E-Paper
ఘోరం.. హాస్టల్ వాష్రూమ్లో ప్రసవం.. శిశువును వెంటిలేటర్ నుంచి కిందకు పడేసిన యువతి
హైదరాబాద్లో ఘోరమైన ఘటన వెలుగులోకి వచ్చింది. ఓ యువతి హాస్టల్ వాష్రూమ్లో ప్రసవించింది. శిశువును వెంటిలేటర్ నుంచి కిందకు విసిరేసింది.
హైదరాబాద్ మహానగరంలో గుండెల్ని పిండేసే ఉదంతం వెలుగులోకి వచ్చింది. నగరంలోని గోల్కొండ పోలీస్ స్టేషన్ పరిధిలో ఉన్న ఒక ఉమెన్స్ హాస్టల్లో ఓ యువతి బిడ్డను ప్రసవించింది. ఆపై నవజాత శిశువును వెంటిలేటర్ గుండా బయటకు విసిరేసి ప్రాణాలు తీసింది. సమాజంలో నైతిక విలువల పతనాన్ని ఈ సంఘటన ప్రతిబింబిస్తోంది.
పోలీసుల కథనం ప్రకారం.. సదరు యువతి గోల్కొండ పరిధిలోని ఒక హాస్టల్లో నివాసముంటోంది. అయితే ఆమె గర్భం దాల్చిన విషయాన్ని హాస్టల్ నిర్వాహకులు గానీ, తోటి రూమ్మేట్స్ గానీ గమనించలేకపోయారు. తీవ్రమైన ప్రసవ వేదన రావడంతో సదరు యువతి హాస్టల్ వాష్రూమ్కు వెళ్లింది. అక్కడే బిడ్డకు జన్మనిచ్చింది.
ఎవరికి ఏం సమాధానం చెప్పాలనే భయమో, లేక చేసిన తప్పు బయటపడుతుందనే ఆందోళనో గానీ.. పురిటి నొప్పుల బాధలో ఉంటూనే.. అప్పుడే పుట్టిన పసికందును వాష్రూమ్ వెంటిలేటర్ కిటికీలోంచి కిందకు విసిరేసింది. తీవ్ర గాయాలపాలైన ఆ చిన్నారి అక్కడికక్కడే ప్రాణాలు విడిచింది.
ఈ దారుణ సంఘటన జరిగిన తర్వాత తీవ్ర రక్తస్రావం కావడం, యువతి అస్వస్థతకు గురికావడంతో హాస్టల్ సిబ్బంది పోలీసులకు సమాచారం అందించారు. వెంటనే పోలీసులు యువతిని చికిత్స నిమిత్తం నగరంలోని నిలోఫర్ ఆసుపత్రికి తరలించారు. ప్రస్తుతం ఆమె అక్కడ వైద్యుల పర్యవేక్షణలో ఉంది. శిశువు మృతదేహాన్ని స్వాధీనం చేసుకున్న పోలీసులు పోస్ట్మార్టం నిమిత్తం ఉస్మానియా మార్చురీకి పంపారు.
విషయం తెలుసుకున్న యువతి కుటుంబ సభ్యులు షాక్కు గురయ్యారు. ఆమె గర్భం దాల్చిన విషయం తమకు తెలియదని, ఆమె బావ వల్లే ఈ గర్భం వచ్చి ఉండవచ్చని వారు గట్టిగా అనుమానిస్తున్నారు. పెళ్లి కాకుండానే గర్భం దాల్చడం, ఆ విషయం ఎవరికీ చెప్పుకోలేక తీవ్రమైన డిప్రెషన్కు గురికావడం వల్లే యువతి ఈ ఘాతుకానికి పాల్పడి ఉంటుందని ప్రాథమికంగా భావిస్తున్నారు.
ఈ ఘటనపై గోల్కొండ పోలీసులు కేసు నమోదు చేసి దర్యాప్తును ముమ్మరం చేశారు. యువతి కోలుకున్నాక ఆమె నుంచి పూర్తి స్టేట్మెంట్ తీసుకోనున్నారు. బాధితురాలి కుటుంబ సభ్యులు అనుమానిస్తున్న వ్యక్తిని కూడా త్వరలోనే విచారించి, ఈ అమానుష ఘటన వెనుక ఉన్న పూర్తి వాస్తవాలను వెలికితీస్తామని పోలీసులు స్పష్టం చేశారు.
