తెలంగాణ వెదర్ అప్డేట్స్ - ఇవాళ, రేపు వర్షాలు..! ఆపై పొడి వాతవరణమే..!

తెలంగాణలోని పలు జిల్లాల్లో ఉరుములు, మెరుపులు, గంటకు 30-40 కి.మీ వేగంతో ఈదురుగాలులతో కూడిన మోస్తరు వర్షాలు కురిసే అవకాశముంది. అయితే ఎల్లుండి నుంచి పొడి వాతావరణం ఉండనుంది.

తెలంగాణలోని పలు జిల్లాల్లో ఇవాళ, రేపు వర్షాలుపడనున్నాయి. ఉరుములు, మెరుపులు మరియు బలమైన ఈదురుగాలులతో కూడిన వర్షాలు కురుస్తాయని హైదరాబాద్ వాతావరణ కేంద్రం పేర్కొంది.

తెలంగాణ వెదర్ రిపోర్ట్

ఈ జిల్లాలకు వర్ష సూచన…

తాజా బులెటిన్ లోని వివరాల ప్రకారం… సెప్టెంబర్ 28 ఉదయం 08:30 వరకు చూస్తే జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, రంగారెడ్డి, వికారాబాద్ మరియు సంగారెడ్డి జిల్లాల్లో అక్కడక్కడ ఉరుములు, మెరుపులతో పాటు గంటకు 30 నుండి 40 కిలోమీటర్ల వేగంతో ఈదురుగాలులు వీచే అవకాశముంది. ఈ జిల్లాల్లో తేలికపాటి నుండి ఒక మోస్తరు వర్షాలు కురిసే సూచనలున్నాయి.

సెప్టెంబర్ 28 ఉదయం 08:30 నుండి సెప్టెంబర్ 29 ఉదయం 08:30 వరకు చూస్తే… గాలుల తీవ్రత కొనసాగే సూచనలు ఉన్నాయి. జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, రంగారెడ్డి జిల్లాలతో పాటు నాగర్ కర్నూల్, వనపర్తి, జోగులాంబ గద్వాల జిల్లాల్లో గంటకు 30-40 కి.మీ వేగంతో గాలులు వీస్తూ, ఉరుములు-మెరుపులతో కూడిన మోస్తరు వర్షాలు పడే అవకాశం ఉంది. ఈ మేరకు ఎల్లో హెచ్చరికలు జారీ అయ్యాయి.

ఈనెల 29 నుంచి పొడి వాతావరణం…

సెప్టెంబర్ 29 ఉదయం నుండి అక్టోబర్ 2వ తేదీ ఉదయం 08:30 వరకు రాష్ట్రంలో వాతావరణం పొడిగా ఉంటుంది. ఎలాంటి భారీ హెచ్చరికలు లేవని ఐఎండీ స్పష్టం చేసింది. తిరిగి అక్టోబర్ 2 నుంచి 4వ తేదీ మధ్య రాష్ట్రంలో మళ్లీ అక్కడక్కడ తేలికపాటి నుండి ఒక మోస్తరు వర్షాలు కురిసే అవకాశం ఉందని వాతావరణ శాఖ అంచనా వేసింది.