హైదరాబాద్ వాసులకు అలర్ట్ - ఈ ప్రాంతాల్లో నీటి సరఫరాకు అంతరాయం, వివరాలు

హైదరాబాద్‌ నగర వాసులకు జలమండలి అధికారులు అలర్ట్ ఇచ్చారు. అక్టోబర్ 27వ తేదీన పలు ప్రాంతాల్లో నీటి సరఫరాకు అంతరాయం ఉండనుంది. ఈ మేరకు అధికారులు ప్రకటన విడుదల చేశారు.

హైదరాబాద్‌ నగర వాసులకు అలర్ట్…! రేపు (అక్టోబర్ 27) పలు ప్రాంతాల్లో నీటి సరఫరాకు అంతరాయం ఉండనుంది. ఈ మేరకు హైదరాబాద్ అధికారులు ప్రకటన విడుదల చేశారు. ఎలివేటెడ్ కారిడార్ పనుల్లో భాగంగా ప్యారడైజ్ జంక్షన్ వద్ద 800 మి.మీ డయా ఎంఎస్ పైప్‌లైన్ విస్తరణ పనులను హెచ్ఎండీఏ చేపట్టనుంది. ఈ పనుల్లో సికింద్రాబాద్ తో పాటు పలు ప్రాంతాల్లో నీటి సరఫరాకు అంతరాయం ఉండనుంది.

మంచినీటి సరఫరా నిలిపివేత (image source @IPRTelangana)

మారేడ్‌పల్లి నుంచి కంట్రోల్ రూమ్ వరకు ఎంఎస్ పైప్​లైన్​ను స్పోర్ట్స్ గ్రౌండ్, లీ-రాయల్ జంక్షన్, బాలంరాయి వద్ద అనుసంధానం చేస్తారు. కాబట్టి అక్టోబర్ 27వ తేదీన మధ్యాహ్నం 12 గంటల నుంచి 28 ఉదయం 6 గంటల వరకు 18 గంటల పాటు ఈ పనులు కొనసాగనున్నాయి.

ఏ ఏ ప్రాంతాలంటే..?

ఈ పనుల కారణంగా… నల్లగుట్ట, ప్రకాశ్ నగర్, మేకలమండి, భోలక్​పూర్, హస్మత్​పేట తదితర ప్రాంతాలు నీటి సరఫరాకు అంతరాయం ఉంటుంది. అంతేకాకుండా సౌత్ సెంట్రల్ రైల్వే, బేగంపేట విమానాశ్రయం, బాలంరాయి పంప్​హౌస్, బాలంరాయి చెక్ పోస్ట్, బోయిన్ పల్లి, ఏవోసీ రైల్వే కాలనీ ప్రాంతాల్లో నీటి సరఫరా బంద్ కానుంది.

నీటి సరఫరా నిలిచిపోవటంతో పాటు ప్రభావిత ప్రాంతాల్లోని వినియోగదారులు నీటిని పొదుపుగా వినియోగించుకోవాలని జలమండలి, హెచ్ఎండీఏ అధికారులు విజ్ఞప్తి చేశారు.