అలర్ట్.. వాహన్ పోర్టల్‌లో మొబైల్ నంబర్ అప్‌డేట్ చేయకపోతే భారీ జరిమానాలు తప్పవు!

వాహన్ పోర్టల్‌లో మొబైల్ నంబర్ అప్‌డేట్ చేయకపోతే భారీ జరిమానాలు తప్పవని అధికారులు హెచ్చరిస్తున్నారు. కచ్చితంగా ప్రస్తుతం ఉపయోగిస్తున్న మెుబైల్ నెంబర్ యాడ్ చేయాలని సూచించారు.

తెలంగాణలోని వాహనదారులకు రవాణా శాఖ కీలక హెచ్చరిక జారీ చేసింది. వాహనదారులు తమ ప్రస్తుత మొబైల్ నంబర్లు, ఈమెయిల్ ఐడీలను వాహన్ డేటాబేస్‌లో వెంటనే అప్‌డేట్ చేసుకోవాలని స్పష్టం చేసింది. అలా చేయని పక్షంలో ట్రాఫిక్ ఈ-చలాన్లు, రవాణా శాఖ పంపే అధికారిక నోటీసులు మీకు అందకుండా పోయే ప్రమాదం ఉందని అధికారులు హెచ్చరించారు.

వాహన్ పోర్టల్‌లో మెుబైల్ నెంబర్ అప్డేట్

ఈ మేరకు రవాణా శాఖ అధికారులు 'వాహన్' పోర్టల్ ద్వారా ఒక అధికారిక మార్గదర్శకాన్ని విడుదల చేశారు. చాలా మంది వాహనదారులు వాహనాన్ని కొనుగోలు చేసిన సమయంలో ఒక మొబైల్ నంబర్ ఇస్తారని, ఆ తర్వాత కాలంలో నంబర్లు మార్చినా.. ఆ కొత్త వివరాలను రవాణా శాఖ సిస్టమ్‌లో అప్‌డేట్ చేయడం లేదని అధికారులు గుర్తించారు. దీనివల్ల ట్రాఫిక్ ఉల్లంఘనలకు సంబంధించిన చలాన్లు, ఇతర ముఖ్యమైన ప్రభుత్వ నోటీసులు పాత ఫోన్ నంబర్లకే వెళ్తున్నాయి.

ఫలితంగా, తమ వాహనంపై చలాన్లు ఉన్నాయనే విషయం కూడా యజమానులకు తెలియడం లేదు. వాహన్ డేటాబేస్‌లో నమోదైన మొబైల్ నంబర్ లేదా ఈమెయిల్ ఐడీకి పంపిన ఏ నోటీసునైనా సరే.. సదరు వాహనదారుడికి అధికారికంగా చేరినట్లుగానే రవాణా శాఖ పరిగణిస్తుంది. "మాకు మెసేజ్ రాలేదు" లేదా "నోటీసు అందలేదు" అని వాహనదారులు తప్పించుకోవడానికి వీల్లేదు. వివరాలు అప్‌డేట్ చేసుకోకపోవడం పూర్తిగా యజమాని బాధ్యత హీనత కిందికే వస్తుంది.

అప్‌డేట్ చేయకపోతే వచ్చే నష్టాలు

చలాన్లు పడిన విషయం తెలియకపోవడం వల్ల సకాలంలో జరిమానాలు చెల్లించలేరు. దీనివల్ల పెనాల్టీలు పేరుకుపోతాయి. కొన్ని రకాల తీవ్రమైన ఉల్లంఘనలకు సంబంధించి సకాలంలో స్పందించకపోతే, నేరుగా కోర్టు నుండి నోటీసులు వచ్చే అవకాశం ఉంది. భవిష్యత్తులో వాహనానికి సంబంధించిన సేవలు పొందడం కష్టమవుతుంది. ముఖ్యంగా: వాహన యాజమాన్య మార్పిడి, ఫిట్‌నెస్ సర్టిఫికేట్ రెన్యూవల్, నో-అబ్జెక్షన్ సర్టిఫికేట్ (NOC) పొందడం, చిరునామా మార్పు వంటి పనుల సమయంలో పాత చలాన్లు అడ్డుపడతాయి.

మొబైల్ నంబర్ ఎలా అప్‌డేట్ చేసుకోవాలి?

వాహనదారులు నేరుగా అధికారిక VAHAN / Parivahan పోర్టల్‌లోకి లాగిన్ అయి, తమ రిజిస్ట్రేషన్ నంబర్ ఆధారంగా మొబైల్ నంబర్‌ను ఎడిట్/అప్‌డేట్ చేసుకోవచ్చు.

త్వరితగతిన అప్‌డేట్ చేసుకోవడానికి రవాణా శాఖ ఒక ప్రత్యేక క్యూఆర్ (QR) కోడ్‌ను కూడా అందుబాటులోకి తెచ్చింది. దీన్ని స్కాన్ చేసి నేరుగా వివరాలు నమోదు చేయవచ్చు.

రవాణా శాఖ ఆర్టీఏ (RTA) ఉన్నతాధికారి ఒకరు మాట్లాడుతూ.. ప్రస్తుతం ఈ-చలాన్లు, ఇతర సమాచారాన్ని కేవలం సాధారణ ఎస్ఎమ్ఎస్ (SMS) రూపంలోనే కాకుండా, వాట్సాప్ (WhatsApp), ఈమెయిల్స్ ద్వారా కూడా పంపుతున్నామని, కాబట్టి వాహనదారులు తమ సరైన కాంటాక్ట్ వివరాలను సిస్టమ్‌లో ఉంచుకోవడం ఎంతో ఉత్తమమని సూచించారు.