తెలంగాణలో వాతావరణం వేగంగా మారుతోంది. ఎల్‌నినో ప్రభావంతో ఇన్నాళ్లూ రాత్రిపూట సాధారణం కంటే ఎక్కువ ఉష్ణోగ్రతలు నమోదు కాగా, శుక్రవారం నుంచి కనిష్ఠ ఉష్ణోగ్రతలు క్రమంగా తగ్గుముఖం పడుతున్నాయి. దీనికి తోడు పలు జిల్లాల్లో చలిగాలులు కూడా వీస్తున్నాయి. శనివారం నాటికి రాష్ట్రంలోనే అత్యంత తక్కువగా ఆదిలాబాద్‌లో 16.7 డిగ్రీల సెల్సియస్ కనిష్ఠ ఉష్ణోగ్రత నమోదైంది.
ఓవైపు చలి పుంజుకుంటున్న తరుణంలోనే… వాతావరణ శాఖ కీలక హెచ్చరికలను జారీ చేసింది. రాబోయే రెండు మూడు రోజులు రాష్ట్రంలోని పలు జిల్లాల్లో భారీ వర్షాలు కురిసే అవకాశం ఉందని హెచ్చరించింది.
అక్టోబర్ 25, 26 తేదీల్లో రాష్ట్రంలో పొడి వాతావరణం ఉండే అవకాశం ఉనప్పటికీ, అక్టోబర్ 26 ఉదయం నుంచి పలు చోట్ల తేలికపాటి నుండి మోస్తరు వర్షాలు లేదా ఉరుములతో కూడిన జల్లులు పడే అవకాశం ఉందని వాతావరణ నిపుణులు తెలిపారు. అక్టోబర్ 28 ఉదయం 8:30 గంటల నుంచి అక్టోబర్ 29 ఉదయం 8:30 గంటల వరకు (రోజూ 5) రాష్ట్రంలో అత్యంత భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం రెడ్/ఆరంజ్ అలర్ట్ జారీ చేసింది.
ములుగు, భద్రాద్రి కొత్తగూడెం, ఖమ్మం జిల్లాల్లో అక్కడక్కడ భారీ నుండి అతి భారీ వర్షాలతో పాటు అత్యంత భారీ వర్షాలు కురిసే అవకాశం ఉంది.
జయశంకర్ భూపాలపల్లి, మహబూబాబాద్, వరంగల్, హనుమకొండ, సూర్యాపేట జిల్లాల్లో అక్కడక్కడ భారీ నుండి అతి భారీ వర్షాలు పడే అవకాశం ఉంది.
అంతేకాకుండా జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ జిల్లాల్లో ఉరుములు, మెరుపులతో పాటు గంటకు 50 నుండి 60 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ శాఖ తెలిపింది. మంచిర్యాల, రాజన్న సిరిసిల్ల, కరీంనగర్, పెద్దపల్లి, జనగాం, నల్గొండ, సిద్దిపేట, యాదాద్రి భువనగిరి జిల్లాల్లో అక్కడక్కడ భారీ వర్షాలు నమోదు కావచ్చు.
ఆదిలాబాద్, కొమరంభీం ఆసిఫాబాద్, నిర్మల్, నిజామాబాద్, జగిత్యాల, రంగారెడ్డి, హైదరాబాద్, మేడ్చల్-మల్కాజిగిరి, నాగర్ కర్నూల్ జిల్లాల్లో ఉరుములు, మెరుపులతో పాటు గంటకు 30 నుండి 40 కిమీ వేగంతో ఈదురుగాలులు వీచే సూచనలున్నయి.
అక్టోబర్ 29 నుంచి 30 వరకు మంచిర్యాల, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ జిల్లాల్లో అక్కడక్కడ భారీ వర్షాలు పడతాయని వాతావరణ శాఖ స్పష్టం చేసింది. ఈ సమయంలో గంటకు 30-40 కిమీ వేగంతో ఈదురుగాలులు వీచే అవకాశం ఉంది.
అక్టోబర్ 30 తర్వాత వర్ష తీవ్రత తగ్గి తేలికపాటి జల్లులు మాత్రమే కురుసే సూచనలున్నాయి.