పాత రిజర్వేషన్ల ప్రకారం ఎన్నికలకు వెళ్లొచ్చు.. 42 శాతం బీసీ రిజర్వేషన్లపై సుప్రీం కోర్టు!

42 శాతం బీసీ రిజర్వేషన్లపై తెలంగాణ ప్రభుత్వానికి షాక్ తగిలింది. ప్రభుత్వం వేసిన స్పెషల్ లీవ్ పిటిషన్‌ను సుప్రీంకోర్టు కొట్టివేసింది.

తెలంగాణలో 42 శాతం బీసీ రిజర్వేషన్ల అమలుపై సుప్రీం కోర్టు రాష్ట్ర ప్రభుత్వానికి షాక్ ఇచ్చింది. తెలంగాణ ప్రభుత్వం దాఖలు చేసిన స్పెషల్ లీవ్ పిటిషన్‌ను కొట్టివేసింది. కావాలంటే పాత రిజర్వేషన్లతోనే ఎన్నికలను నిర్వహించుకోవచ్చని సుప్రీం కోర్టు తెలిపింది.

బీసీ రిజర్వేషన్లపై సుప్రీం కోర్టు

స్థానిక సంస్థల ఎన్నికల్లో వెనుకబడిన తరగతులకు 42 శాతం రిజర్వేషన్ల అమలును నిలిపివేస్తూ తెలంగాణ హైకోర్టు ఇచ్చిన మధ్యంతర ఉత్తర్వులను సవాలు చేస్తూ తెలంగాణ ప్రభుత్వం సుప్రీంకోర్టులో స్పెషల్ లీవ్ పిటిషన్ దాఖలు చేసింది. దీన్ని సుప్రీం కోర్టు గురువారం కొట్టివేసింది.

ఈ అంశం హైకోర్టులో పెండింగ్‌లో ఉందని, విచారణకు స్వీకరించలేమని అత్యున్నత న్యాయస్థానం చెప్పింది. రాష్ట్ర ప్రభుత్వం వేసిన స్పెషల్ లీవ్ పిటిషన్ కొట్టివేత ప్రభావంతో ప్రభావితం కాకుండా హైకోర్టు మెరిట్‌ ఆధారంగా నిర్ణయం తీసుకోవాలని జస్టిస్ విక్రమ్ నాథ్ , జస్టిస్ సందీప్ మెహతాలతో కూడిన ధర్మాసనం స్పష్టం చేసింది. ఒకవేళ కావాలి అనుకుంటే పాత రిజర్వేషన్ల ప్రకారం ఎన్నికలకు వెళ్లొచ్చని సూచించింది.

రాష్ట్ర ప్రభుత్వం తరఫున అభిషేక్ సింఘ్వీ వాదనలు వినిపించారు. ఈ అంశం మీద తక్షణమే జోక్యం చేసుకోవాలని న్యాయస్థానాన్ని కోరారు. రిజర్వేషన్లు 50 శాతం మించకూడదనే అభిప్రాయం సరికాదని కోర్టుకు తెలిపారు. ఇందిరా సహానీ కేసులో 50 శాతం పరిమితి దాటొచ్చని, ఉందని గుర్తు చేశారు. దేశంలో ఎక్కడా లేని విధంగా తెలంగాణలో కులగణన సర్వే జరిగిందన్నారు.

రిజర్వేషన్ల పెంపుపై అసెంబ్లీలో అన్ని పార్టీలూ ఏకాభిప్రాయం చెప్పాయని సింఘ్వీ సుప్రీం కోర్టుకు చెప్పారు. 3 నెలలు దాటినా.. బిల్లు మీద గవర్నర్ నిర్ణయం తీసుకోలేదన్నారు. మూడు నెలల్లో నిర్ణయం తీసుకోకుంటే బిల్లు ఆమోదం పొందినట్టేనని సుప్రీం చెప్పిందని, ఆ తీర్పు ప్రకారం బిల్లు చట్టంగా మారినట్టేనని బలంగా వాదనలు వినిపించారు. అయితే ఈ అంశం హైకోర్టులో పెండింగ్‌లో ఉన్నందున విచారణ చేయడానికి నిరాకరిస్తూ సుప్రీం కోర్టు డిస్మిస్ చేసింది.