హైదరాబాద్ సెంట్రల్ యూనివర్సిటీలో బ్యాచిలర్ ఆఫ్ ఆప్టోమెట్రీ అడ్మిషన్స్

హైదరాబాద్ విశ్వవిద్యాలయం 2026-27 విద్యా సంవత్సరానికి గాను ఐదేళ్ల బ్యాచిలర్ ఆఫ్ ఆప్టోమెట్రీ డిగ్రీ కోర్సులో ప్రవేశాల కోసం అధికారికంగా దరఖాస్తులను ఆహ్వానించింది. ఆన్‌లైన్ దరఖాస్తుకు చివరి తేదీ 7 ఆగస్టు 2026గా నిర్ణయించారు.

దేశంలోని ప్రముఖ విశ్వవిద్యాలయాలలో ఒకటైన హైదరాబాద్ సెంట్రల్ యూనివర్సిటీ(UoH) 2026-27 విద్యా సంవత్సరానికి గాను ఐదేళ్ల బ్యాచిలర్ ఆఫ్ ఆప్టోమెట్రీ డిగ్రీ కోర్సులో ప్రవేశాల కోసం ప్రకటన విడుదల చేసింది. కంటి వైద్య రంగంలో ప్రొఫెషనల్‌గా స్థిరపడాలనుకునే విద్యార్థులకు ఇది చక్కని అవకాశం.

హైదరాబాద్ సెంట్రల్ వర్శిటీ ప్రవేశాలు

నేషనల్ ఎలిజిబిలిటీ కమ్ ఎంట్రన్స్ టెస్ట్ (NEET UG 2026) రాసిన అభ్యర్థులు ఈ ప్రోగ్రామ్‌కు దరఖాస్తు చేసుకోవడానికి అర్హులు. ప్రాథమిక నిబంధనలు, అర్హత ప్రమాణాలు, నీట్‌లో సాధించిన మెరిట్ ఆధారంగా మాత్రమే అడ్మిషన్లు కల్పిస్తారు. ఈ కోర్సులో మొత్తం 30 సీట్లు అందుబాటులో ఉన్నాయి.

యూనివర్సిటీ రిజర్వేషన్ నిబంధనల ప్రకారం జనరల్ కేటగిరీకి 12 సీట్లు, ఓబీసీ అభ్యర్థులకు 8, ఎస్సీలకు 5, ఎస్టీలకు 2, ఈడబ్ల్యూఎస్ వర్గానికి 3 సీట్లు కేటాయించారు. దివ్యాంగులు, డిఫెన్స్ కేటగిరీలకు కూడా నియమావళి ప్రకారం అవకాశాలు ఉంటాయి.

ఆన్‌లైన్ దరఖాస్తుకు చివరి తేదీ 07 ఆగస్టు 2026గా ఉంది. ప్రాథమిక సెలెక్షన్, వెయిటింగ్ లిస్ట్ విడుదల 12 ఆగస్టు 2026న చేస్తారు. 21 ఆగస్టు 2026న కౌన్సెలింగ్, ధ్రువపత్రాల పరిశీలన, రిపోర్టింగ్ చేయాలి.

జనరల్ కేటగిరీ అభ్యర్థులకు రూ.300గా దరఖాస్తు ఫీజు ఉంది. ఈడబ్ల్యూఎస్, ఓబీసీ (OBC-NCL) అభ్యర్థులకు రూ.200, ఎస్సీ, ఎస్టీ, దివ్యాంగులకు రూ.125గా నిర్ణయించారు.

ఆసక్తి ఉన్న అభ్యర్థులు అడ్మిషన్ నిబంధనలు, కోర్సు వివరాలు, ఫీజుల పట్టిక, సీట్ల కేటాయింపు, విశ్వవిద్యాలయ రిజర్వేషన్ విధానాల సమాచారం కోసం అధికారిక వెబ్‌సైట్ చూడవచ్చు. దరఖాస్తు ఫారాలు, ఇతర మార్గదర్శకాలు విశ్వవిద్యాలయ అధికారిక వెబ్‌సైట్లలో అందుబాటులో ఉన్నాయి:

అధికారిక వెబ్‌సైట్లు: acad.uohyd.ac.in, www.uohyd.ac.in

ఆన్‌లైన్ ఫీజు చెల్లించిన తర్వాత జనరేట్ అయ్యే అప్లికేషన్ లేదా ఫారమ్ నంబర్‌ను భవిష్యత్తు అవసరాల కోసం దరఖాస్తుదారులు భద్రపరుచుకోవాలి. సమయం తక్కువగా ఉన్నందున అర్హులైన అభ్యర్థులు చివరి తేదీకి ముందే దరఖాస్తు చేసుకోవాలని యూనివర్సిటీ సూచించింది.