తెలంగాణలో లా కోర్సుల్లో చేరాలని ఎదురుచూస్తున్న విద్యార్థులకు కీలక అప్డేట్ వచ్చేసింది. ఎల్ఎల్బీ, ఎల్ఎల్ఎం కోర్సుల్లో ప్రవేశాల భర్తీకి సంబంధించిన లాసెట్ (LAWCET-2026), పీజీఎల్సిఈటీ కౌన్సెలింగ్ నోటిఫికేషన్ను ఈ నెల 26వ తేదీన విడుదల చేయాలని తెలంగాణ రాష్ట్ర ఉన్నత విద్యామండలి నిర్ణయించింది.
హైదరాబాద్లోని ఉన్నత విద్యామండలి కార్యాలయంలో సోమవారం నాడు పీజీఈసెట్, లాసెట్ ప్రవేశాల కమిటీల ఉన్నత స్థాయి సమావేశం జరిగింది. ఈ ఉమ్మడి సమావేశంలో కౌన్సెలింగ్ ప్రక్రియకు సంబంధించిన విధివిధానాలు, షెడ్యూల్పై అధికారులు సుదీర్ఘంగా చర్చించారు.
అన్ని ఏర్పాట్లను సమీక్షించిన అనంతరం, జూన్ 26వ తేదీన అధికారికంగా కౌన్సెలింగ్ నోటిఫికేషన్ను జారీ చేయాలని కమిటీ సభ్యులు ఏకగ్రీవంగా నిర్ణయం తీసుకున్నారు.
ఈ నోటిఫికేషన్ ద్వారా రాష్ట్రవ్యాప్తంగా ఉన్న లా కాలేజీల్లో మూడేళ్ల ఎల్ఎల్బీ, ఐదేళ్ల సమగ్ర (ఇంటిగ్రేటెడ్) ఎల్ఎల్బీ కోర్సులతో పాటు పీజీ లా కోర్సుల్లో సీట్లను భర్తీ చేయనున్నారు.
అర్హులైన అభ్యర్థులు నోటిఫికేషన్ విడుదలైన తర్వాత నిర్దేశిత వెబ్సైట్ ద్వారా తమ వివరాలను నమోదు చేసుకుని, వెబ్ ఆప్షన్లు ఇచ్చుకోవాల్సి ఉంటుంది. సర్టిఫికేట్ వెరిఫికేషన్, వెబ్ ఆప్షన్ల నమోదు తదితర పూర్తి స్థాయి వివరాలతో కూడిన సమగ్ర షెడ్యూల్ను 26న విడుదల చేసే ప్రకటనలో అధికారులు వెల్లడించనున్నారు. https://lawcet.tgche.ac.in/ వెబ్ సైట్ నుంచి ర్యాంక్ కార్డును డౌన్లోడ్ చేసుకోవచ్చు.