Hyderabad : వరకట్న మృతి కేసు - సీజ్ చేసిన నగలు, డబ్బును కాజేసిన కానిస్టేబుల్!

వరకట్న వేధింపుల కేసులో సీజ్ చేసిన బంగారు ఆభరణాలను ఓ కానిస్టేబుల్ తాకట్టు పెట్టాడు. ఫోన్ ద్వారా రూ.1.70 లక్షలు కాజేసిన ఘటన వెలుగు చూసింది. ఈ మేరకు మీర్‌పేట్ కానిస్టేబుల్ శ్రావణ్ కుమార్‌పై పోలీసులు కేసు నమోదు చేశారు.

హైదరాబాద్ నగరంలోని మీర్‌పేట్ పోలీస్ స్టేషన్‌లో షాకింగ్ ఘటన వెలుగు చూసింది. న్యాయాన్ని కాపాడాల్సిన కానిస్టేబుల్ అక్రమాలకు పాల్పడ్డాడు. వరకట్న హత్య కేసు దర్యాప్తులో భాగంగా సీజ్ చేసిన విలువైన ఆస్తులు, నగదును స్వార్థం కోసం వాడుకున్నాడు. ఈ ఆరోపణలపై అతనిపై కేసు నమోదైంది.

కేసు వివరాలు ఇలా….

సీజ్‌ చేసిన ఫోన్‌ నుంచి నగదు కాజేసిన పోలీస్ కానిస్టేబుల్

పోలీసులు తెలిపిన వివరాల ప్రకారం.. మీర్‌పేట్ పోలీస్ స్టేషన్ పరిధిలో గట్ల పద్మ అనే మహిళ తన కుమార్తె హేమ మృతిపై ఫిర్యాదు చేసింది. భర్తతో పాటు అతని కుటుంబ సభ్యులు వరకట్నం కోసం తీవ్ర వేధింపులకు గురిచేయడంతోనే తన కుమార్తె ఉరేసుకుని మృతి చెందిందని జులై 30న ఫిర్యాదు చేశారు. ఈ ఫిర్యాదు ఆధారంగా మీర్‌పేట్ పోలీసులు కేసు నమోదు చేశారు.

విచారణ సమయంలో పోలీసులు ఐదుగురు నిందితులను అరెస్ట్ చేసి రిమాండ్‌కు తరలించారు. కేసు ఆధారాల సేకరణలో భాగంగా పంచనామా నిర్వహించి నిందితుల నుంచి మొబైల్ ఫోన్లు, భారీగా బంగారు, వెండి ఆభరణాలను స్వాధీనం చేసుకున్నారు. ఈ సీజ్ చేసిన కేస్ ప్రాపర్టీని ఆగస్టు 22న ఇన్వెస్టిగేషన్ ఆఫీసర్ సమక్షంలో… స్టేషన్ హౌస్ ఆఫీసర్, సెక్టార్ ఎస్‌ఐ ఉమామహేశ్వరి సమక్షంలో సరైన రశీదుతో కానిస్టేబుల్ ఎన్. శ్రావణ్ కుమార్ కు భద్రపరచడం కోసం అప్పగించారు.

కేసు ప్రాపర్టీకి బాధ్యత వహించాల్సిన కానిస్టేబుల్ శ్రావణ్ కుమార్ తన చేతిలో ఉన్న ఆస్తులను దుర్వినియోగం చేసినట్లు తదుపరి విచారణలో బయటపడింది. ఏ1 నిందితుడి సీజ్ చేసిన మొబైల్ ఫోన్ ద్వారా యూపీఐ సహాయంతో అక్రమంగా రూ.1,70,000 నగదును బదిలీ చేసుకున్నాడు. ఇందులో రూ.1,37,000 నగదును తన భార్య ఖాతాకు, మిగిలిన మొత్తాన్ని మల్లకేడి శివాజీ అనే వ్యక్తి ఖాతాకు మళ్లించాడు.

కానిస్టేబుల్ చేసిన ఈ అక్రమాలపై మీర్‌పేట్ ఇన్‌స్పెక్టర్ బి. శోభన్ అక్టోబర్ 27న ఫిర్యాదు చేశారు. ఇన్‌స్పెక్టర్ ఫిర్యాదు ఆధారంగా కానిస్టేబుల్ శ్రావణ్ కుమార్‌పై పలు సెక్షన్ల కింద కేసులు నమోదైంది. అన్ని కోణాల్లో దర్యాప్తు చేస్తున్నారు.