NEET PG Exam : నీట్ పీజీ అభ్యర్థులకు అలర్ట్.. ఈ రూట్‌లలో పరీక్ష కేంద్రాలకు అస్సలు వెళ్లకండి

NEET PG Exam : ఆగస్టు 30వ తేదీన నీట్ పీజీ పరీక్ష ఉంది. హైదరాబాద్‌లో పరీక్షలు రాసేవారు పలు రూట్‌ల వైపు వెళ్లకూడదని ట్రాఫిక్ పోలీసులు విజ్ఞప్తి చేస్తున్నారు. ఏ రూట్‌ నుంచి వెళ్లకూడదో తెలుసుకోండి.

ఆగస్టు 30న ఎన్‌ఎండీసీ హైదరాబాద్ మారథాన్ 2026(15వ ఎడిషన్) జరగనున్న నేపథ్యంలో సైబరాబాద్ ట్రాఫిక్ పోలీసులు కీలక ప్రయాణ హెచ్చరికలు జారీ చేశారు. అదే రోజు నేషనల్ ఎలిజిబిలిటీ-కమ్-ఎంట్రన్స్ టెస్ట్-పోస్ట్ గ్రాడ్యుయేట్ (NEET-PG) పరీక్ష కూడా ఉంది. దీంతో పరీక్షకు హాజరయ్యే అభ్యర్థులు పశ్చిమ హైదరాబాద్‌లోని ప్రధాన రహదారులను తప్పించి ప్రత్యామ్నాయ మార్గాలను ఎంచుకోవాలని పోలీసులు సూచించారు.

హైదరాబాద్‌లో ట్రాఫిక్ ఆంక్షలు

ఈ హైదరాబాద్ మారథాన్ ఆదివారం ఉదయం 5:00 గంటల నుంచి ఉదయం 11:30 గంటల వరకు సైబరాబాద్ కమిషనరేట్ పరిధిలోని పలు కీలక రహదారులపై సాగనుంది.

ప్రధాన మారథాన్ మార్గం

కేబుల్ బ్రిడ్జ్ నుండి ప్రారంభమై ఐటీసీ కోహినూర్, నాలెడ్జ్ సిటీ గేట్ నెం. 8, మై హోమ్ ఆభ్ర, సీ గేట్ జంక్షన్, ఐకియా (మైండ్ స్పేస్ రోటరీ), ట్రాన్స్‌కో, ఎన్‌సీబీ/బయోడైవర్సిటీ జంక్షన్, పిస్తా హౌస్, సౌత్ ఇండియా షాపింగ్ మాల్, గచ్చిబౌలి ఫ్లైఓవర్, ఇందిరా నగర్, ఐఐఐటీ జంక్షన్, గచ్చిబౌలి స్టేడియం వరకు సాగుతుంది.

యూనివర్సిటీ ఆఫ్ హైదరాబాద్ రూట్: ప్రొఫెసర్ సి.ఆర్.రావు రోడ్డులో ఉన్న హైదరాబాద్ కేంద్రీయ విశ్వవిద్యాలయం గేట్ నెం. 2 ద్వారా రన్నర్లు క్యాంపస్‌లోకి ప్రవేశిస్తారు. మరలా అదే గేట్ నుంచి బయటకు వచ్చి గచ్చిబౌలి స్టేడియం వైపు తిరుగుప్రయాణమవుతారు.

ఐకియా వద్ద కలవనున్న 10 కే రన్

మరోవైపు 10 కే రన్ మాదాపూర్‌లోని హైటెక్స్ నుంచి ప్రారంభమవుతుంది. ఇది ఎన్ఏసి మెయిన్ గేట్, ఖానామెట్ జంక్షన్, మెటల్ చార్మినార్ జంక్షన్, టెక్ మహీంద్రా, లెమన్ ట్రీ హోటల్, రాయదుర్గం మెట్రో స్టేషన్, ఐకియా అండర్‌పాస్ మీదుగా సాగుతుంది. ఐకియా పరిసర ప్రాంతాల్లో ఈ 10 కే రన్ రూట్, ప్రధాన మారథాన్ మార్గంతో కలుస్తుంది.

అభ్యర్థులు దూరంగా ఉండాల్సిన కీలక రహదారులు

NEET-PG పరీక్షా కేంద్రాలకు వెళ్లే విద్యార్థులు సమయానికి చేరుకునేందుకు కింది రెండు ప్రధాన రహదారుల గుండా ప్రయాణించకుండా నివారించాలని సైబరాబాద్ ట్రాఫిక్ పోలీసులు సూచించారు.

మొదటి మార్గం: కేబుల్ బ్రిడ్జ్ – ఐటీసీ కోహినూర్ – మై హోమ్ ఆభ్ర – ఐకియా (మైండ్ స్పేస్) – ఎన్‌సీబీ జంక్షన్ – గచ్చిబౌలి ఫ్లైఓవర్ – ఇందిరా నగర్ – ఐఐఐటీ జంక్షన్ – గచ్చిబౌలి స్టేడియం – హైదరాబాద్ వర్సిటీ గేట్ నెం. 2.

రెండో మార్గం: ఎన్ఏసీ మెయిన్ గేట్ – మెటల్ చార్మినార్ – టెక్ మహీంద్రా – లెమన్ ట్రీ హోటల్ – రాయదుర్గం మెట్రో స్టేషన్ – ఐకియా అండర్‌పాస్.

ముందస్తుగా బయలుదేరాలి

హైదరాబాద్ మారథాన్ కారణంగా ఐటీ కారిడార్‌లో తీవ్ర ట్రాఫిక్ మళ్లింపులు, రద్దీ ఉండే అవకాశం ఉన్నందున NEET-PG అభ్యర్థులు చాలా ముందుగానే ఇళ్ల నుంచి బయలుదేరాలని సైబరాబాద్ జాయింట్ కమిషనర్ ఆఫ్ పోలీస్ (ట్రాఫిక్) కోరారు. ప్రత్యామ్నాయ మార్గాలను ఉపయోగించుకుని ఎలాంటి ఆందోళన లేకుండా పరీక్షా కేంద్రాలకు సకాలంలో చేరుకోవాలని తెలిపారు. అలాగే పరీక్ష రాయబోతున్న విద్యార్థులందరికీ సైబరాబాద్ ట్రాఫిక్ పోలీస్ విభాగం శుభాకాంక్షలు తెలుపుతూ, ప్రశాంతంగా పరీక్ష రాయాలని ఆకాంక్షించింది.