నన్ను వాట్సాప్ గ్రూప్‌ నుంచి తొలగించారు.. హర్ట్ అయ్యాను.. పోలీస్ స్టేషన్ వెళ్లిన మహిళ!

హైదరాబాద్‌లో ఓ మహిళ పోలీస్ స్టేషన్ వెళ్లింది. అయితే దీనిపై ఇప్పుడు సోషల్ మీడియాలో చర్చ నడుస్తోంది. ఎందుకంటే తనను వాట్సాప్ గ్రూప్ నుంచి తొలగించారనే కారణంతో ఆ మహిళ పోలీసులను ఆశ్రయించడం విశేషం.

డిజిటల్ యుగంలో సోషల్ మీడియా గ్రూపుల వివాదాలు చివరకు పోలీస్ స్టేషన్ల వరకు వెళ్తున్నాయి. వాట్సాప్ గ్రూప్ నుండి బ్లాక్ చేసి, తొలగించారనే కారణంతో ఓ మహిళ తనకు మానసిక వేధింపులు జరిగాయంటూ స్థానిక పోలీసులను ఆశ్రయించిన వింత ఘటన హైదరాబాద్‌లోని బంజారాహిల్స్ పోలీస్ స్టేషన్ పరిధిలో వెలుగుచూసింది. తనను తిరిగి గ్రూపులో చేర్చుకునేలా చర్యలు తీసుకోవాలని సదరు మహిళ పోలీసులకు ఫిర్యాదు చేసింది.

వాట్సాప్ గ్రూప్ నుంచి తొలగించారని పోలీస్ స్టేషన్ వెళ్లిన మహిళ

పోలీసులు తెలిపిన వివరాల ప్రకారం ఈ కేసుకు సంబంధించిన పూర్తి సమాచారం ఇలా ఉంది. బంజారాహిల్స్ రోడ్ నంబర్ 12లోని ఎన్‌బీటీ నగర్ నివాసితులు స్థానిక బస్తీ సమస్యలు, కాలనీ విషయాలను పంచుకోవడానికి ఒక వాట్సాప్ గ్రూపును ఏర్పాటు చేసుకున్నారు. ఈ గ్రూపులో స్థానిక సమస్యలు మినహా, ఎలాంటి రాజకీయ పరమైన అభిప్రాయాలు లేదా సందేశాలు పోస్ట్ చేయకూడదని గ్రూప్ అడ్మిన్ ముందే కచ్చితమైన నిబంధనలు పెట్టారు.

అయితే ఫిర్యాదు చేసిన మహిళ ఈ నిబంధనలను ఉల్లంఘించి, గ్రూపులో రాజకీయాలకు సంబంధించిన సందేశాలను నిరంతరం పోస్ట్ చేస్తూ వచ్చారు. దీనిపై గ్రూప్ సభ్యుల మధ్య వివాదం మొదలైంది. హెచ్చరించినా వినకపోవడంతో గ్రూప్ అడ్మిన్ ఆమెను వాట్సాప్ గ్రూప్ నుండి తొలగించారు(రిమూవ్ చేశారు).

గ్రూప్ నుండి తొలగించడాన్ని సదరు మహిళ అవమానంగా భావించింది. తన్ను మళ్లీ గ్రూపులో చేర్చుకోవాలని ఆమె అడ్మిన్‌ను కోరినప్పటికీ, అందుకు అడ్మిన్ నిరాకరించారు. దీంతో తీవ్ర మనస్తాపానికి గురైన మహిళ.. బంజారాహిల్స్ పోలీసులను ఆశ్రయించి, గ్రూప్ సభ్యులు తనను మానసికంగా వేధిస్తున్నారని ఫిర్యాదు చేసింది.

కేసు దర్యాప్తులో భాగంగా పోలీసులు గ్రూప్ అడ్మిన్‌ను స్టేషన్‌కు పిలిపించి కౌన్సిలింగ్ ఇచ్చే ప్రయత్నం చేశారు. అయినప్పటికీ గ్రూప్ అడ్మిన్ సదరు మహిళను గ్రూపులోకి ఎట్టి పరిస్థితుల్లోనూ తిరిగి చేర్చుకోబోమని స్పష్టం చేశారు. నిబంధనలు ఉల్లంఘించినందుకే తొలగించామని, ఈ విషయంలో తాము తదుపరి చర్యల కోసం చట్టపరమైన సలహా తీసుకుంటున్నట్లు అడ్మిన్ పోలీసులకు తెలిపారు.