నేరేడు పండ్లు విరగకాస్తే కరవు తప్పదా? ఎల్‌నినో ఎఫెక్ట్ వెనక నిజమిదేనా? సూసైడ్ ఫ్రూటింగ్!

ఇప్పుడు ఆంధ్రప్రదేశ్, తెలంగాణలో ఎక్కడ చూసినా నేరేడు పండ్లు అతిగా కనిపిస్తున్నాయి. వర్షాలు పడవు అని ప్రకృతి ముందే సంకేతం ఇస్తుందా? నేరేడు పండ్లు ఎక్కువ కాస్తే ఏమవుతుంది? మన పెద్దలు ఏం చెప్పారు?

ప్రస్తుతం తెలుగు రాష్ట్రాల్లో ఎక్కడ చూసినా నేరేడు పండ్లతో కళకళలాడుతున్నాయి. గతంలో ఎన్నడూ లేని విధంగా ఈ ఏడాది నేరేడు పండ్ల దిగుబడి విపరీతంగా పెరిగింది. అయితే ఈ బంపర్ కాపు వినియోగదారులకు సంతోషాన్ని కలిగిస్తున్నప్పటికీ, గ్రామీణ ప్రాంతాల్లోని పెద్దలను, రైతులను మాత్రం ఒక తెలియని భయం వెంటాడుతోంది.

నేరేడు పండ్లు

'నేరేడు పండ్లు విరగకాస్తే.. ఆ ఏడాది భయంకరమైన కరవు వస్తుంది.' అనేది మన తాతలు, ముత్తాతల కాలం నాటి నమ్మకం. ఈ ఏడాది సరిగ్గా పసిఫిక్ మహాసముద్రంలో ఏర్పడిన 'ఎల్‌నినో' (El Nino) ప్రభావంతో రుతుపవనాలు ఆలస్యమై, వర్షాలు మొహం చాటేస్తాయనే వాతావరణ శాఖ హెచ్చరికల నేపథ్యంలో.. ఈ పాత నమ్మకం ఇప్పుడు సోషల్ మీడియాలో హాట్ టాపిక్‌గా మారింది.

సూసైడ్ ఫ్రూటింగ్

పెద్దలు చెప్పే ఈ నమ్మకం వెనక వృక్ష శాస్త్రంలో ఒక బలమైన తర్కం ఉంది. సైన్స్ ప్రకారం దీనిని 'మాస్టింగ్' (Masting) లేదా 'స్ట్రెస్ ఫ్రూటింగ్' (Stress Fruiting) అని పిలుస్తారు. కొన్నిసార్లు దీనిని 'సూసైడ్ ఫ్రూటింగ్' అని కూడా అంటారు. పర్యావరణంలో ఉష్ణోగ్రతలు విపరీతంగా పెరిగినప్పుడు, భూగర్భ జలాలు పడిపోయినప్పుడు లేదా చెట్టు తీవ్రమైన నీటి ఒత్తిడికి గురైనప్పుడు.. తాను చనిపోతాననే భయంతో తన జాతి మనుగడను కాపాడుకోవడానికి చెట్లు ప్రయత్నిస్తాయి. ఆ సమయంలో అవి కొత్త కొమ్మలు, ఆకులు వేయడం ఆపేసి, తమ వద్ద ఉన్న శక్తినంతా విత్తనాలు, పండ్ల ఉత్పత్తిపైనే కేంద్రీకరిస్తాయి. అంటే తన మనుగడను పట్టించుకోకుండా ఎక్కువ పండ్లను ఉత్పత్తి చేసేందుకు ప్రయత్నిస్తుంది. అందుకే దీనిని సూసైడ్ ఫ్రూటింగ్ అంటారు. భవిష్యత్తులో కఠినమైన పరిస్థితులు ఎదురుకాబోతున్నాయనే ప్రకృతి సంకేతమే ఈ అధిక దిగుబడి. సో వర్షాలు తక్కువ పడుతాయని దీని అర్థం. అందుకే నేరేడు చెట్టు.. తన శక్తినంతా విత్తనాలు, పండ్ల కోసం ఉపయోగిస్తుంది.

ట్యాప్‌రూట్ సిస్టమ్

ఈ ఏడాది అంతర్జాతీయ వాతావరణ సంస్థలతో పాటు భారత వాతావరణ శాఖ కూడా దేశంపై ఎల్‌నినో తీవ్ర ప్రభావం ఉంటుందని ప్రకటించింది. ఎల్‌నినో వల్ల ఉష్ణోగ్రతలు పెరగడం, వర్షపాతం తగ్గడం, కరవు పరిస్థితులు ఏర్పడడం సర్వసాధారణం. నేరేడు పండ్లు మార్కెట్లలో భారీగా అందుబాటులోకి రావడం, ఇటు ఎల్‌నినో కారణంగా వర్షాలు ముఖం చాటేయడం ఒకేసారి జరగడంతో పెద్దల మాట అక్షరాలా నిజమవుతోందని ప్రజలు భావిస్తున్నారు.

సైన్స్ ఏం చెబుతోంది?

అయితే నేరేడు పండ్లు ఎక్కువగా కాయడం అనేది రాబోయే కరవుకు ముందస్తు హెచ్చరిక మాత్రమే కాదని వృక్ష శాస్త్ర నిపుణులు స్పష్టం చేస్తున్నారు. నేరేడు చెట్లు మార్చి, ఏప్రిల్ నెలల్లో పూత పూస్తాయి. ఆ సమయంలో వాతావరణం పొడిగా, వేడిగా ఉంటే పరాగసంపర్కం బాగా జరిగి కాపు ఎక్కువగా వస్తుంది. ఒకవేళ ఆ సమయంలో అకాల వర్షాలు పడితే పూత రాలిపోతుంది. ఈ ఏడాది మార్చి, ఏప్రిల్‌లలో ఎండలు ఎక్కువగా ఉండడం వల్లే ఈ బంపర్ క్రాప్ వచ్చిందంటున్నారు. కొన్ని చెట్లు కొన్నేళ్లకు ఒకసారి సహజంగానే ఎక్కువ దిగుబడిని ఇస్తాయి. దీనిని కేవలం కరవుతోనే ముడిపెట్టలేము.

పెద్దల మాటల్లోని నమ్మకానికి పూర్తిస్థాయి ప్రత్యక్ష శాస్త్రీయ ఆధారాలు లేకపోయినప్పటికీ, వాతావరణ మార్పుల పరంగా వారు చెప్పిన అనుభవ పాఠాలను మనం కొట్టిపారేయలేము. ఎందుకంటే వాళ్లు ఎన్నో విషయాలను అంచనా వేసుకుని చెప్పి ఉంటారు. ఇప్పుడు రోడ్డు మీద నేరేడు పండ్లు చూస్తున్న చాలా మంది పెద్దల మాటలను గుర్తుచేసుకుంటున్నారు.