బంగాళాఖాతంలో ఏర్పడిన తీవ్ర వాయుగుండం మరింత బలపడి తీవ్రరూపం దాల్చుతోంది. సోమవారం నాటికి తూర్పు, పశ్చిమ మధ్య బంగాళాఖాతంలో ఇది తుపానుగా మారనుంది. ఈ తుపానుకు ‘అర్నబ్’ (Cyclone Arnab) అని పేరు పెట్టారు.
భారత వాతావరణ శాఖ అంచనా ప్రకారం, ఈ అల్పపీడన వ్యవస్థ అక్టోబర్ 27న తీవ్ర తుపానుగా, అక్టోబర్ 28 ఉదయానికి అతి తీవ్ర తుపానుగా (Very Severe Cyclonic Storm) రూపాంతరం చెందనుంది. అనంతరం అక్టోబర్ 28న మధ్యాహ్న సమయానికి బాపట్ల - విశాఖపట్నం మధ్య తీరాన్ని దాటే అవకాశముందని అధికారులు తెలిపారు.
తీరం దాటే సమయంలో సముద్రంలో రాకాసి అలలతో పాటు, గంటకు 115 నుంచి 140 కిలోమీటర్ల వేగంతో భీకర ఈదురుగాలులు వీచే ప్రమాదం ఉందని వాతావరణ శాఖ హెచ్చరించింది.
శ్రీకాకుళం, విజయనగరం, విశాఖపట్నం, అల్లూరి సీతారామరాజు, అనకాపల్లి, గుంటూరు, ప్రకాశం, బాపట్ల, శ్రీ పొట్టి శ్రీరాములు నెల్లూరు జిల్లాలకు ఆరెంజ్ అలర్ట్ జారీ చేశారు.
రాయలసీమ పరిధిలోని కడప, కర్నూలు, నంద్యాల, శ్రీ సత్యసాయి, చిత్తూరు, అన్నమయ్య, తిరుపతి, అనంతపురం జిల్లాలకు వాతావరణ శాఖ ఎల్లో అలర్ట్ ఇచ్చింది.
తీవ్ర ముప్పు పొంచి ఉన్న నేపథ్యంలో ఏపీలోని కాకినాడ, డాక్టర్ బి.ఆర్. అంబేడ్కర్ కోనసీమ, ఏలూరు, తూర్పుగోదావరి, పశ్చిమ గోదావరి, కృష్ణా జిల్లాలకు వాతావరణ శాఖ రెడ్ అలర్ట్ ప్రకటించింది. ఈ జిల్లాల్లో భారీ నుంచి అత్యంత భారీ వర్షాలు కురిసే అవకాశముంది.