ఎల్బీ నగర్-హయత్ నగర్ డబుల్ డెక్కర్ ఎలివేటెడ్ కారిడార్‌.. కృష్ణా నదిపై కేబుల్ బ్రిడ్జి

ఎల్బీ నగర్-హయత్ నగర్ డబుల్ డెక్కర్ ఎలివేటెడ్ కారిడార్‌కు కేంద్రం ఆమోదం తెలిపింది. అంతేకాదు హైదరాబాద్-అమరావతి గ్రీన్‌ఫీల్డ్ హైవేపై కేంద్రమంత్రి నితిన్ గడ్కరీ సానుకూలంగా స్పందించారు.

హైదరాబాద్‌లో రోడ్డు మౌలిక సదుపాయాల కల్పనలో భాగంగా ఎల్బీ నగర్-హయత్ నగర్ డబుల్ డెక్కర్ ఎలివేటెడ్ కారిడార్‌కు, NH-167K పై కృష్ణా నది మీదుగా నిర్మించనున్న ఐకానిక్ కేబుల్ బ్రిడ్జి నిర్మాణానికి కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ ఆమోదం తెలిపారు. తెలంగాణ అభివృద్ధికి కీలకమైన మౌలిక సదుపాయాలు, జాతీయ రహదారి ప్రాజెక్టులపై చర్చించేందుకు మంత్రి కోమటిరెడ్డి వెంకట్ రెడ్డి న్యూఢిల్లీలో గడ్కరీని కలిశారు.

కేంద్రమంత్రి నితిన్ గడ్కరీతో రాష్ట్రమంత్రులు కోమటిరెడ్డి, జూపల్లి

కేంద్ర మంత్రి సానుకూలంగా స్పందించి అనేక కీలక ప్రాజెక్టులకు ఆమోదం తెలిపారని కోమటిరెడ్డి పేర్కొన్నారు. ఇందులో భాగంగా హైదరాబాద్–శ్రీశైలం ఎలివేటెడ్ కారిడార్ కోసం కొత్తగా డీపీఆర్ సిద్ధం చేయాలని అధికారులను ఆదేశించారన్నారు. పర్వతమాల పథకం కింద తెలంగాణకు 5 రోప్‌వేలను మంజూరు చేయడంపై కేంద్రమంత్రి సానుకూలంగా స్పందించారు.

అలాగే సేతు బంధన్ పథకం కింద 3 కొత్త రైల్వే ఓవర్ బ్రిడ్జిల నిర్మాణానికి కేంద్రం నుంచి ఆమోదం లభించింది. హైదరాబాద్-అమరావతి గ్రీన్ ఫీల్డ్ హైవే విషయంలోనూ గడ్కరీ సానుకూలంగా ఉన్నట్టుగా కోమటిరెడ్డి వెంకట్‌రెడ్డి చెప్పారు. తెలంగాణలో గుర్తించిన 34 పనులకు సీఆర్ఐఎఫ్ నిధుల మంజూరుపై అధికారులకు ఆదేశాలు జారీ చేశారు.

NH-65 (హైదరాబాద్–విజయవాడ–మచిలీపట్నం) విస్తరణ పనులను వేగవంతం చేస్తామని కేంద్రమంత్రి నితిన్ గడ్కరీ హామీ ఇచ్చారు. పుల్లూరు–ఆలంపూర్–కొల్లాపూర్–దేవరకొండ–నల్గొండ మార్గాన్ని జాతీయ రహదారిగా అప్‌గ్రేడ్ చేసే ప్రతిపాదనకు కూడా ఆయన సానుకూలంగా స్పందించారు.

'హైదరాబాద్ – శ్రీశైలం ఎలివేటెడ్ కారిడార్ కోసం కొత్త డీపీఆర్ సిద్ధం చేయాలని అధికారులను ఆదేశించారు. NH-65 (హైదరాబాద్ – విజయవాడ – మచిలీపట్నం) విస్తరణ పనులను వేగవంతంగా పూర్తి చేస్తామని నితన్ గడ్కరీ హామీ ఇచ్చారు. పర్వతమాల పథకం కింద తెలంగాణకు 5 రోప్‌వేలకు ఆమోదం తెలిపారు.' కోమటిరెడ్డి వెంకట్‌రెడ్డి చెప్పారు.