ఢిల్లీలో ప్రధానమంత్రి నరేంద్ర మోదీతో తెలంగాణ ముఖ్యమంత్రి రేవంత్ రెడ్డి మర్యాదపూర్వకంగా భేటీ అయ్యారు. రాష్ట్ర మంత్రులు ఉత్తమ్ కుమార్ రెడ్డి, వాకిటి శ్రీహరితో కలిసి ప్రధానిని కలిసిన ముఖ్యమంత్రి…. తెలంగాణ రాష్ట్రానికి సంబంధించిన పలు కీలక అంశాలు, అభివృద్ధి అవసరాలను ఆయన దృష్టికి తీసుకెళ్లారు. కేంద్రం నుంచి రాష్ట్రానికి అందాల్సిన నిధులు, సహాయక చర్యలపై ఇరువురు నేతలు సుదీర్ఘంగా చర్చించారు.
ఎల్‌నినో కరవు నిధులపై వినతి
ప్రధానంగా, ఎల్‌నినో ప్రభావం వల్ల తెలంగాణలో ఏర్పడిన తీవ్ర కరవు పరిస్థితులను ముఖ్యమంత్రి రేవంత్ రెడ్డి ప్రధాని మోదీకి వివరించారు. వర్షాభావ పరిస్థితుల వల్ల రైతులు, గ్రామీణ ఆర్థిక వ్యవస్థ ఎదుర్కొంటున్న ఇబ్బందులను ఆయన ప్రస్తావించారు. కరవు సహాయక చర్యలను ముమ్మరం చేసేందుకు అవసరమైన ప్రత్యేక ప్యాకేజీ నిధులను తక్షణమే విడుదల చేయాలని ప్రధానిని కోరారు. రాష్ట్ర ప్రయోజనాల దృష్ట్యా కేంద్ర ప్రభుత్వం ఉదారంగా స్పందించి ఆర్థిక సాయం అందించాలని విజ్ఞప్తి చేశారు.
రాష్ట్రంలో నిర్వహించనున్న రెండు ప్రతిష్టాత్మక కార్యక్రమాలకు ముఖ్యమంత్రి ప్రధాని మోదీని ప్రత్యేకంగా ఆహ్వానించారు. తెలంగాణకు భారీగా పెట్టుబడులను ఆకర్షించే లక్ష్యంతో రాష్ట్ర ప్రభుత్వం ప్రతిష్టాత్మకంగా నిర్వహిస్తున్న 'తెలంగాణ గ్లోబల్ ఇన్వెస్టర్స్ సదస్సు' ప్రారంభోత్సవానికి రావాలని కోరారు. దీనితో పాటు, దేశీయ క్రీడా ప్రతిభను వెలికితీసేందుకు తెలంగాణ వేదికగా జరగనున్న 'ఖేలో ఇండియా' పోటీలను ప్రారంభించాల్సిందిగా ప్రధానికి ఆహ్వాన పత్రికను అందజేశారు. రాష్ట్ర అభివృద్ధిలో కేంద్రం భాగస్వామ్యం, సహకారం ఎంతో అవసరమని ఈ సందర్భంగా సీఎం పేర్కొన్నారు.