డిసెంబర్ 11 నుంచి తెలంగాణలో ఖేలో ఇండియా యూత్ గేమ్స్

తెలంగాణలో ఖేలో ఇండియా యూత్ గేమ్స్ నిర్వహించేందుకు రాష్ట్ర ప్రభుత్వం రెడీ అవుతోంది. డిసెంబర్ 11వ తేదీ నుంచి జరగనున్నాయి.

డిసెంబర్ 11 నుండి 22 వరకు ఖేలో ఇండియా యూత్ గేమ్స్(KIYG) ఎనిమిదో ఎడిషన్‌ను నిర్వహించడానికి తెలంగాణ రెడీ అవుతోంది. ఇందులో 27 క్రీడా విభాగాలలో జరిగే పోటీలలో 7,500 మందికి పైగా యువ క్రీడాకారులు పాల్గొనే అవకాశం ఉంది. ఈ క్రీడలు హైదరాబాద్, వరంగల్, హనుమకొండ, కరీంనగర్, నిజామాబాద్, మహబూబ్‌నగర్.. ఇలా ఆరు నగరాల్లో జరుగుతాయి. ఈ కార్యక్రమంలో 1,500 మందికి పైగా సహాయక సిబ్బంది, 1,000 మంది సాంకేతిక అధికారులు, 200 మందికి పైగా ప్రముఖులు పాల్గొంటారని భావిస్తున్నారు.

ప్రతీకాత్మక చిత్రం

హైదరాబాద్‌లో 23 క్రీడా విభాగాలకు సంబంధించిన పోటీలు జరుగుతాయి. మిగిలిన పోటీలు వివిధ జిల్లా కేంద్రాలలో నిర్వహించేలా ప్లాన్ చేశారు. హనుమకొండలో అథ్లెటిక్స్, కరీంనగర్‌లో జూడో, ఖమ్మంలో ఆర్చరీ, మహబూబ్‌నగర్‌లో కబడ్డీ, నిజామాబాద్‌లో టేబుల్ టెన్నిస్ పోటీలు జరుగుతాయి.

ఆతిథ్యం ఇస్తున్న రాష్ట్రంగా తెలంగాణ రోయింగ్(Rowing) క్రీడను ఎంపిక చేసుకోగా.. సెయిలింగ్ ప్రదర్శన క్రీడగా ఉంటుంది. హుస్సేన్ సాగర్ వద్ద ఉన్న వాటర్ స్పోర్ట్స్ కేంద్రం ప్రధాన ఆకర్షణగా నిలవనుంది. ఇక్కడ రోయింగ్, కయాకింగ్, కానోయింగ్ పోటీలు జరుగుతాయి.

గచ్చిబౌలి స్టేడియం, ఎల్బీ స్టేడియం, సరూర్ నగర్ ఇండోర్ స్టేడియం, జెఎన్‌టీయూహెచ్, సికింద్రాబాద్, యూసుఫ్‌గూడలోని కోట్ల విజయ భాస్కర్ రెడ్డి స్టేడియంలో కూడా పోటీలు ఉంటాయి. హైదరాబాద్, క్రీడలకు ఆతిథ్యం ఇస్తున్న జిల్లాల్లోని మొత్తం 10 వేదికల వద్ద 12 రకాల ఆధునీకరణ, అభివృద్ధి పనులను రాష్ట్ర ప్రభుత్వం గుర్తించింది. క్రీడాకారుల కోసం దుస్తులు మార్చుకునే గదులు, ప్రేక్షకుల సౌకర్యాలు, మరుగుదొడ్ల బ్లాకుల మెరుగుదలతోపాటు స్విమ్మింగ్ పూల్స్, సైక్లింగ్ ట్రాక్‌లు, షూటింగ్ రేంజ్‌లు, ఇతర క్రీడా మైదాన సదుపాయాల ఆధునీకరణ పనులు ఇందులో ఉన్నాయి.

డిసెంబర్ 11న గచ్చిబౌలి స్టేడియంలో ప్రారంభోత్సవం ఉండే ఛాన్స్ ఉంది. అలాగే ముగింపు వేడుక డిసెంబర్ 22న ఎల్బీ స్టేడియంలోని టెన్నిస్ కాంప్లెక్స్‌లో నిర్వహిస్తారు. ఈ క్రీడల సమగ్ర నిర్వహణ కోసం ఐదు కమిటీలను ఏర్పాటు చేశారు. క్రీడాకారులు, అతిథుల వసతి, భోజన సదుపాయం, రవాణా ఏర్పాట్లను పర్యవేక్షించడానికి ఒక ప్రత్యేక ఉన్నత స్థాయి కమిటీని ఏర్పాటు చేస్తారు.

తెలంగాణను ఒక ప్రధాన క్రీడా, అంతర్జాతీయ ఈవెంట్ల గమ్యస్థానంగా తీర్చిదిద్దే ప్రయత్నంలో భాగంగా రాష్ట్ర ప్రభుత్వం ప్రణాళికలు వేస్తోంది. యువతరాన్ని భాగస్వామ్యం చేసే లక్ష్యంతో రాష్ట్రం యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీని, డిజిటల్-ఫస్ట్ ఫిట్‌నెస్ కార్యక్రమాలను కూడా ప్రోత్సహిస్తోంది. డిసెంబర్‌లో జరిగే క్రీడలకు ప్రధాని మోదీ ముఖ్య అతిథిగా వచ్చే అవకాశం కూడా ఉంది. ఈ విషయంపై క్లారిటీ రావాల్సి ఉంది.