ఒక యువకుడు తన మూత్రంలో నిరంతరం నురుగు రావడాన్ని గమనించి, కిడ్నీలు ఫెయిల్ అయ్యాయేమోనని తీవ్ర ఆందోళనకు గురయ్యాడు. వైద్యుడిని సంప్రదించాడు. అక్కడ డాక్టర్ చేసిన పరీక్షలో తెలిసిన నిజం ఏంటో తెలుసా? అతను వాడే టాయిలెట్ క్లీనింగ్ కెమికల్స్ (డిటర్జెంట్) వల్ల మూత్రంలో ఆ నురుగు ఏర్పడింది! ఈ ఒక్క సంఘటన ఇంటర్నెట్‌లో లభించే అరకొర వైద్య సమాచారం ఎలాంటి మానసిక ఆందోళనకు గురిచేస్తుందో నిరూపిస్తోంది. దవణగెరెలోని ఎస్ఎస్ నారాయణ హెల్త్ సూపర్‌స్పెషాలిటీ సెంటర్‌కు చెందిన ప్రముఖ నెఫ్రాలజిస్ట్ డాక్టర్ శ్రీదత్త పవార్ ప్రకారం.. మూత్రంలో నురుగు రావడం అనేది ఎల్లప్పుడూ కిడ్నీలు పాడయ్యాయని చెప్పడానికి ఆధారం కాదు!
మన శరీరంలో రక్తాన్ని శుద్ధి చేసి వ్యర్థాలను మూత్రం ద్వారా బయటకు పంపే క్రమంలో ప్రాథమిక ప్రొటీన్లను కిడ్నీలు తిరిగి శరీరంలోకే నిలుపుకుంటాయి. ఒకవేళ కిడ్నీల వడపోత వ్యవస్థలో సమస్య తలెత్తితే ప్రొటీన్లు మూత్రం ద్వారా బయటకు వస్తాయి. అయితే మూత్రంలో నురుగు రావడానికి కేవలం కిడ్నీ సమస్యలే కాక అనేక సాధారణ కారణాలు కూడా ఉంటాయి.
బాత్రూమ్‌లలో వాడే కెమికల్స్, డిటర్జెంట్లు మూత్రంతో కలవడం వల్ల నురుగులు ఏర్పడతాయి. తీవ్రమైన ఒత్తిడితో లేదా వేగంగా మూత్ర విసర్జన చేసినప్పుడు నీటిపై పడిన ఒత్తిడికి గాలి బుడగలు ఏర్పడతాయి. శరీరంలో నీటి శాతం తగ్గిపోవడం వల్ల మూత్రం చిక్కబడి తాత్కాలికంగా నురుగు రావచ్చు. కేవలం కంటితో చూసి మూత్రంలో ఉన్నది సాధారణ గాలి బుడగలా లేదా ప్రొటీన్ల వల్ల వచ్చిన నురుగా అనేది ఏ ఒక్కరూ ఖచ్చితంగా చెప్పలేరు.
సహజంగా వచ్చే నురుగును పక్కన పెడితే.. మధుమేహం, అధిక రక్తపోటు ఉన్నవారు మూత్రంలో నురుగును నిర్లక్ష్యం చేయకూడదు. రక్తంలో చక్కెర స్థాయిలు ఎక్కువగా ఉన్నప్పుడు కిడ్నీలలోని సూక్ష్మ రక్తనాళాలు దెబ్బతింటాయి. దీనివల్ల ప్రొటీన్ లీకేజ్ ప్రారంభమవుతుంది. ముఖ్యంగా టైప్-1 డయాబెటిస్ ఉన్నవారు వ్యాధి నిర్ధారణ అయిన ఐదేళ్ల నుంచి ప్రతీ ఏటా కిడ్నీ స్క్రీనింగ్ పరీక్షలు చేయించుకోవాలని వైద్యులు సూచిస్తున్నారు. క్రమం తప్పకుండా యూరిన్ అల్బుమిన్, కిడ్నీ ఫంక్షన్ టెస్ట్ చేయించుకోవడం ద్వారా కిడ్నీ జబ్బులను తొలిదశలోనే గుర్తించవచ్చు.
మూత్రంలో నురుగు నిరంతరం వస్తూ, దానితో పాటు ఈ కింది లక్షణాలు కనిపిస్తే మాత్రం వెంటనే నెఫ్రాలజిస్ట్ (కిడ్నీ నిపుణులు) వద్దకు వెళ్లాలి: రాత్రిపూట తరచూ మూత్ర విసర్జన చేయాల్సి రావడం, మూత్రంలో రక్తం చుక్కలు కనిపించడం లేదా మూత్రం ఎర్రగా మారడం, రోజువారీ మూత్ర విసర్జన పరిమాణం గణనీయంగా తగ్గిపోవడం, కాళ్లు, పాదాలు లేదా ముఖం వాపునకు గురికావడం, ఆయాసం, గుండెదడ మరియు తగ్గని అధిక రక్తపోటు ఉండటం.
టాయిలెట్ కమోడ్‌ను పదే పదే పరిశీలిస్తూ, ఇంటర్నెట్‌లో భయానక జబ్బుల గురించి వెతకడం వల్ల మానసిక ఒత్తిడి తప్ప ఎలాంటి ప్రయోజనం ఉండదు. ఒక సాధారణ యూరిన్ రొటీన్ ఎగ్జామినేషన్ చేయడం ద్వారా మూత్రంలో ప్రొటీన్లు లేదా రక్తం కణాలు లీక్ అవుతున్నాయా అనేది అతి తక్కువ ఖర్చుతో తెలుసుకోవచ్చు. ఒకవేళ పరీక్షలో తేడా వస్తే డాక్టర్ సలహా మేరకు నెఫ్రాలజిస్ట్‌ను కలిసి తగిన చికిత్స పొందాలి. గూగుల్‌లో దొరికే సమాచారం కేవలం అవగాహన కోసమే తప్ప నిర్ధారణ కోసం కాదని గుర్తించాలి. నురుగు వచ్చినంత మాత్రాన కిడ్నీలు ఫెయిల్ అయినట్లు కాదు, అలాగని దాన్ని పూర్తిగా నిర్లక్ష్యం చేయడమూ మంచిది కాదని నిపుణులు స్పష్టం చేస్తున్నారు.