హైదరాబాద్‌లో విషాదం.. గచ్చిబౌలిలో కుప్పకూలిన ఏడంతస్తుల భవనం.. ఇద్దరు మృతి

హైదరాబాద్ గచ్చిబౌలిలోని అంజయ్యనగర్‌లో ఓ భవనం కూలింది. నాలా పక్కనే 50 గజాల స్థలంలో కొన్ని రోజుల కిందట నిర్మాణం చేసిన ఏడంతస్తుల భవనం కూలిన ఘటనలో ఇద్దరు మరణించారు.

హైదరాబాద్‌లోని ప్రముఖ ఐటీ హబ్ గచ్చిబౌలి పరిధిలోని అంజయ్యనగర్‌లో ఘోర ప్రమాదం చోటుచేసుకుంది. నాలాను ఆనుకుని కేవలం 50 గజాల విస్తీర్ణంలో అక్రమంగా నిర్మించినట్లు ఆరోపణలు వస్తున్న ఓ ఏడంతస్తుల భవనం ఒక్కసారిగా కుప్పకూలింది. ఈ దుర్ఘటనలో ఇద్దరు ప్రాణాలు కోల్పోగా, ప్రమాద తీవ్రతకు స్థానికులు తీవ్ర దిగ్భ్రాంతికి గురయ్యారు.

కుప్పకూలిన భవనం

కొత్తగా నిర్మాణం పూర్తి చేసుకుని, త్వరలోనే అద్దెకు ఇచ్చేందుకు సిద్ధంగా ఉన్న ఈ భవనం అకస్మాత్తుగా పక్కకు వాలిపోతూ కూలిపోయింది. ఈ క్రమంలో శిథిలాలు పక్కనే ఉన్న ఆపార్ట్‌మెంట్‌పై పడటంతో దాని గోడలు పూర్తిగా ధ్వంసమయ్యాయి.

భవనం కూలిన శబ్దానికి పక్కనే ఉన్న హాస్టల్‌లోని విద్యార్థులు, స్థానికులు తీవ్ర భయాందోళనలతో వీధుల్లోకి పరుగులు తీశారు. సమాచారం అందుకున్న వెంటనే డిజాస్టర్ రెస్పాన్స్ ఫోర్స్, పోలీసులు, జీహెచ్‌ఎంసీ అధికారులు ఘటనా స్థలానికి చేరుకున్నారు. జేసీబీల సాయంతో శిథిలాలను తొలగిస్తూ, ఇప్పటివరకు ఇద్దరి మృతదేహాలను వెలికితీశారు. లోపల ఇంకెవరైనా చిక్కుకున్నారేమోనని పరిశీలిస్తున్నారు.

ఈ ఘటన రాత్రి లేదా సాయంత్రం వేళల్లో జరిగి ఉంటే, జనసంచారం ఎక్కువగా ఉండి భారీ స్థాయిలో ప్రాణనష్టం సంభవించి ఉండేదని స్థానికులు పేర్కొంటున్నారు.

మాదాపూర్, గచ్చిబౌలి, కొండాపూర్ వంటి ప్రాంతాల్లో చిన్న చిన్న స్థలాల్లో నిబంధనలకు విరుద్ధంగా బహుళ అంతస్తుల భవనాలు నిర్మించడం సాధారణంగా మారింది. 50 గజాల స్వల్ప స్థలంలో, అది కూడా నాలా పక్కన సరైన పునాదులు లేకుండా ఏడు అంతస్తులు నిర్మించడమే ఈ ప్రమాదానికి ప్రధాన కారణమని ప్రాథమికంగా భావిస్తున్నారు. ఈ ఘటనపై జీహెచ్‌ఎంసీ అధికారులు విచారణకు ఆదేశించారు. నిబంధనలు ఉల్లంఘించిన బిల్డర్‌పై కఠిన చర్యలు తీసుకునేందుకు పోలీసులు సిద్ధమవుతున్నారు.