తెలంగాణలో భీమ్ యాప్ హవా.. ఎక్కువ పేమెంట్స్ దేనికి చేస్తున్నారో తెలుసా?

భీమ్(BHIM) పేమెంట్స్ యాప్ లావాదేవీల్లో దూసుకెళ్తోంది. తెలంగాణలో ఎక్కువ శాతం జనాలు ఈ భీమ్ యాప్‌ను ఉపయోగిస్తున్నారు.

నేషనల్ పేమెంట్స్ కార్పొరేషన్ ఆఫ్ ఇండియా (NPCI)కి చెందిన భీమ్(BHIM) పేమెంట్స్ యాప్ లావాదేవీలు గత ఏడాది కాలంలో ఊహించని రీతిలో పెరిగాయి. జూన్ 2025 నుంచి మే 2026 మధ్య కాలంలో భీమ్ యాప్ ద్వారా జరిగిన నెలవారీ లావాదేవీల సంఖ్య ఏకంగా మూడు రెట్లకు పైగా పెరిగినట్లు ఎన్‌పీసీఐ భీమ్ సర్వీసెస్ లిమిటెడ్ వెల్లడించింది.

భీమ్ యాప్

రికార్డు స్థాయిలో లావాదేవీలు

జూన్ 2025లో భీమ్ యాప్ ద్వారా 7.96 కోట్ల (79.64 మిలియన్) లావాదేవీలు జరగ్గా.. మే 2026 నాటికి ఈ సంఖ్య ఏకంగా 24.4 కోట్లకు (244 మిలియన్) చేరింది. కేవలం మే 2026 ఒక్క నెలలోనే ఈ ప్లాట్‌ఫారమ్ ద్వారా రూ.26,952 కోట్ల విలువైన ఆర్థిక లావాదేవీలు జరగడం విశేషం.

తెలంగాణలో భీమ్ హవా!

తెలంగాణ రాష్ట్రంలో కూడా భీమ్ యాప్ వినియోగం మూడు రెట్లు పెరిగింది. తెలంగాణ ప్రజలు తమ రోజువారీ అవసరాల కోసం డిజిటల్ చెల్లింపుల వైపు ఎంతలా మొగ్గు చూపుతున్నారో కింద పేర్కొన్న గణాంకాలు స్పష్టం చేస్తున్నాయి.

మే 2026లో తెలంగాణలో జరిగిన మొత్తం మర్చంట్ (వ్యాపార) లావాదేవీలలో.. కిరాణా సామాగ్రి 23.9 శాతం, హోటళ్లు/ఫుడ్ అవుట్‌లెట్లు 18.1 శాతం, క్విక్ కామర్స్ (ఇన్‌స్టంట్ డెలివరీ యాప్స్) 11.6 శాతం చెల్లింపులు భీమ్ యాప్ ద్వారానే జరిగాయి.

నగదు రహిత చెల్లింపులు

తెలంగాణలో భీమ్ యాప్ సాధించిన ఈ అద్భుత వృద్ధిపై ఎన్‌బీఎస్‌ఎల్ (NBSL) ఎండీ, సీఈఓ లలితా నటరాజ్ హర్షం వ్యక్తం చేశారు. 'ప్రజల రోజువారీ జీవితంలో డిజిటల్ చెల్లింపులు అంతర్భాగంగా మారాయనడానికి ఈ వృద్ధి నిదర్శనం. నిత్యావసరాలు, హోటళ్లు, క్విక్ కామర్స్ వంటి నిత్య జీవిత ఖర్చుల కోసం ప్రజలు నగదు రహిత చెల్లింపులను ఆశ్రయించడం శుభపరిణామం. వినియోగదారులకు మరింత సులువైన, సురక్షితమైన డిజిటల్ అనుభవాన్ని అందించడమే మా లక్ష్యం.' అని లలితా నటరాజ్ పేర్కొన్నారు.

ప్రాంతీయ భాషల్లో

భీమ్ యాప్ కేవలం నగరాలకే పరిమితం కాకుండా గ్రామీణ, పట్టణ ప్రాంతాల్లోని సామాన్యులకు కూడా అందుబాటులో ఉండేలా రూపొందించారు. ఈ యాప్ తెలుగుతో సహా 15 కి పైగా ప్రాంతీయ భాషలను సపోర్ట్ చేస్తుంది. అంతేకాకుండా, ఇంటర్నెట్ సిగ్నల్ తక్కువగా ఉండే ప్రాంతాల్లో సైతం ఇది అద్భుతంగా పనిచేసేలా ఆప్టిమైజ్ చేశారు. దీనివల్ల పల్లెటూళ్లలో సైతం డిజిటల్ లావాదేవీలు వేగంగా విస్తరిస్తున్నాయి.