సినిమా ఇండస్ట్రీలో గ్లామర్ మాత్రమే కాదు, ప్రాణాంతక వ్యాధులతో పోరాడి నిలిచిన ధీరవనితలు కూడా ఉన్నారు. అలాంటి వారిలో ప్రముఖ నటి సోనాలి బింద్రే ఒకరు. 2018లో ఆమెకు అత్యంత ప్రమాదకరమైన స్టేజ్ 4 మెటాస్టాటిక్ క్యాన్సర్ సోకినప్పుడు ప్రపంచవ్యాప్తంగా ఉన్న ఆమె అభిమానులు తీవ్ర ఆందోళనకు గురయ్యారు. ఆ మహమ్మారి ఆమె మెదడుకు కూడా వ్యాపించింది. అయితే, బలమైన ఆత్మవిశ్వాసం, క్రమశిక్షణతో కూడిన జీవనశైలితో ఆమె క్యాన్సర్ను పూర్తిగా జయించారు. క్యాన్సర్ నుంచి కోలుకున్న తర్వాత కూడా ఆమె తన ఆరోగ్యంపై ప్రత్యేక శ్రద్ధ పెడుతున్నారు. తాజాగా ఓ ఇంటర్వ్యూలో సోనాలి.. తన రోజువారీ డైట్, ఫిట్నెస్ రహస్యాలను పంచుకున్నారు.
"నేను ప్రతిరోజూ 18 నుంచి 20 గంటల పాటు ఇంటర్మిటెంట్ ఫాస్టింగ్ పాటిస్తాను. అందుకే నేను రోజుకు కేవలం ఒకటిన్నర పూట మాత్రమే భోజనం చేస్తాను. అప్పుడప్పుడు రెండు పూటలా తిన్నప్పటికీ, ఎక్కువ శాతం మాత్రం ఎక్కువ గంటల ఉపవాసానికే ప్రాధాన్యత ఇస్తాను," అని సోనాలి బింద్రే వివరించారు.
ఇలా ఎక్కువ సమయం ఖాళీ కడుపుతో ఉండటం వల్ల శరీరంలో పేరుకుపోయిన వ్యర్థాలు తొలగిపోతాయని, అతిగా తినడం కంటే మితంగా, అవసరమైన పోషకాలతో కూడిన ఆహారాన్ని తీసుకోవడమే తన ఫిట్నెస్ సూత్రమని ఆమె పేర్కొన్నారు.
స్టేజ్-4 క్యాన్సర్ అని తెలిసినప్పుడు ఎలాంటి మానసిక వేదన అనుభవించారో సోనాలి గుర్తుచేసుకున్నారు. ఆ వార్త వినగానే మొదట తీవ్రమైన భయాందోళనలు ముంచెత్తాయని ఆమె అంగీకరించారు. అలాంటి క్లిష్ట పరిస్థితుల్లో సామాన్యులైనా, సెలబ్రిటీలైనా భయపడటం సహజమని, అయితే ఆ భయంలోనే ఉండిపోతే జీవితం ముందుకు సాగదని ఆమె గ్రహించారు.
"భయం అనేది కొద్దిసేపు ఉండే ఒక భావోద్వేగం మాత్రమే. ఆ నిరాశలోనే మునిగిపోతే మనకు ఉన్న సమయం వృధా అవుతుంది తప్ప ఎలాంటి ప్రయోజనం ఉండదు. అందుకే నా చేతుల్లో లేని విషయాల గురించి ఆలోచించడం మానేసి, నా నియంత్రణలో ఉన్న చికిత్సపై, ధైర్యంగా నిలబడటంపై మాత్రమే దృష్టి పెట్టాను," అని సోనాలి తన మనోధైర్యాన్ని చాటారు.
తన క్యాన్సర్ రికవరీ జర్నీలో సైన్స్ ఆధారిత జీవనశైలి ఎంతో సహాయపడిందని సోనాలి గతంలో సోషల్ మీడియా వేదికగా వెల్లడించారు. తన నేచురోపతి వైద్యుడి సలహాతో 'ఆటోఫేజీ' అనే ప్రక్రియను అధ్యయనం చేసి, దానిని తన జీవితంలో భాగం చేసుకున్నట్లు చెప్పారు. ఆటోఫేజీ అంటే శరీరం తనలోని దెబ్బతిన్న కణాలను, వ్యర్థాలను తానే స్వయంగా శుభ్రం చేసుకునే ఒక అద్భుతమైన జీవక్రియ. ఎక్కువ గంటల ఉపవాసం ద్వారా ఈ ప్రక్రియ వేగవంతం అవుతుంది. 2018 నాటి పోరాటంలో ఈ పద్ధతి తనకు పునర్జన్మను ఇచ్చిందని, అందుకే ఇప్పటికీ దీనిని క్రమం తప్పకుండా పాటిస్తున్నానని సోనాలి బింద్రే స్పష్టం చేశారు.