హైదరాబాద్ నగరంలో కొత్తగా 3 పక్షి జాతులు గుర్తింపు.. మొత్తం సంఖ్య 248కి చేరిక!

హైదరాబాద్ బర్డ్ అట్లాస్ నాలుగో సీజన్‌లో గ్రేటర్ ఫ్లెమింగో, ఎల్లో-ఫూటెడ్ గ్రీన్ పిజియన్, బ్రౌన్-క్యాప్డ్ పిగ్మీ వుడ్‌పెక్కర్ అనే మూడు పక్షి జాతులను హైదరాబాద్ పక్షి జాబితాలో చేర్చారు. దీంతో నగరంలో నమోదైన మొత్తం పక్షి జాతుల సంఖ్య 248కి చేరింది.

హైదరాబాద్‌లో పక్షుల సంరక్షణ, నగర జీవవైవిధ్యంపై అధ్యయనం ముమ్మరంగా సాగుతోంది. తాజాగా ముగిసిన హైదరాబాద్ బర్డ్ అట్లాస్(HBA) నాల్గో విడత సర్వేలో మరొక మూడు కొత్త పక్షి జాతులు వెలుగులోకి వచ్చాయి. దీంతో ఇప్పటివరకు రాజధాని నగరంలో నమోదైన మొత్తం పక్షి జాతుల సంఖ్య 248కి చేరింది.

ప్రతీకాత్మక చిత్రం

వరల్డ్ వైడ్‌ఫండ్ ఫర్ నేచర్-ఇండియా, హైదరాబాద్ బర్డింగ్ పాల్స్, దక్కన్ బర్డర్స్ సంస్థలు సంయుక్తంగా ఈ సిటిజన్ సైన్స్ కార్యక్రమాన్ని నిర్వహిస్తున్నాయి. జూలై 4న ప్రారంభమై 22 రోజుల పాటు జరిగిన ఈ సర్వేలో 200 మందికి పైగా వాలంటీర్లు పాల్గొన్నారు.

ఈ నాలుగో సీజన్ సర్వేలో గ్రేటర్ ఫ్లెమింగో, ఎల్లో-ఫుటెడ్ గ్రీన్ పిజియన్, బ్రౌన్-క్యాప్డ్ పిగ్మీ వుడ్‌పెక్కర్ అనే మూడు కొత్త జాతులను గుర్తించారు. వాలంటీర్లు మొత్తం 1,250 గంటలకు పైగా శ్రమించారు. ఇది గత మూడో సీజన్‌తో పోలిస్తే 44 శాతం పెరుగుదల కావడం విశేషం.

ఈ విడత సర్వేలో భాగస్వాములు మొత్తం 158 పక్షి జాతులను, 75,000 పైగా పక్షులను రికార్డు చేశారు. ప్రస్తుతం ఈ సమాచారాన్ని డేటా రివ్యూ టీమ్ పరిశీలిస్తోందని, తుది సంఖ్యలో స్వల్ప మార్పులు ఉండే అవకాశం ఉందని నిర్వాహకులు తెలిపారు. ఈ సర్వే సమాచారం హైదరాబాద్ నగర పరిసరాల్లోని పక్షుల విస్తరణ, కాలాల వారీగా వాటి రాకపోకలను అర్థం చేసుకోవడానికి, పట్టణ జీవవైవిధ్య ప్రణాళికలకు ఎంతో ఉపయోగపడుతుందని హైదరాబాద్ బర్డ్ అట్లాస్ తెలిపింది.

ఈ ప్రాజెక్ట్‌ను ఫిబ్రవరి 2025లో ప్రారంభించారు. ప్రతి ఏటా ఫిబ్రవరి, జూలై నెలల్లో ఈ సర్వే నిర్వహిస్తారు. తాజాగా నాలుగో విడత సర్వే చేశారు. ప్రాజెక్ట్ మూడో ఏడాదిలో భాగంగా ఐదో విడత సర్వేను ఫిబ్రవరి 2027లో, ఆరో విడతను జూలై 2027లో నిర్వహించనున్నట్లు నిర్వాహకులు ప్రకటించారు.