వేములవాడలో ఆలయం అభివృద్ధి పనులు పూర్తయ్యే వరకు ఎల్ఈడీ స్క్రీన్ ద్వారా రాజన్న దర్శనం!

వేములవాడలో శ్రీ రాజరాజేశ్వర స్వామి ఆలయంలో అభివృద్ధి పనులు వేగంగా కొనసాగుతున్నాయి. అయితే పనులు ముగిసేవరకు ఎల్ఈడీ స్క్రీన్ ద్వారానే దర్శనం కల్పించనున్నారు.

వేములవాడ రాజన్న ఆలయం అభివృద్ధి పనులు శరవేగంగా నడుస్తున్నాయి. భక్తుల సౌకర్యం కోసం అధికారులు ఏర్పాట్లు చేశారు. ఆలయం అభివృద్ధి పనులు పూర్తయ్యే వరకు ఎల్ఈడీ స్క్రీన్ ద్వారా దర్శనం కల్పిస్తారు. భక్తుల కోసం ఆర్జిత సేవలు కూడా తాత్కాలికంగా అందుబాటులో ఉంటాయి. ప్రత్యేక సేవలు, ప్రసాదాల పంపిణీ, వసతి సదుపాయాలను కూడా తాత్కాలికంగా ఏర్పాట్లు చేస్తున్నారు.

వేములవాడ రాజన్న ఆలయం

భక్తుల అభ్యంతరాల నేపథ్యంలో శ్రీ రాజరాజేశ్వర స్వామి ఆలయ అభివృద్ధి పనులు పూర్తయ్యే వరకు ఎల్ఈడీ స్క్రీన్, తాత్కాలిక ఏర్పాట్ల ద్వారా స్వామివారి దర్శనం కల్పించాలని నిర్ణయించారు అధికారులు. దేవాదాయ శాఖ భక్తుల కోసం ఆలయంలో అర్జిత సేవలను కూడా అందిస్తుంది. ప్రధాన ఆలయ నిర్మాణం పూర్తయ్యే వరకు భక్తుల సౌలభ్యం కోసం ఈ ఏర్పాట్లు కొనసాగుతాయి. భక్తుల మనోభావాలు, అర్చకులు, వేద పండితుల సూచనలను పరిగణనలోకి తీసుకుని ఈ నిర్ణయాలు తీసుకున్నారు.

వేములవాడ రాజన్న ఆలయంలో భక్తులకు దర్శనాలను తాత్కాలికంగా నిలిపివేయడంపై వ్యతిరేకత వ్యక్తమైన విషయం తెలిసిందే. ఆలయ విస్తరణ, అభివృద్ధి పనులు చేస్తున్నారు అధికారులు. ఇందులో భాగంగా భక్తులకు తాత్కాలికంగా దర్శనాలను నిలిపివేశారు. రాజరాజేశ్వర స్వామి మందిరం అనుబంధ ఆలయమైన భీమేశ్వరాలయంలో ప్రత్యామ్నాయ సౌకర్యాలను ఏర్పాటు చేసినట్టుగా ప్రకటించారు.

ప్రధాన ఆలయంలో ఏకాంత సేవలు యథావిధిగా కొనసాగుతాయని ఇటీవల ప్రకటనలో తెలిపారు అధికారులు. భీమేశ్వరాలయంలో కోడెమొక్కు, అభిషేకాలు, కుంకుమపూజ, నిత్య కల్యాణం, చండీయాగం వంటి పూజలు జరుగుతాయన్నారు. ఆలయాన్ని మూసివేయడం లేదని కార్యనిర్వాహక అధికారిణి రమాదేవి అన్నారు. 'పనులు జరుగుతున్న సమయంలో భక్తులు భీమేశ్వరాలయంలో అన్ని పూజలు కొనసాగించవచ్చు.' అని ఇటీవల పేర్కొన్నారు