ఫుట్బాల్ మైదానంలో జెర్సీ నంబర్ 7 వేసుకుని కొండంత ఆత్మవిశ్వాసంతో కదిలే ఆ సింహం ఇక ప్రపంచకప్ వేదికపై కనిపించదు. కోట్ల మంది అభిమానుల గుండెలు పగిలే వార్తను నిజం చేస్తూ పోర్చుగల్ సాకర్ లెజెండ్ క్రిస్టియానో రొనాల్డో ప్రపంచకప్ ఆటకు వీడ్కోలు పలికారు. టెక్సాస్లోని ఆర్లింగ్టన్ వేదికగా జరిగిన లీగ్ రౌండ్ ఆఫ్ 16 మ్యాచ్లో స్పెయిన్ చేతిలో 1-0 తేడాతో పోర్చుగల్ పరాజయం పాలైంది. ఈ ఓటమితో పోర్చుగల్ టోర్నీ నుంచి నిష్క్రమించగా, రొనాల్డో తన సుదీర్ఘ వరల్డ్ కప్ ప్రయాణాన్ని ముగించాడు.
రియల్ మాడ్రిడ్, మాంచెస్టర్ యునైటెడ్, జువెంటస్ వంటి ప్రపంచ ప్రసిద్ధ క్లబ్లకు ఆడి ఫుట్బాల్ రారాజుగా వెలిగిన రొనాల్డో, ప్రస్తుతం సౌదీ అరేబియాకు చెందిన అల్-నస్ర్ క్లబ్కు ప్రాతినిధ్యం వహిస్తూ భారీగా ఆర్జిస్తున్నారు. క్లబ్ ఫుట్బాల్లో సాధించని రికార్డంటూ లేని ఈ ఐదుసార్లు బ్యాలన్ డి ఓర్ విజేతకు, తన దేశానికి ప్రపంచకప్ అందించాలనే కల మాత్రం నెరవేరలేదు. రొనాల్డో 2006లో జర్మనీ వేదికగా తొలిసారి ప్రపంచకప్ బరిలోకి దిగారు. ఆ టోర్నీలో పోర్చుగల్ నాలుగో స్థానంలో నిలిచింది. రొనాల్డో కెరీర్లో అదే అత్యుత్తమ ప్రపంచకప్ ప్రదర్శన కావడం గమనార్హం. ఆ తర్వాత ఆడిన ఐదు ప్రపంచకప్లలోనూ ఆయన ట్రోఫీని ముద్దాడలేకపోయాడు.
ఈ మెగా టోర్నీలో పోర్చుగల్ జట్టు ఓడిపోయినప్పటికీ, రొనాల్డో తన పేరిట ఎవరికీ సాధ్యంకాని అద్భుతమైన రికార్డులను లిఖించుకున్నాడు. లియోనెల్ మెస్సి, గిల్లెర్మో ఒచోవాల సరసన నిలుస్తూ అత్యధికంగా ఆరు ప్రపంచకప్ టోర్నీలు ఆడిన ఆటగాడిగా రొనాల్డో రికార్డు సృష్టించాడు.
ఈ టోర్నీ గ్రూప్ స్టేజ్ మ్యాచ్లో గోల్ చేయడం ద్వారా, ప్రపంచకప్ చరిత్రలో వరుసగా ఆరు వేర్వేరు టోర్నమెంట్లలో (2006, 2010, 2014, 2018, 2022, 2026) గోల్స్ సాధించిన ప్రపంచపు ఏకైక పురుష ఆటగాడిగా సరికొత్త చరిత్ర సృష్టించాడు రొనాల్డో. ప్రస్తుతం 41 ఏళ్ల వయసున్న రొనాల్డో, ఒక ప్రపంచకప్ మ్యాచ్లో బరిలోకి దిగిన అత్యంత వృద్ధుడైన (గోల్కీపర్ మినహా) ఆటగాడిగా రికార్డులకెక్కాడు.
తన సుదీర్ఘ కెరీర్లో రొనాల్డో మొత్తం 27 ప్రపంచకప్ మ్యాచ్లు ఆడి 11 గోల్స్ సాధించాడు. ప్రపంచకప్ చరిత్రలో నమోదైన 57 హ్యాట్రిక్లలో ఒకటి రొనాల్డో పేరిట ఉంది. ఈ ఏడాది క్రొయేషియాతో జరిగిన రౌండ్ ఆఫ్ 32 మ్యాచ్లో ఆయన చేసిన గోల్, ప్రపంచకప్ నాకౌట్ దశలో ఆయనకు మొదటిది కావడం విశేషం.
రొనాల్డో ప్రపంచకప్ గోల్స్- 2006: ఇరాన్పై 1 గోల్, 2010: నార్త్ కొరియాపై 1 గోల్, 2014: ఘనాపై 1 గోల్, 2018: స్పెయిన్పై అద్భుత హ్యాట్రిక్తో సహా మొత్తం 4 గోల్స్, 2022: ఘనాపై 1 గోల్, 2026: ఉజ్బెకిస్తాన్పై 2, క్రొయేషియాపై 1 గోల్తో కలిపి మొత్తం 3 గోల్స్.
ప్రపంచకప్ సాధించకపోయినా, రొనాల్డో మైదానంలో చూపిన పోరాట పటిమ, క్రమశిక్షణ రాబోయే తరాల ఫుట్బాల్ ఆటగాళ్లకు ఎల్లప్పుడూ ఆదర్శంగా నిలుస్తాయి. రొనాల్డో రిటైర్మెంట్తో ఒక అద్భుతమైన సాకర్ శకానికి తెరపడిందని క్రీడా విశ్లేషకులు అభివర్ణిస్తున్నారు.