తెలంగాణలో తీవ్రమవుతున్న వడగాలులు.. కొన్ని ప్రాంతాల్లో ఉరుములతో కూడిన వర్షాల సూచన

Telangana Weather Update : తెలంగాణలో వాతావరణ పరిస్థితులు మారుతున్నాయి. ఓవైపు వడగాలులు ఎక్కువ అవుతున్నాయి. మరోపైపు కొన్ని ప్రాంతాల్లో వర్షాలు పడే సూచనలు కనిపిస్తున్నాయి.

తెలంగాణలో భిన్నమైన వాతావరణ పరిస్థితులు నెలకొన్నాయి. తాజా వాతావరణ సూచన ప్రకారం తెలంగాణలో తీవ్రమైన వేడి వాతావరణం నెలకొననుంది. ఉత్తర, తూర్పు జిల్లాల్లో ఉష్ణోగ్రతలు 40-41 డిగ్రీలకు చేరే అవకాశం ఉంది. రాబోయే మూడు రోజుల పాటు తెలంగాణలోని పలు ప్రాంతాల్లో తేలికపాటి నుండి మోస్తరు వర్షాలు కురుస్తాయని, వీటితో పాటు ఉరుములు, మెరుపులు, ఈదురు గాలులు వీస్తాయని భారత వాతావరణ శాఖ అంచనా వేసింది.

తెలంగాణ వర్షాలు

మరాఠ్వాడా నుండి దక్షిణ అంతర్గత కర్ణాటక వరకు విస్తరించి ఉన్న ఒక ద్రోణి వాతావరణంపై ప్రభావం చూపుతోంది. ఉత్తర, పశ్చిమ జిల్లాల్లో ఒకటి లేదా రెండు చోట్ల వడగళ్ల వర్షం కురిసే అవకాశం ఉంది. ఉష్ణోగ్రతలు మొదట్లో సాధారణ స్థాయికి దగ్గరగానే ఉంటాయని, ఆ తర్వాతి నాలుగు రోజుల్లో మాత్రం సాధారణం కంటే 2-3 డిగ్రీల మేర పెరుగుతాయని వాతావరణ శాఖ తెలిపింది.

హైదరాబాద్ నగరంలో ఉష్ణోగ్రతలు 38 నుంచి 39 డిగ్రీల మధ్య నమోదయ్యే అవకాశం ఉంది. పెరుగుతున్న వేడి రోజంతా కొనసాగే అవకాశం ఉంది.

తెలంగాణలోని పలు జిల్లాల్లో ఉరుములతో కూడిన వర్షాలు కురిసే అవకాశం ఉంది వికారాబాద్, రంగారెడ్డి, నాగర్‌కర్నూల్, నల్గొండ జిల్లాల్లోని కొన్ని ప్రాంతాల్లో చెదురుమదురుగా తీవ్రమైన ఉరుములతో కూడిన వర్షాలు కురిసే అవకాశం ఉంది. ఈ ప్రాంతాల్లో ఈదురు గాలులు, వర్షంతో సహా ఆకస్మిక వాతావరణ మార్పులు సంభవించవచ్చు.

హైదరాబాద్‌లో కూడా సాయంత్రం లేదా రాత్రి వేళల్లో అక్కడక్కడా ఉరుములతో కూడిన వర్షం కురిసే అవకాశం ఉంది. దీంతో వేడి నుండి కొద్దిసేపు ఉపశమనం లభిస్తుంది.

రాష్ట్రంలోని ఇతర ప్రాంతాల్లో చెదురుమదురుగా వర్షం లేదా పొడి వాతావరణం ఉంటుంది. మిగిలిన జిల్లాల్లో వాతావరణం చాలా వరకు పొడిగానే ఉంటుంది, అక్కడక్కడా మాత్రమే వర్షాలు కురిసే అవకాశం ఉంది. చాలా ప్రాంతాల్లో రోజంతా వేడి, పొడి వాతావరణం కొనసాగుతుంది.

వాతావరణ సూచన ప్రకారం రాష్ట్రవ్యాప్తంగా మిశ్రమ వాతావరణం నెలకొని ఉంటుంది. అక్కడక్కడా పరిమితంగా ఉరుములతో కూడిన వర్షాలు కురుస్తున్నప్పటికీ, కొన్ని ప్రాంతాల్లో వడగాలుల పరిస్థితులు ఎక్కువే ఉంటాయి.