యూఎస్​ వర్క్​ పర్మిట్​ ఆటోమెటిక్​ రెన్యువల్​ రద్దుతో భారతీయులు ఉద్యోగాలు కోల్పోతారా?

అమెరికాలో విదేశీ ఉద్యోగులకు భారీ షాక్! వర్క్​ పర్మిట్​ ఆటోమెటిక్​ రెన్యువల్​లో బైడెన్ కాలం నాటి విధానాన్ని రద్దు చేసింది ట్రంప్ ప్రభుత్వం. ఇది భారతీయులపై తీవ్ర ప్రభావం చూపే అవకాశం ఉంది!

అమెరికాలో పనిచేస్తున్న వలసదారుల వర్క్​ పర్మిట్​ ఆటోమెటిక్​ రెన్యువల్​ను రద్దు చేస్తున్నట్టు ప్రకటించి మరోసారి అందరికి షాక్​ ఇచ్చింది డొనాల్డ్​ ట్రంప్​ ప్రభుత్వం. దీని ప్రకారం.. అమెరికాలో ఉన్న విదేశీ ఉద్యోగుల పత్రాల ఆటోమేటిక్ పొడిగింపు ఇకపై ఉండదు! ఈ నిర్ణయం కారణంగా అమెరికాలో పనిచేస్తున్న భారతీయ ఉద్యోగులపై తీవ్ర ప్రభావం పడే అవకాశం ఉంది.

యూఎస్​ వర్క్​ పర్మిట్​ ఆటో రెన్యువల్​ రద్దు..

ట్రంప్ ప్రభుత్వ నిర్ణయం ఏంటి?

డొనాల్డ్ ట్రంప్ ప్రభుత్వం కొన్ని వర్గాలకు చెందిన విదేశీ ఉద్యోగుల ఉద్యోగ అధికార పత్రాల (ఈఏడీ) చెల్లుబాటును స్వయంచాలకంగా పొడిగించే విధానాన్ని అక్టోబర్ 30, 2025 నుంచి రద్దు చేసింది.

మాజీ అధ్యక్షుడు జో బైడెన్​ ప్రభుత్వం తీసుకొచ్చిన ఈ ఆటోమేటిక్ పొడిగింపు విధానం వల్ల, విదేశీ నాన్-ఇమ్మిగ్రెంట్ వీసా హోల్డర్‌లకు వారి వర్క్ పర్మిట్‌ల కోసం తప్పనిసరిగా పునః-పరిశీలన చేయించుకోవాల్సిన అవసరం తప్పేది.

కాగా.. ఈ విధానాన్ని రద్దు చేస్తున్నట్టు యూఎస్ డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (డీహెచ్​ఎస్​) ఓ ప్రకటన చేసింది. పునరుద్ధరణ కోసం దరఖాస్తు చేసుకునే విదేశీయుల ఈఏడీల స్వయంచాలక పొడిగింపును రద్దు చేస్తున్నట్లు పేర్కొంది. ఉద్యోగ అధికారాలను పొడిగించే ముందు, విదేశీయుల సరైన స్క్రీనింగ్, పరిశీలన జరగాలనే లక్ష్యంతో ఈ నిర్ణయం తీసుకున్నట్లు తెలిపింది.

అయితే, ఈ తాత్కాలిక తుది నియమం.. అక్టోబర్ 30కి ముందు స్వయంచాలకంగా పొడిగించిన ఈఏడీ పత్రాలపై ప్రభావం చూపదని డీహెచ్​ఎస్ స్పష్టం చేసింది.

అమెరికన్ల భద్రతే ముఖ్యం!

యూఎస్ సిటిజెన్‌షిప్ అండ్ ఇమ్మిగ్రేషన్ సర్వీసెస్ (యూఎస్​సీఐఎస్​) డైరెక్టర్ జోసెఫ్ ఎడ్లో ఒక ప్రకటనలో ఈ విషయంపై స్పందించారు. విదేశీయుల పటిష్టమైన స్క్రీనింగ్, పరిశీలనపై మళ్లీ దృష్టి సారించామని ఆయన అన్నారు. పౌరుల భద్రత కంటే విదేశీయుల సౌలభ్యానికే ప్రాధాన్యత ఇచ్చిన మునుపటి ప్రభుత్వం విధానాలను "తొలగించడం" ఇందులో భాగమని స్పష్టం చేశారు.

"విదేశీయుడి ఉద్యోగ అధికారం లేదా పత్రం పొడిగించటానికి ముందు తగిన పరిశీలన పూర్తయిందని నిర్ధారించడానికి ఇది ఒక సాధారణ, వివేకవంతమైన చర్య! అమెరికాలో పనిచేయడం అనేది ఒక అధికారం, హక్కు కాదని విదేశీయులందరూ గుర్తుంచుకోవాలి," అని ఆయన వ్యాఖ్యానించారు.

బైడెన్ ప్రభుత్వం ఈఏడీ ఆటో పొడిగింపును ఎందుకు అనుమతించింది?

జో బైడెన్ నేతృత్వంలోని అమెరికా ప్రభుత్వం మే 2022లో నిబంధనలను సవరిస్తూ, తమ ఉద్యోగ అధికారాన్ని పునరుద్ధరించుకునే దరఖాస్తుదారులకు ఎటువంటి ధృవీకరణ ప్రక్రియ లేకుండానే ఈఏడీ గడువును స్వయంచాలకంగా 540 రోజుల పాటు పొడిగించే సదుపాయాన్ని కల్పించింది.

