార్చుకోవాలనుకునే వారికి కూడా ఈ $100,000 ఫీజు నుంచి మినహాయింపు ఉండే అవకాశం ఉంది.

మొత్తం ఉద్యోగులు: వాల్‌మార్ట్ మొత్తం ఉద్యోగుల సంఖ్య దాదాపు 1.6 మిలియన్లు కాగా, H-1B వీసాదారులు సుమారు 2,390 మంది మాత్రమే. కాబట్టి ఈ నిర్ణయం సంస్థలోని అత్యధిక ఉద్యోగులపై ప్రభావం చూపదు.

$100,000 ఫీజు గురించి కీలక వివరాలు

ట్రంప్ ప్రభుత్వం ప్రవేశపెట్టిన $100,000 ఫీజు గురించి తెలుసుకోవాల్సిన ముఖ్యాంశాలు.

ఎవరు చెల్లించాలి: ఈ $100,000 రుసుమును ఉద్యోగి తరఫున కంపెనీ (H-1B పిటిషన్‌ను దాఖలు చేసే యజమాని) చెల్లించాల్సి ఉంటుంది.

ఎప్పుడు వర్తిస్తుంది: ఈ భారీ ఫీజు సెప్టెంబర్ 21, 2025, 12:01 a.m. (ET) తర్వాత దాఖలు చేయబడిన కొత్త H-1B వీసా పిటిషన్‌లకు మాత్రమే వర్తిస్తుంది.

ఫీజు ఉద్దేశం: H-1B వీసా ప్రోగ్రామ్‌ను సంస్కరించడానికి, దాని దుర్వినియోగాన్ని అరికట్టడానికి, అమెరికన్ కార్మికులకు అవకాశాలను పెంచడానికి ఈ చర్య తీసుకున్నట్లు ట్రంప్ పరిపాలన పేర్కొంది.

వాల్‌మార్ట్ వంటి పెద్ద రిటైల్ సంస్థలకు కూడా కొత్తగా ఉద్యోగులను నియమించుకోవడానికి ఒక్కో అభ్యర్థికి లక్ష డాలర్లు అదనపు భారం అవుతుంది. అందుకే ఈ సంస్థలు H-1B అవసరమైన కొత్త అభ్యర్థులను నియమించుకోవడంపై వెనకడుగు వేశాయి.