E-Paper
మెుంథా ప్రభావంతో హైదరాబాద్లో వాన ముసురు.. ప్రయాణికులకు ట్రాఫిక్ కష్టాలు!
అక్టోబర్ 29, బుధవారం నాడు హైదరాబాద్ వాసులు వాన ముసురుతో మేల్కొన్నారు. ఉదయం నుంచే వర్షం మెుదలైంది. మరోవైపు ప్రయాణికులు ట్రాఫిక్ కష్టాలు చూస్తున్నారు.
తీవ్రమైన మెుంథా తుపాను ఆంధ్రప్రదేశ్ తీరాన్ని మచిలీపట్నం, కళింగపట్నం మధ్య (కాకినాడకు దక్షిణంగా నర్సాపూర్ సమీపంలో) దాటింది. తరువాత తీవ్ర వాయుగుండంగా బలహీనపడింది. మెుంథా ప్రభావంతో తెలుగు రాష్ట్రాల్లో వర్షాలు భారీగా పడుతున్నాయి.
తెలంగాణలోని దక్షిణ, మధ్య, ఉత్తర ప్రాంతాలలో విస్తృతంగా వర్షాలు కురుస్తున్నాయి. అక్టోబర్ 29 (బుధవారం) నాగర్ కర్నూల్ జిల్లాలో తుపాను ప్రభావం ఎక్కువగా ఉంటుందని, 200 మి.మీ వరకు వర్షపాతం నమోదవుతుందని వాతావరణ నిపుణులు హెచ్చరించారు.
యాదాద్రి-భువనగిరి, జనగాం, సిద్దిపేట, హన్మకొండ, వరంగల్, సూర్యాపేట, మహబూబాబాద్, ఖమ్మం సహా అనేక ఇతర జిల్లాల్లో కూడా భారీ నుండి అతి భారీ వర్షాలు కురుస్తాయని అంచనా. లోతట్టు ప్రాంతాల నివాసితులు అప్రమత్తంగా ఉండాలని, అవసరమైతే తప్ప బయటకు వెళ్లవద్దని భారత వాతావరణ శాఖ హెచ్చరించింది. అక్టోబర్ 30వ తేదీన కూడా వర్షాలు పడనున్నాయి.
మరోవైపు హైదరాబాద్లో ప్రజలు మేఘావృతమైన ఆకాశం, చల్లని గాలులు, వాన ముసురుతో మేల్కొన్నారు. రోజంతా నిరంతరాయంగా మోస్తరు వర్షాలు కురిసే అవకాశం ఉంది. తూర్పు , ఉత్తర హైదరాబాద్లో నిరంతరాయంగా వర్షాలు కురుస్తాయని అంచనా వేయగా, ఇతర ప్రాంతాల్లో తేలికపాటి నుండి మోస్తరు వర్షాలు కురిసే అవకాశం ఉంది.
బుధవారం నగరంలో మోస్తరు వర్షాలు లేదా ఉరుములు, మెరుపులతో కూడిన వర్షాలు కురుస్తాయని వాతావరణ శాఖ తెలిపింది. అక్టోబర్ 30 నుండి నవంబర్ 1 వరకు నగరంలో ఉదయం వేళల్లో పొగమంచు లేదా మబ్బు కమ్ముకుంటుంది. IMD హైదరాబాద్ అంచనా వేసిన భారీ వర్షాల దృష్ట్యా నివాసితులు తమ ప్రయాణాన్ని తదనుగుణంగా ప్లాన్ చేసుకోవాలి.
వర్షాల కారణంగా ఇప్పటికే నగరంలోని అనేక ప్రాంతాల్లో నీరు నిలిచి, ట్రాఫిక్ రద్దీ ఏర్పడింది. హైదరాబాద్ ట్రాఫిక్ పోలీసులు ఎక్స్లో ఒక పోస్ట్ చేశారు. లక్డీకాపుల్, అయోధ్య జంక్షన్, పీటీఐ, మహావీర్ హాస్పిటల్, మాసబ్ ట్యాంక్ ఫ్లైఓవర్, ఎన్ఎండీసీ, ఎస్డీ హాస్పిటల్, అజీజియా మసీదు నుండి మెహదీపట్నం వైపు భారీ ట్రాఫిక్, నెమ్మదిగా వాహనాల కదలిక గురించి ప్రయాణికులను హెచ్చరించారు.
ఈ ప్రాంతాల్లోనే కాదు హైదరాబాద్లోని ఇతర ప్రాంతాల్లోనూ ట్రాఫిక్ సమస్యలు ఎదురవుతున్నాయి. వర్షం పడుతుండటంతో వాహనాలు నెమ్మదిగా కదులుతున్నాయి. దీంతో ట్రాఫిక్ సమస్య ఏర్పడుతుంది. అత్యవసరం అయితేనే బయటకు రావాలని అధికారులు హెచ్చరించారు.
