హిల్ట్ పాలసీ కింద దరఖాస్తు చేసుకునేందుకు 3 నెలలు గడువు పెంపు!

హైదరాబాద్ ఇండస్ట్రియల్ ల్యాండ్స్ ట్రాన్స్‌ఫర్మేషన్ పాలసీ(హిల్ట్) కింద దరఖాస్తులు చేసుకునేందుకు ప్రభుత్వం గడువు పెంచింది. మెుదట నెల రోజులే గడువు ఇస్తే సరిగా స్పందన రాలేదు.

హైదరాబాద్ అవుటర్ రింగ్ రోడ్ (ORR) పరిధిలో ఉన్న పారిశ్రామిక భూముల వినియోగ మార్పిడికి సంబంధించి తెలంగాణ ప్రభుత్వం ఒక కీలక నిర్ణయం తీసుకుంది. హైదరాబాద్ ఇండస్ట్రియల్ ల్యాండ్స్ ట్రాన్స్‌ఫర్మేషన్ పాలసీ(HILTP) కింద దరఖాస్తులు చేసుకునేందుకు ఆన్‌లైన్ పోర్టల్‌ను తిరిగి ప్రారంభించింది. ఆగస్టు 1 నుండి అక్టోబర్ 31 వరకు మూడు నెలల పాటు దరఖాస్తులను స్వీకరించనున్నట్లు ప్రభుత్వం తెలిపింది. ఈ మేరకు ప్రభుత్వ ప్రధాన కార్యదర్శి సంజయ్ జూజు ఉత్తర్వులు జారీ చేశారు.

తెలంగాణ ప్రభుత్వం

గతంలో జూన్ 1 నుంచి జూన్ 30 వరకు కేవలం ఒక నెల మాత్రమే ఈ ఆన్‌లైన్ పోర్టల్‌ను అందుబాటులో ఉంచారు. గడువు తక్కువగా ఉండటంతో పరిశ్రమల యజమానులు, పలు అసోసియేషన్ల ప్రతినిధులు గడువును పొడిగించాలని విజ్ఞప్తి చేశారు. డిసెంబర్ 2026 వరకు అవకాశం ఇవ్వాలని, అలాగే జూన్ 5, 2026 కంటే ముందు అమలులో ఉన్న సబ్‌-రిజిస్ట్రార్ ఆఫీస్ రిజిస్ట్రేషన్ రేట్ల ప్రకారమే రుసుములు వసూలు చేయాలని వారు కోరారు.

రాబడి సమీకరణపై జూన్ 21న నిర్వహించిన క్యాబినెట్ సబ్‌ కమిటీ సమావేశంలో వాటాదారులు తమ విజ్ఞప్తులను విన్నవించారు. ప్రభుత్వం జూన్ 5 నుంచి ఎస్‌ఆర్‌ఓ రేట్లను పెంచిన నేపథ్యంలో, పాత రేట్ల ప్రకారమే ల్యాండ్ కన్వర్షన్‌కు అనుమతించాలని ప్రతిపాదించారు. పరిశ్రమ వర్గాల కోరికను పరిగణనలోకి తీసుకున్న తెలంగాణ సర్కార్.. జూన్ 5కి ముందున్న పాత రిజిస్ట్రేషన్ చార్జీల ప్రకారమే అక్టోబర్ 31 వరకు దరఖాస్తులను ఆమోదించాలని నిర్ణయించింది.

ఈ పొడిగించిన గడువు సమయంలో కూడా విధానంలోని మిగిలిన నిబంధనలు, నిబంధనావళి మరియు మార్గదర్శకాలు యథాతథంగా అమలులో ఉంటాయని ఉత్తర్వుల్లో స్పష్టం చేశారు. తెలంగాణ పారిశ్రామిక మౌలిక సదుపాయాల సంస్థ (TGIIC) ని నోడల్ ఏజెన్సీగా నియమించగా, ఈ ప్రక్రియకు సంబంధించి తదుపరి చర్యలు తీసుకోవాల్సిందిగా TGIIC వైస్ ఛైర్మన్, మేనేజింగ్ డైరెక్టర్‌ను చీఫ్ సెక్రటరీ ఆదేశించారు.

పారిశ్రామిక భూములను బహుళ ప్రయోజన ప్రాంతాలుగా మార్చేందుకు తీసుకొచ్చిన ఈ పాలసీ, హైదరాబాద్ చుట్టుపక్కల ప్రాంతాల ఆర్థిక వికాసానికి, నూతన ప్రాజెక్టుల ఏర్పాటుకు ఎంతో దోహదపడుతుందని భావిస్తున్నారు.