వర్క్ పర్మిట్ మంజూరు కోసం పెండింగ్‌లో ఉన్న దాదాపు 15 లక్షల దరఖాస్తులను వేగవంతం చేయడానికి, అలాగే ప్రక్రియ ఆలస్యం కారణంగా నిరుద్యోగం పెరుగుతుందనే ఆందోళనల మధ్య ఈ నిర్ణయం తీసుకున్నట్లు నివేదికలు తెలిపాయి.

ఈఏడీ అంటే ఏమిటి? దాని ప్రాముఖ్యత ఎంత?

కొన్ని నిర్దిష్ట వర్గాలకు చెందిన నాన్-ఇమ్మిగ్రెంట్ వీసా హోల్డర్‌లు అమెరికాలో తాత్కాలికంగా పనిచేయడానికి ఉద్యోగ అధికార పత్రాలు (ఈఏడీ) తప్పనిసరి.

ఈ ఈఏడీ పత్రాలు, నాన్-ఇమ్మిగ్రెంట్ విదేశీ ఉద్యోగి నిర్దిష్ట సమయం వరకు అమెరికాలో చట్టబద్ధంగా పనిచేయడానికి అనుతులు ఉన్నట్టు రుజువుగా పనిచేస్తాయి.

సాధారణంగా ఈఏడీలను ఒకటి నుంచి రెండు సంవత్సరాల కాలానికి జారీ చేస్తారు. అయితే, కొన్ని వర్గాల వారికి ఐదేళ్ల వరకు కూడా మంజూరు చేస్తారు. ఈఏడీ పొందడానికి దరఖాస్తుదారులు ఫారం ఐ-765 ను దాఖలు చేయాల్సి ఉంటుంది. వారి ఇమ్మిగ్రేషన్ స్టేటస్‌ను బట్టి అర్హత ఆధారపడి ఉంటుంది.

ఈఏడీ అవసరమయ్యే వారు ఎవరు?

అమెరికాలో ఈఏడీ అవసరమయ్యే నాన్-ఇమ్మిగ్రెంట్ విదేశీయులలో అధిక శాతం:

• దౌత్య మిషన్లు, అంతర్జాతీయ సంస్థలలోని ఉద్యోగులపై ఆధారపడిన కుటుంబ సభ్యులు.
• శరణార్థులు.
• విద్యార్థులు.
• హెచ్​1బీ నాన్-ఇమ్మిగ్రెంట్ ఉద్యోగుల జీవిత భాగస్వాములు.
• ఎల్​-1 ఇంట్రాకంపెనీ బదిలీ ఉద్యోగి జీవిత భాగస్వామి.
• ఆమోదించిన ఉపాధి-ఆధారిత ఇమ్మిగ్రెంట్ కార్యక్రమం ప్రధాన లబ్ధిదారుడి జీవిత భాగస్వామి లేదా పెళ్లికాని పిల్లలు.
• F-1 వీసా విద్యార్థులు కూడా ఈఏడీ కోసం దరఖాస్తు చేసుకోవడానికి అర్హులు. ముఖ్యంగా తమ అధ్యయన రంగానికి నేరుగా సంబంధించిన ఉద్యోగాలలో ఆప్షనల్ ప్రాక్టికల్ ట్రైనింగ్ (ఓపీటీ) కోరుకునే విద్యార్థులు; తీవ్రమైన ఆర్థిక ఇబ్బందుల కారణంగా క్యాంపస్ వెలుపల ఉపాధి కోరుకునే వారు కూడా అర్హులే.
• అలాగే.. సైన్స్, టెక్నాలజీ, ఇంజనీరింగ్ లేదా మ్యాథమెటిక్స్ (స్టెమ్​) డిగ్రీలు ఉన్న విద్యార్థులు 24 నెలల పొడిగింపు కోసం ఈఏడీలకు దరఖాస్తు చేసుకోవడానికి అర్హులు.

భారతీయ ఉద్యోగులపై ప్రభావం ఎలా ఉంటుంది?

డొనాల్డ్ ట్రంప్ హెచ్​1బీ వీసా రుసుములను కొన్ని వేల డాలర్ల నుంచి ఏకంగా సంవత్సరానికి 1,00,000 డాలర్లకు పెంచిన కొద్ది వారాలకే ఇమ్మిగ్రేషన్ అధికారులు ఈ తాజా నిర్ణయం తీసుకోవడం గమనార్హం.

యూఎస్ సెన్సస్ బ్యూరో గణాంకాల ప్రకారం, 2022 నాటికి అమెరికాలో సుమారు 48 లక్షల మంది భారతీయ అమెరికన్లు నివసిస్తున్నారు. వీరిలో 66 శాతం మంది వలసదారులు, 34 శాతం మంది అమెరికాలో జన్మించినవారు ఉన్నారు.

అమెరికాలో వీసాలకు సంబంధించి ఏ చిన్న మార్పు వచ్చినా, అక్కడ నివసిస్తున్న వలసదారుల సమాజంపై తీవ్ర ప్రభావం ఉంటుంది. ఈ వలసదారులలో భారతీయులే గణనీయమైన సంఖ్యలో ఉన్నారు. అందువల్ల, ఈఏడీ పత్రాల ఆటోమెటిక్​ పొడిగింపు రద్దు చేయడం అనేది అమెరికాలో నివసిస్తున్న లక్షలాది మంది భారతీయ ఉద్యోగులు, వారి కుటుంబాలకు వర్క్ పర్మిట్ రెన్యూవల్ ప్రక్రియలో అదనపు భారంగా మారనుంది!