తెలంగాణలోని జూనియర్ కళాశాలల్లో చేరాలనుకునే విద్యార్థులకు రాష్ట్ర ఇంటర్మీడియట్ విద్యారంగం బిగ్ అప్డేట్ ఇచ్చింది. 2026-27 విద్యాసంవత్సరానికి గాను ఇంటర్మీడియట్ ప్రథమ సంవత్సరం (ఫస్టియర్) ప్రవేశాల ప్రక్రియ గడువును ఇంటర్ బోర్డు మరోసారి పొడిగించింది. ఇప్పటివరకు అడ్మిషన్లు పొందలేకపోయిన విద్యార్థులను దృష్టిలో ఉంచుకుని ఈ నిర్ణయం తీసుకున్నారు.
తాజా ఆదేశాల ప్రకారం…. విద్యార్థులు ఈ నెల 15వ తేదీ (ఆగస్టు 15, 2026) వరకు తమకు నచ్చిన జూనియర్ కాలేజీల్లో ప్రవేశాలు పొందవచ్చు. ఈ మేరకు రాష్ట్ర ఇంటర్మీడియట్ బోర్డు కార్యదర్శి అభిలాష అభినవ్ అధికారికంగా ఉత్తర్వులు జారీ చేశారు.
ఈ గడువు పొడిగింపు ఉత్తర్వులు రాష్ట్రంలోని అన్ని ప్రభుత్వ, ప్రైవేట్ ఎయిడెడ్, ప్రైవేట్ అన్-ఎయిడెడ్, సొసైటీ, రెసిడెన్షియల్, మోడల్ స్కూల్స్ మరియు కేజీబీవీ జూనియర్ కళాశాలలకు వర్తిస్తాయి.
అభ్యర్థులు కేవలం గుర్తింపు పొందిన కాలేజీల్లోనే చేరాలని, బోర్డు అధికారిక వెబ్సైట్ ద్వారా గుర్తింపు పొందిన కళాశాలల జాబితాను సరిచూసుకోవాలని స్పష్టం చేశారు.
పదో తరగతి జీపీఏ, సబ్జెక్టు గ్రేడ్ మార్కుల ఆధారంగానే అడ్మిషన్లు ఇవ్వాలి. ప్రవేశాల కోసం కళాశాలలు ఎలాంటి ఎంట్రన్స్ పరీక్షలు నిర్వహించకూడదు. రోస్టర్ విధానం ప్రకారం ఎస్సీ (15%), ఎస్టీ (10%), బీసీ (29%), ఈడబ్ల్యూఎస్ (10%) కేటగిరీల రిజర్వేషన్ నిబంధనలను కచ్చితంగా అమలు చేయాలి.
ప్రత్యేకంగా బాలికల కళాశాలలు లేని ప్రాంతాల్లో ప్రతి కేటగిరీలో 33.33 శాతం (మూడో వంతు) సీట్లను బాలికలకే కేటాయించాలి అడ్మిషన్ సమయంలో విద్యార్థుల నుంచి ఆధార్ సంఖ్యతో పాటు 'యాంటీ డ్రగ్ డిక్లరేషన్' పత్రాన్ని తప్పనిసరిగా తీసుకోవాలని ప్రిన్సిపాళ్లకు స్పష్టం చేశారు.విద్యార్థులు ఇంటర్ బోర్డు అధికారిక వెబ్సైట్ tgbie.cgg.gov.in ద్వారా వివరాలను ఎప్పటికప్పుడు తెలుసుకోవచ్చు.